ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಭಾರತದ ಮೊದಲ ಟ್ವಿಟರ್ ಬಳಕೆದಾರ ಕಲಾವಿದೆ, ಛಾಯಾಗ್ರಾಹಕಿ ನೈನಾ ರೆಧು ಅವರು ಬ್ಲ್ಯೂಟಿಕ್ ಪಡೆಯಲು 8 ಅಮೆರಿಕನ್ ಡಾಲರ್(656 ರೂಪಾಯಿ) ಮಾಸಿಕ ಪಾವತಿಗೆ ಆಕ್ಷೇಪಿಸಿದ್ದಾರೆ.
ಟ್ವಿಟರ್ ಖರೀದಿಸಿದ ವಿಶ್ವದ ನಂ.1 ಶ್ರೀಮಂತ ಎಲಾನ್ ಮಸ್ಕ್ ಖಾತೆಯ ಬ್ಲ್ಯೂಟಿಕ್(ಪರಿಶೀಲಿಸಿದ ಖಾತೆ)ಗೆ ಮಾಸಿಕವಾಗಿ 8 ಡಾಲರ್ ಶುಲ್ಕ ವಿಧಿಸಿದ್ದಾರೆ. ಇದಕ್ಕೆ ವಿಶ್ವದಾದ್ಯಂತ ವಿರೋಧ ವ್ಯಕ್ತವಾಗಿದೆ.
ಭಾರತದಲ್ಲೂ ಶೀಘ್ರವೇ ಶುಲ್ಕ ನಿಯಮ ಜಾರಿ ಮಾಡಲು ಉದ್ದೇಶಿಸಿರುವ ಎಲಾನ್ ಮಸ್ಕ್ಗೆ ಭಾರತದ ಮೊದಲ ಟ್ವಿಟರ್ ಖಾತೆ ಪಡೆದ ರಾಜಸ್ಥಾನದ ಜೈಸಲ್ಮೇರ್ನಲ್ಲಿ ಉದ್ಯೋಗಿಯಾಗಿರುವ ನೈನಾ ರೆಧು ಅವರು ಶುಲ್ಕ ಪಾವತಿಗೆ ಆಕ್ಷೇಪವೆತ್ತಿದ್ದಾರೆ. 16 ವರ್ಷಗಳಿಂದ ಖಾತೆ ಬಳಸುತ್ತಿದ್ದು, ಈಗೇಕೆ ಶುಲ್ಕ ಎಂದು ಪ್ರಶ್ನಿಸಿದ್ದಾರೆ.
ಟ್ವಿಟರ್ನಿಂದ 2006 ರಲ್ಲಿ ಮೊದಲ ಬಾರಿಗೆ ನೈನಾ ರೆಧು ಅವರಿಗೆ ಇ-ಮೇಲ್ ಮೂಲಕ ಖಾತೆ ತೆರೆಯಲು ಕೋರಿಕೆ ಬಂದಿತ್ತು. TWTTR ಎಂದಿದ್ದ ಲಿಂಕ್ ಅನ್ನು ಪ್ರವೇಶಿಸಿ ಖಾತೆ ತೆರೆದೆ. ಭಾರತದಲ್ಲಿ ತೆರೆದ ಮೊದಲ ಖಾತೆ ಇದೇ ಆಗುತ್ತದೆ ಎಂದು ನಾನು ಊಹಿಸಿರಲಿಲ್ಲ. ಇದೊಂದು ಕಾಕತಾಳೀಯ ಎಂಬಂತೆ ಮೊದಲ ಬಳಕೆದಾರಳಾದೆ. ಬಳಿಕ ಟ್ವಿಟರ್ ಇಷ್ಟರಮಟ್ಟಿಗೆ ಸಕ್ಸಸ್ ಕಾಣುತ್ತದೆ ಎಂದೂ ನಾನು ಅಂದುಕೊಂಡಿರಲಿಲ್ಲ ಎಂದು ನೈನಾ ಹೇಳಿದ್ದಾರೆ.
ಮುಂಬೈನಲ್ಲಿ ಕೆಲಸ ಮಾಡುತ್ತಿದ್ದ ನಾನು ಆರಂಭದಲ್ಲಿ ಹೆಚ್ಚಾಗಿ ಆಯಪ್ ಬಳಕೆ ಮಾಡುತ್ತಿರಲಿಲ್ಲ. ಬಳಿಕ ಸ್ನೇಹಿತರಿಂದ, ಉದ್ಯೋಗಿಗಳಿಂದ ಸಂದೇಶ ಬರಲಾರಂಭಿಸಿದವು. ಮೊದಲು ನಾನು ಒಂದೂವರೆ ವರ್ಷ ಟ್ವಿಟರ್ ಬಳಕೆ ಮಾಡಿರಲಿಲ್ಲ ಎಂದು ಅವರು ನೆನಪಿಸಿಕೊಂಡಿದ್ದಾರೆ.
ಈವರೆಗೂ 22 ಸಾವಿರ ಅನುಯಾಯಿಗಳನ್ನು ಹೊಂದಿರುವ, 16 ವರ್ಷಗಳಿಂದ 1 ಲಕ್ಷ 75 ಸಾವಿರ ಟ್ವೀಟ್ ಮಾಡಿರುವ ನೈನಾ ಅವರು, ಬ್ಲ್ಯೂಟಿಕ್ ಶುಲ್ಕ ಕುರಿತು ಮಾತನಾಡಿ, ಏಕೆ ಶುಲ್ಕ ವಿಧಿಸಲಾಗುತ್ತಿದೆ ಎಂಬ ಬಗ್ಗೆ ಸ್ಪಷ್ಟತೆಯಿಲ್ಲ. ಶುಲ್ಕ ಪಾವತಿಸಿದ ಬಳಿಕ ಬ್ಲ್ಯೂಟಿಕ್ ಹಾಗೆಯೇ ಉಳಿಯುತ್ತದೆ ಅಥವಾ ಬದಲಾಗುತ್ತದೆಯೇ?. ಈ ಬಗ್ಗೆ ಸ್ಪಷ್ಟತೆ ಸಿಕ್ಕಾಗಿ ಶುಲ್ಕ ಪಾವತಿ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲು ಸಾಧ್ಯವಾಗುತ್ತದೆ. ವ್ಯಕ್ತಿಯ ನಿಜವಾದ ಖಾತೆ ಎಂದು ಪರಿಶೀಲಿಸಲು ಅದಕ್ಕೆ ಹಣವನ್ನೇಕೆ ಪಾವತಿಸಬೇಕು. ಕಳೆದ 16 ವರ್ಷಗಳ ನಂತರ ನಾನು ಈಗ ಏಕೆ ಹಣ ನೀಡಬೇಕು ಎಂದು ಎಲಾನ್ ಮಸ್ಕ್ ನಿರ್ಧಾರವನ್ನು ಪ್ರಶ್ನಿಸಿದ್ದಾರೆ.
