Gardening Tips | ಮನೆಯಲ್ಲಿ ಯಾರು ಇಲ್ಲದೆ ಇರೋವಾಗ ಗಿಡಗಳಿಗೆ ನೀರುಣಿಸೋದು ಹೇಗೆ? ಸುಲಭದ ವಿಧಾನಗಳು ಇಲ್ಲಿವೆ

ನಗರ ಎಂಬ ಕಾಂಕ್ರೀಟ್ ಕಾಡಿನಲ್ಲಿ ಕೊಂಚ ಶಾಂತಿ ನೆಮ್ಮದಿಗಾಗಿ ಮನೆಗಳ ಬಾಗಿಲಿಗೆ ಗಿಡಗಳನ್ನು ಇಡುವುದು ಸಾಮಾನ್ಯ ಹವ್ಯಾಸ. ಪ್ರತಿದಿನವೂ ಸುಂದರ ಸಂತೋಷ ನೀಡುವ ಈ ಸಸ್ಯಗಳು, ಸಹಜವಾಗಿ ನಿತ್ಯ ಆರೈಕೆಯ ಅಗತ್ಯವಿರುತ್ತವೆ. ಆದರೆ ಕೆಲವು ಸಂದರ್ಭಗಳಲ್ಲಿ ಅನಿವಾರ್ಯವಾಗಿ ಮನೆ ಬಿಟ್ಟು ಕೆಲದಿನ ದೂರವಿರುವ ಸಂದರ್ಭ ಉಂಟಾಗುತ್ತದೆ. ಆಗ ಗಿಡಗಳ ಆರೈಕೆ ಹೇಗೆ? ಅವುಗಳಿಗೆ ನೀರು ನೀಡುವುದು ಹೇಗೆ ಎಂಬುದು ಎಲ್ಲರಲ್ಲೂ ಕಾಡುವ ಪ್ರಶ್ನೆ. ಈ ಸಮಸ್ಯೆಗೆ ಸುಲಭ, ಪರಿಣಾಮಕಾರಿಯಾದ ಪರಿಹಾರವಿದೆ.

ಇತ್ತೀಚಿಗೆ ಈ DIY ವಿಧಾನ ಅತೀ ಜನಪ್ರಿಯವಾಗಿದೆ. ಪ್ಲಾಸ್ಟಿಕ್ ಬಾಟಲಿಗೆ ಚಿಕ್ಕದಾದ ತೂತು ಮಾಡಿ, ನೀರು ತುಂಬಿ ಗಿಡದ ಪಕ್ಕ ಇಡಬೇಕು. ಈ ಬಾಟಲಿ ನಿಧಾನವಾಗಿ ನೀರನ್ನು ಹೊರಬಿಡುವ ವ್ಯವಸ್ಥೆಯಾಗಿ ಕಾರ್ಯನಿರ್ವಹಿಸುತ್ತದೆ. ನೀವು ಹೊರಡುವ ಮುನ್ನ ಗಿಡಕ್ಕೆ ನೀರು ಹಾಕಿ, ಬಾಟಲಿಯನ್ನು ಫಿಕ್ಸ್ ಮಾಡಿ. ಇದರಿಂದ ನೀರಿನ ಕೊರತೆ ಆಗದು.

ಮತ್ತೊಂದು ಆಪ್ಷನ್ ನೀರನ್ನು ಹೀರಿಕೊಳ್ಳುವ ಕೊಕೊಪೀಟ್ ಪಾಟ್‌ಗಳು. ತೆಂಗಿನಕಾಯಿ ಸಿಪ್ಪೆಯಿಂದ ತಯಾರಾದ ಈ ಪಾಟ್‌ಗಳು ತೇವಾಂಶ ಉಳಿಸಿಕೊಳ್ಳುತ್ತವೆ. ಇವುಗಳಿಂದ ಮಣ್ಣಿನಲ್ಲಿ ನಿರಂತರ ತಂಪು ವಾತಾವರಣ ಉಳಿಯುತ್ತದೆ.

ಇದೇ ವೇಳೆ ಒದ್ದೆಯಾದ ಬಟ್ಟೆ ಅಥವಾ ಒಣ ಎಲೆಗಳನ್ನು ಗಿಡದ ಸುತ್ತ ಇಟ್ಟು ನೀರೆರೆಸಿದರೂ ಮಣ್ಣಿನ ತೇವ ಉಳಿಯುತ್ತದೆ. ಇನ್ನೊಂದು ವಿಧಾನದಲ್ಲಿ ದೊಡ್ಡ ಟಬ್‌ಗಳಿಗೆ ನೀರು ತುಂಬಿಸಿ, ಪಾಟ್‌ಗಳನ್ನು ಅದರ ಮೇಲೆ ಇಡುವುದು ಕೂಡ ಉತ್ತಮ ಪರಿಹಾರವಾಗಿದೆ.

ಇನ್ನು ಕೊನೆಗೆ, ವಿಶ್ವಾಸದ ವ್ಯಕ್ತಿಗೆ ಗಿಡದ ನೋಡಿಕೊಳ್ಳುವ ಜವಾಬ್ದಾರಿ ನೀಡುವುದು ಹೆಚ್ಚು ಶ್ರೇಷ್ಠ. ಆದರೆ ಆ ಸಾಧ್ಯತೆ ಇಲ್ಲದಿದ್ದರೆ ಮೇಲಿನ ವಿಧಾನಗಳು ಸಹಾಯವಾಗುತ್ತವೆ. ಗಿಡಗಳೆಂದರೆ ಕೇವಲ ಹಸಿರು ಅಲ್ಲ, ಅದು ಮನಸ್ಸಿಗೆ ಸಂತೋಷ ನೀಡುವ ಗೆಳೆಯರಿದ್ದಂತೆ. ಅವರ ಆರೈಕೆಯಲ್ಲಿ ನಿರ್ಲಕ್ಷ್ಯವಾಗದಿರಲಿ.