Saturday, August 13, 2022

Latest Posts

ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಬಿಡುವು ಪಡೆದ ಮಳೆ: ಹೆಬ್ಬಾಳ ಸೇತುವೆ ನೀರಿನಿಂದ ಮುಕ್ತ, ವಾಹನ ಸಂಚಾರ

ಚಿಕ್ಕಮಗಳೂರು: ಜಿಲ್ಲೆಯಲ್ಲಿ ಭಾನುವಾರ ಮಳೆ ಬಿಡುವು ನೀಡಿದ್ದು, ಪ್ರಮುಖ ನದಿಗಳ ಹರಿವಿನಲ್ಲಿ ಇಳಿಮುಖ ಕಂಡಿದೆ. ಇತ್ತ ಆಡಳಿತ ಯಂತ್ರ ಮಳೆಯಿಂದಾದ ಹಾನಿ ಸರಿಪಡಿಸುವ ಕಾರ್ಯಕ್ಕೆ ಮುಂದಾಗಿದೆ.
ಭದ್ರಾ ನದಿ ಅಬ್ಬರ ದಿಂದ ನಾಲ್ಕು ದಿನಗಳಿಂದ ಮುಳಗಡೆಗೊಂಡಿದ್ದ ಹೊರನಾಡು-ಕಳಸ ಸಂಪರ್ಕಿಸುವ ಹೆಬ್ಬಾಳ ಸೇತುವೆ ಭಾನುವಾರ ಬೆಳಗ್ಗೆ ನೀರಿನಿಂದ ಮುಕ್ತವಾಗಿದ್ದು, ವಾಹನ ಸಂಚಾರ ಆರಂಭಗೊಂಡಿದೆ.
ಸೇತುವೆಯಿಂದ ಸುಮಾರು 3 ಅಡಿ ಕೆಳಭಾಗದಲ್ಲಿ ನೀರು ಹರಿಯಲಾರಂಭಿಸಿದೆ. ಕುದುರೇಮುಖ, ಕಳಸ, ಮೂಡಿಗೆರೆ ಹಾಗೂ ಚಾರ್ಮಾಡಿ ಭಾಗದಲ್ಲೂ ಮಳೆ ಅಬ್ಬರ ಕ್ಷೀಣಿಸಿದೆ.
ವರುಣ ಕೊಂಚ ಬಿಡುವು ನೀಡುತ್ತಿದ್ದಂತೆ ಮಲೆನಾಡಿನ ಕೆಲವೆಡೆ ಕೃಷಿ ಕಾರ್ಯಗಳು ಚುರುಕುಗೊಂಡಿವೆ. ಜಮೀನಿಗಿಳಿದ ರೈತರು ಭತ್ತದ ನಾಟಿ ಮತ್ತು ಉಳುಮೆ ಕಾರ್ಯದಲ್ಲಿ ತೊಡಗಿದ್ದಾರೆ. ನಾಲ್ಕುದಿನಗಳಿಂದ ಕಂಗಾಲಾಗಿದ್ದ ರೈತರು ನಿಟ್ಟುಸಿರು ಬಿಟ್ಟಿದ್ದಾರೆ. ಶೃಂಗೇರಿ ತಾಲ್ಲೂಕಿನ ಕ್ಯಾಸಲೂರಿನಲ್ಲಿ ಕೃಷಿಗಿಳಿದ ಅಜ್ಜನೊಂದಿಗೆ ಬಾಲಕನೂ ಭಾಗಿಯಾಗಿ ಗಮನ ಸೆಳೆದಿದ್ದಾನೆ.
ನಾಲ್ಕೈದು ದಿನ ಮಳೆ ಅಬ್ಬರಿಸಿದ ಹಿನ್ನೆಲೆಯಲ್ಲಿ ಕಾಫಿ ಬೆಳೆಗೆ ಭಾರೀ ನಷ್ಟ ಉಂಟಾಗಿದೆ. ಮಳೆ ಬಿಡುವು ನೀಡಿದ ನಂತರವೂ ತೇವಾಂಶ ಹೆಚ್ಚಾದ ಕಾರಣ ಕಾಫಿ ಬೆಳೆ ನೆಲಕ್ಕುದುರುತ್ತಿದೆ. ಮೂಡಿಗೆರೆ ತಾಲ್ಲೂಕಿನ ಕೊಟ್ಟಿಗೆಹಾರ ಸುತ್ತಮುತ್ತಲಿನ ತೋಟಗಳಲ್ಲಿ ಕಾಫಿ ಫಸಲು ದೊಡ್ಡ ಪ್ರಮಾಣದಲ್ಲಿ ನೆಲಕ್ಕುದುರಿ ನಷ್ಟ ಸಂಭವಿಸಿದೆ.
ಕಳಸ ಸಮೀಪದ ಕೋಟೆ ಹೊಳೆ ಸೇತುವೆ ಮಳೆಯಿಂದ ಹಾನಿಗೀಡಾಗಿದೆ. ಈ ಹಿನ್ನೆಲೆಯಲ್ಲಿ ವಾಹನ ಸಂಚಾರ ಸ್ಥಗಿತಗೊಂಡಿದೆ. ಭಾನುವಾರ ಲೋಕೋಪಯೋಗಿ ಇಲಾಖೆ ಕಾರ್ಯಪಾಲಕ ಇಂಜಿನೀಯರ್ ಭೇಟಿ ನೀಡಿ ಪರಿಶೀಲಿಸಿದ್ದು, ತಕ್ಷಣ ಸೇತುವೆ ದುರಸ್ತಿಪಡಿಸಿ ಸಂಚಾರಕ್ಕೆ ಅನುವು ಮಾಡಿಕೊಡಲಾಗುವುದು ಎಂದು ತಿಳಿಸಿದ್ದಾರೆ.

ಈ ಸುದ್ದಿ ಇತರರೊಂದಿಗೂ ಹಂಚಿಕೊಳ್ಳಿ

Whatsapp Group
Telegram

Latest Posts

Don't Miss