ಹೊಸದಿಗಂತ ಡಿಜಿಟಲ್ ಡೆಸ್ಕ್
ತೈವಾನ್ ಸ್ವಾತಂತ್ರ್ಯವನ್ನು ಘೋಷಿಸಿಕೊಂಡರೆ ನಾವು “ಯುದ್ಧವನ್ನು ಪ್ರಾರಂಭಿಸಲು ಹಿಂಜರಿಯುವುದಿಲ್ಲ” ಎಂದು ಚೀನಾದ ರಕ್ಷಣಾ ಸಚಿವ ಅಮೆರಿಕದ ರಕ್ಷಣಾ ಸಚಿವರಿಗೆ ಎಚ್ಚರಿಕೆ ನೀಡಿದ್ದಾರೆ.
ಸಿಂಗಪೂರ್ ದಲ್ಲಿ ನಡೆಯುತ್ತಿರುವ ಶಾಂಗ್ರಿ-ಲಾ ಭದ್ರತಾ ಶೃಂಗಸಭೆಯ ಸಂವಾದದಲ್ಲಿ ಅಮೆರಿಕ-ಚೀನಾ ದೇಶಗಳು ಮುಖಾಮುಖಿಯಾಗಿದ್ದವು. ತೈವಾನ್ ವಿಚಾರವಾಗಿ ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಲಾಯ್ಡ್ ಆಸ್ಟಿನ್ ಅವರೊಂದಿಗೆ ಮಾತುಕತೆ ನಡೆಸಿದ ಚೀನಾ ರಕ್ಷಣಾ ಸಚಿವರು ನೇರ ಎಚ್ಚರಿಕೆ ನೀಡಿದ್ದಾರೆ.
“ಯಾರಾದರೂ ಚೀನಾದಿಂದ ತೈವಾನ್ ಅನ್ನು ವಿಭಜಿಸುವ ಧೈರ್ಯಮಾಡಿದರೆ, ಚೀನಾದ ಸೈನ್ಯವು ಯಾವುದೇ ಬೆಲೆ ತೆತ್ತಾದರೂ ಸರಿ ಯುದ್ಧವನ್ನು ಪ್ರಾರಂಭಿಸಲು ಹಿಂಜರಿಯುವುದಿಲ್ಲ” ಎಂದು ಚೀನಾ ರಕ್ಷಣಾ ಸಚಿವ ವು ಕಿಯಾನ್ ಅವರು ಲಾಯ್ಡ್ ಆಸ್ಟಿನ್ ಅವರನ್ನು ಭೇಟಿಯಾದ ಸಂದರ್ಭದಲ್ಲಿ ಹೇಳಿದ್ದಾರೆ.
ತೈವಾನ್ ಎಂದಿಗೂ ಚೀನಾದ ಭಾಗ. ಅಲ್ಲಿನ ಸ್ವಾತಂತ್ರ್ಯ ಕಥಾವಸ್ತುವನ್ನು ನಾವು ಧ್ವಂಸಗೊಳಿಸುತ್ತೇವೆ. ಚೀನಾದ ಮಾತೃಭೂಮಿಯ ಏಕೀಕರಣವನ್ನು ದೃಢವಾಗಿ ಎತ್ತಿಹಿಡಿಯುತ್ತೇವೆ. ಚೀನಾವನ್ನು ನಿಯಂತ್ರಿಸಲು ತೈವಾನ್ ಅನ್ನು ಬಳಸುವುದು ಎಂದಿಗೂ ಮೇಲುಗೈ ಸಾಧಿಸುವುದಿಲ್ಲ ಎಂದು ಚೀನಾ ಸಚಿವರು ಹೇಳಿದ್ದಾರೆ.
ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಸ್ವ-ಆಡಳಿತ ಹೊಂದಿರುವ ಥೈವಾನ್ ದ್ವೀಪ ನಿರಂತರವಾಗಿ ಚೀನಾದ ಆಕ್ರಮಣದ ಬೆದರಿಕೆ ಎದುರಿಸುತ್ತಿದೆ. ಚೀನಾ ಈ ದ್ವೀಪವನ್ನು ತನ್ನ ಪ್ರದೇಶವೆಂದು ಪರಿಗಣಿಸುತ್ತದೆ ಮತ್ತು ಅಗತ್ಯವಿದ್ದರೆ ಬಲವಂತವಾಗಿ ವಶಪಡಿಸಿಕೊಳ್ಳುವುದಾಗಿ ಪ್ರತಿಜ್ಞೆ ಮಾಡಿದೆ.
ಈ ಸುದ್ದಿಯನ್ನು ಇತರರ ಜೊತೆಗೂ ಹಂಚಿಕೊಳ್ಳಿ