ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌
ಅಮೆರಿಕದಾದ್ಯಂತ ಆವರಿಸಿರುವ ಕ್ರೂರ ಶೀತ ಚಂಡಮಾರುತವು ಕ್ರಿಸ್ಮಸ್ ದಿನದಂದೇ ಲಕ್ಷಾಂತರ ಅಮೆರಿಕನ್ನರಿಗೆ ಕಣ್ಣೀರು ಹಾಕಿಸಿದೆ. ಪೂರ್ವ ಅಮೆರಿಕ ಭಾಗವು ತೀವ್ರ ಹಿಮ ಮತ್ತು ಚಳಿಯಿಂದ ಕೂಡಿದ್ದು, ಈ ಭಾಗಗಳಲ್ಲಿ ಹವಾಮಾನ ವೈಪರಿತ್ಯಕ್ಕೆ ಸಂಬಂಧಿತ ಸಾವುಗಳ ಸಂಖ್ಯೆ 31 ಕ್ಕೆ ತಲುಪಿದೆ.
ಪಶ್ಚಿಮ ನ್ಯೂಯಾರ್ಕ್‌ನ ಬಫಲೋ ನಗರದಲ್ಲಿ ಬಿಕ್ಕಟ್ಟಿನ ಪರಿಸ್ಥಿತಿಯು ಮತ್ತಷ್ಟು ಬಿಗಡಾಯಿಸಿದೆ. ಅಲ್ಲಿ ಹಿಮದ ಬಿರುಗಾಳಿಯು ನಗರವನ್ನೇ ಮುಳುಗಿಸಿದೆ, ತುರ್ತು ಸೇವೆಗಳು ಸಹ ಆ ಪ್ರದೇಶಗಳನ್ನು ತಲುಪಲು ಸಾಧ್ಯವಾಗುತ್ತಿಲ್ಲ. ವಾಹನಗಳಲ್ಲಿ ಮತ್ತು ಹಿಮದ ದಡಗಳ ಅಡಿಯಲ್ಲಿ ಮರಗಟ್ಟಿಟ್ಟಿದ ಮೃತದೇಹಗಳು ಪತ್ತೆಯಾಗಿವೆ.
“ಇದು ಯುದ್ಧ ವಲಯದಂತೆ ಭಾಸವಾಗುತ್ತದೆ. ರಸ್ತೆಗಳ ಬದಿಯಲ್ಲಿರುವ ವಾಹನಗಳ ಸ್ಥಿತಿ ಆಘಾತಕಾರಿಯಾಗಿದೆ” ಎಂದು ನ್ಯೂಯಾರ್ಕ್ ಗವರ್ನರ್ ಕ್ಯಾಥಿ ಹೊಚುಲ್ ಹೇಳಿದ್ದಾರೆ. ನಿವಾಸಿಗಳು ಇನ್ನೂ “ಅತ್ಯಂತ ಅಪಾಯಕಾರಿ ಜೀವ-ಬೆದರಿಕೆಯ ಪರಿಸ್ಥಿತಿ” ಯಲ್ಲಿದ್ದಾರೆ ಮತ್ತು ಈ ಪ್ರದೇಶದಲ್ಲಿ ಯಾರಾದರೂ ಮನೆಯೊಳಗೆ ಇರುವಂತೆ ಅವರು ಎಚ್ಚರಿಕೆ ನೀಡಿದರು. ಬಫಲೋದಲ್ಲಿ ಎಂಟು ಅಡಿ (2.4-ಮೀಟರ್) ಹಿಮದ ರಾಶಿಗಳು ಬಿದ್ದಿವೆ ಎಂದು ಸ್ಥಳಿಯರು ಹೇಳಿದ್ದಾರೆ.
ಪೂರ್ವದ ರಾಜ್ಯಗಳಾದ್ಯಂತ 200,000 ಕ್ಕೂ ಹೆಚ್ಚು ಜನರು ಕ್ರಿಸ್ಮಸ್ ಬೆಳಿಗ್ಗೆ ವಿದ್ಯುತ್ ಇಲ್ಲದೆ ಪರಿತಪಿಸಿದ್ದಾರೆ. ಆದಾಗ್ಯೂ ಹಿಮಪಾತದ ಪರಿಸ್ಥಿತಿಗಳು ಮತ್ತು ಭೀಕರ ಗಾಳಿಯನ್ನು ಒಳಗೊಂಡ ಐದು ದಿನಗಳ ಕಾಲದ ಚಂಡಮಾರುತವು ಸರಾಗಗೊಳ್ಳುತ್ತಿರುವ ಲಕ್ಷಣಗಳನ್ನು ತೋರಿಸಿದೆ.
ಅಮೆರಿಕದಲ್ಲಿ ಘೋರ ಚಳಿಗೆ 31 ಮಂದಿ ಸಾವು
ಈ ಸುದ್ದಿಯನ್ನು ಇತರರ ಜೊತೆಗೂ ಹಂಚಿಕೊಳ್ಳಿ
