ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಸಾಮಾನ್ಯವಾಗಿ ಒಂದು ಮೇಕೆ ಬೆಲೆ ಎಷ್ಟಿರಬಹುದು? ಅಬ್ಬಬ್ಬಾ ಅಂದ್ರೆ ಹತ್ತು ಸಾವಿರ..ಇಪ್ಪತ್ತು ಸಾವಿರ? ಆದರೆ, ಈ ಆಡಿನ ಬೆಲೆ ಕೇಳಿದರೆ ಬೆಚ್ಚಿ ಬೀಳೋದು ಗ್ಯಾರೆಂಟಿ. ಈ ಮೇಕೆಯ ಬೆಲೆ ಅಕ್ಷರಶಃ ರೂ.12 ಲಕ್ಷ ರೂಪಾಯಿ. ನಿಮಗೆ ಶಾಕ್‌ ಆದ್ರೋ ಇದೇ ನಿಜ. ಈ ಮೇಕೆ ಕೋಟಾ ತಳಿಗೆ ಸೇರಿದೆ. ಅದರ ಹೆಸರು ‘ರಾಜ’. ಮಾಲೀಕರು ಅದನ್ನು ಸಾಕಿದ ಪರಿ ಹೇಗಿತ್ತೆಂದರೆ ತೂಕ ಹಾಕಿದ್ರೆ 176 ಕೆಜಿಗ ತೂಗುವಷ್ಟಿದೆ.
ಮಧ್ಯಪ್ರದೇಶದಲ್ಲಿ ಈ ಕೋಟಾ ಮೇಕೆಯನ್ನು 12 ಲಕ್ಷಕ್ಕೆ ಮಾರಾಟ ಮಾಡಲಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಮಧ್ಯಪ್ರದೇಶದ ಇಂದೋರ್ ನ ಸುಹೇಲ್ ಅಹಮದ್ ಎಂಬ ವ್ಯಕ್ತಿ ಎಂಟು ತಿಂಗಳ ಹಿಂದೆ ರಾಜಸ್ಥಾನದಲ್ಲಿ ಈ ಕೋಟಾ ತಳಿಯ ಮೇಕೆಯನ್ನು ಖರೀದಿಸಿದ್ದರು. ಈ ಮೇಕೆಗೆ ಬಲವಾದ ಆಹಾರವನ್ನು ಕೊಟ್ಟು ಚೆನ್ನಾಗಿ ಸಾಕಿದ್ದಾರೆ. ಒಳ್ಳೆಯ ಊಟ ಬಡಿಸುವುದಲ್ಲದೆ ಅದಕ್ಕಾಗಿ ವಿಶೇಷ ಸೌಕರ್ಯಗಳನ್ನೂ ಏರ್ಪಡಿಸಿದ್ದರಂತೆ.
ಕಡಲೆಬೀಜ, ಗೋಧಿ, ಹಾಲು, ಖರ್ಜೂರ ಇತ್ಯಾದಿ ಆಹಾರವನ್ನು ಪ್ರತಿನಿತ್ಯ ನೀಡುತ್ತಿದ್ದರು. ಈ ಮೇಕೆಗೆ ಬೇಸಿಗೆಯ ಬಿಸಿಗೆ ತೊಂದರೆಯಾಗದಂತೆ ಕೂಲರ್‌ಗಳನ್ನು ಕೂಡ ಅಳವಡಿಸಿದರು. ಇದೀಗ ಈ ಮೇಕೆಯನ್ನು ಮುಂಬೈನ ವ್ಯಕ್ತಿಯೊಬ್ಬರು 12 ಲಕ್ಷ ರೂ.ಗೆ ಖರೀದಿಸಿದ್ದಾರೆ. ಕೊಂಡು ತಂದಿದ್ದಕ್ಕೂ ಉತ್ತಮ ಲಾಭ ತಂದುಕೊಟ್ಟಿದೆ ಎಂದು ಮಾಲೀಕರು ಸಂತಸ ವ್ಯಕ್ತಪಡಿಸಿದ್ದಾರೆ.
