ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌
ಈ ಬಾರಿ ಆಸ್ಟ್ರೇಲಿಯಾದಲ್ಲಿ ನಡೆದ ಟಿ 20 ವಿಶ್ವಕಪ್‌ ಸೆಮಿ ಫೈನಲ್‌ ನಲ್ಲಿ ಟೀಂ ಇಂಡಿಯಾ ಹೀನಾಯವಾಗಿ ಸೋತ ಬಳಿಕ ಭಾರತೀಯ ಕ್ರಿಕೆಟ್ ನಲ್ಲಿ ಮತ್ತೊಮ್ಮೆ ಬದಲಾವಣೆಯ ಗಾಳಿ ಬೀಸಿದೆ. ಈ ಹಿಂದೆ 2020 ರಲ್ಲಿ ಟೀಂ ಇಂಡಿಯಾ ಯುಎಇ ನಲ್ಲಿ ನಡೆದಿದ್ದ ವಿಶ್ವಕಪ್‌ ನಲ್ಲಿ ಗುಂಪುಹಂತದಲ್ಲೇ ಸೋತು ಹೊರಬಿದ್ದಾಗ ಬೀಸಿದ್ದ ಬದಲಾವಣೆಯ ಗಾಳಿ ವಿರಾಟ್‌ ಕ್ಯಾಪ್ಟನ್ಸಿಯನ್ನು ಕಿತ್ತುಕೊಂಡಿತ್ತು. ಈ ಬಾರಿ ರೋಹಿತ್ ಸರದಿ..
ಟೀಂ ಇಂಡಿಯಾದ ಟಿ20 ತಂಡದಲ್ಲಿ ಮಹತ್ತರ ಬದಲಾವಣೆಗಳನ್ನು ತರಲು ಬಿಸಿಸಿಐ ಸಿದ್ಧತೆ ನಡೆಸಿದೆ. ಈ ನಿಟ್ಟಿನಲ್ಲಿ ಮೊದಲ ಕ್ರಮವಾಗಿ ಕ್ಯಾಪ್ಟನ್ ರೋಹಿತ್ ಶರ್ಮಾ ಅವರನ್ನು ಟಿ20 ನಾಯಕತ್ವದಿಂದ ಕೆಳಗಿಳಿಸಲು ಸಿದ್ಧತೆಗಳು ನಡೆದಿದೆ ಎಂದು ಎನ್‌ ಡಿಟಿವಿ ಇನ್‌ ಸೈಡ್‌ ಸ್ಪೋರ್ಟ್ಸ್‌ ವರದಿ ಮಾಡಿದೆ.
ಕ್ಯಾಪ್ಟನ್ ಬದಲಾವಣೆ ಶೀಘ್ರದಲ್ಲೇ ಘೋಷಣೆ:
ರೋಹಿತ್ ಶರ್ಮಾ ಭಾರತೀಯ ಕ್ರಿಕೆಟ್ ತಂಡದ ಟಿ 20 ನಾಯಕತ್ವವನ್ನು ಕಳೆದುಕೊಳ್ಳುವುದು ಅಂತಿಮವಾಗಿದೆ. ಬಿಸಿಸಿಐ, ಆಯ್ಕೆಗಾರರು ತಂಡದಲ್ಲಿ ಬದಲಾವಣೆಗಳನ್ನು ಮಾಡಲು ಮತ್ತು ಹೊಸ ನಾಯಕತ್ವದಡಿ ತಂಡವನ್ನು ಬೆಳೆಸಲು ಒಮ್ಮತದ ತೀರ್ಮಾನಕ್ಕೆ ಬಂದಿದ್ದಾರೆ. ಬಿಸಿಸಿಐ ಉನ್ನತ ಮೂಲಗಳ ಪ್ರಕಾರ ಇನ್ನು ಕೆಲವೇ ದಿನಗಳಲ್ಲಿ ಆರಂಬಗೊಳ್ಳಿರುವ ಶ್ರೀಲಂಕಾ ಸರಣಿಗೂ ಮುನ್ನ ಹಾರ್ದಿಕ್ ಪಾಂಡ್ಯ ಭಾರತ ತಂಡದ ನೂತನ ನಾಯಕನಾಗಿ ಅಧಿಕೃತವಾಗಿ ಘೋಷಣೆಯಾಗಲಿದ್ದಾರೆ. ಹೀಗಿದ್ದರೂ, ರೋಹಿತ್ ಏಕದಿನ ಮತ್ತು ಟೆಸ್ಟ್ ತಂಡದ ನಾಯಕತ್ವ ಉಳಿಸಿಕೊಳ್ಳಲಿದ್ದಾರೆ. ರೋಹಿತ್ ಶರ್ಮಾಗೆ 2023 ರ ವಿಶ್ವ ಕಪ್ ವರೆಗೆ ನಾಯಕತ್ವವನ್ನು ಉಳಿಸಿಕೊಳ್ಳುವ ಆಯ್ಕೆಯನ್ನು ನೀಡಲಾಗಿದೆ.
ನಾವು 2024ರ ಟಿ20 ವಿಶ್ವಕಪ್‌ಗೆ ನಾವು ಈಗಲೇ ತಯಾರಿ ನಡೆಸಬೇಕಾಗಿದೆ. ಆ ಪಾತ್ರಕ್ಕೆ ಹಾರ್ದಿಕ್ ಸೂಕ್ತ. ಮುಂದಿನ ಟಿ20 ನಿಯೋಜನೆಗೂ ಮುನ್ನ ಆಯ್ಕೆಗಾರರು ಹಾರ್ದಿಕ್ ಅವರನ್ನು ಭೇಟಿಯಾಗಿ ಭಾರತದ ನಾಯಕನನ್ನಾಗಿ ಅಧಿಕೃತವಾಗಿ ಘೋಷಿಸಲಿದ್ದಾರೆ ಎಂದು ಬಿಸಿಸಿಐನ ಉನ್ನತ ಮೂಲಗಳು ಖಚಿತಪಡಿಸಿವೆ.
ಪ್ರಸ್ತುತ ಹಾರ್ದಿಕ್ ಪಾಂಡ್ಯ T20 ನಾಯಕನಾಗಿ ನ್ಯೂಜಿಲೆಂಡ್‌ನಲ್ಲಿ ತಮ್ಮ ಅತಿದೊಡ್ಡ ನಾಯಕತ್ವ ಪರೀಕ್ಷೆಗೆ ಸಿದ್ಧರಾಗಿದ್ದಾರೆ. ಆದರೆ ಫಲಿತಾಂಶದ ಹೊರತಾಗಿಯೂ, ಅವರನ್ನು ಹೊಸ ನಾಯಕ ಎಂದು ಘೋಷಿಸಲಾಗುತ್ತದೆ ಎಂದು ಮೂಲಗಳು ಹೇಳಿವೆ.
ಬಿಸಿಸಿಐ ನಿರ್ಧಾರ ಬಗ್ಗೆ ರೋಹಿತ್ ಶರ್ಮಾ ಗೆ ತಿಳಿದಿದೆಯೇ?
“ಇಲ್ಲ ಇನ್ನೂ ಇಲ್ಲ. ಅವರು ಈಗಷ್ಟೇ ಹಿಂತಿರುಗಿದ್ದಾರೆ. ನಾವು ಶೀಘ್ರದಲ್ಲೇ ಕೋಚ್, ನಾಯಕನನ್ನು ಸಭೆಗೆ ಕರೆದು ನಮ್ಮ ನಿರ್ಧಾರವನ್ನು ಹೇಳುತ್ತೇವೆ” ಎಂದು ಬಿಸಿಸಿಐ ಅಧಿಕಾರಿ ಖಚಿತಪಡಿಸಿದ್ದಾರೆ. ಈ ಮಧ್ಯೆ ರವಿಶಾಸ್ತ್ರಿ, ಹಂಗಾಮಿ ಕೋಚ್ ವಿವಿಎಸ್ ಲಕ್ಷ್ಮಣ್ ಸಹ ಪಾಂಡ್ಯ ಅವರನ್ನು ನಾಯಕತ್ವಕ್ಕೆ ಬೆಂಬಲಿಸಿದ್ದಾರೆ.
ಕ್ಯಾಪ್ಟನ್ಸಿ ರೇಸ್ ನಿಂದ ಹೊರಬಿದ್ದ ಕೆ.ಎಲ್‌.ರಾಹುಲ್, ರಿಷಭ್‌ ಪಂತ್:
ಭವಿಷ್ಯದ ಟಿ20 ನಾಯಕರಿಗಾಗಿ ಸಾಗುತ್ತಿದ್ದ ರೇಸ್ ನಿಂದ ಕೆಎಲ್ ರಾಹುಲ್ ಮತ್ತು ರಿಷಬ್ ಪಂತ್ ಹೊರಬಿದ್ದಿಸದ್ದು, ಹಾರ್ದಿಕ್ ಪಾಂಡ್ಯ ಅವರಿಗೆ ಬೆಂಬಲ ಸಿಕ್ಕಿದೆ. ಏಕದಿನ ಮತ್ತು ಟೆಸ್ಟ್‌ಗಳಿಗೆ ಆದ್ಯತೆ ನೀಡುವ ಮೂಲಕ ಟಿ20ಯಲ್ಲಿ ಕೊಹ್ಲಿಯ ಭವಿಷ್ಯದ ಬಗ್ಗೆಯೂ ಬಿಸಿಸಿಐ ಚರ್ಚಿಸಲಿದೆ. ಜನವರಿವರೆಗೆ ಯಾವುದೇ ಟಿ20 ಸರಣಿ ನಡೆಯದಿರುವುದು ನಾಯಕತ್ವ ಘೋಷಣೆ ವಿಳಂಬಕ್ಕೆ ಕಾರಣವಾಗಿದೆ. ಬಾಂಗ್ಲಾದೇಶ ಪ್ರವಾಸದ ಅಂತ್ಯದ ನಂತರ ಜನವರಿ-ಫೆಬ್ರವರಿ ವಿಂಡೋದಲ್ಲಿ ಭಾರತವು ಶ್ರೀಲಂಕಾ ಮತ್ತು ನ್ಯೂಜಿಲೆಂಡ್‌ಗೆ ಆತಿಥ್ಯ ವಹಿಸಲಿದೆ.
ಟಿ20 ವಿಶ್ವಕಪ್‌ನ ನಿಯೋಜಿತ ಉಪನಾಯಕ ಕೆಎಲ್ ರಾಹುಲ್ ತಮ್ಮ ಪಾತ್ರದಲ್ಲಿ ಉಳಿಯುವ ಸಾಧ್ಯತೆಯಿಲ್ಲ. ಅವರ ಕಳಪೆ ಫಾರ್ಮ್ ಮತ್ತು ಉತ್ತಮ ಆಟದ ವಿಧಾನ ಅನುಸರಿಸಲು ವಿಫಲವಾಗಿರುವುದು ಕಳವಳಕಾರಿ ವಿಷಯವಾಗಿದೆ. ಬಿಸಿಸಿಐ ಅವರಿಂದ ಟಿ20 ಉಪನಾಯಕತ್ವವನ್ನೂ ಕಸಿದುಕೊಳ್ಳುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.
ರಾಹುಲ್ ಫಾರ್ಮ್ ಕಳವಳದ ವಿಚಾರ:
“ನಾವು ಕೆಲವು ಪ್ರಮುಖ ಕರೆಗಳನ್ನು ತೆಗೆದುಕೊಳ್ಳಬೇಕಾಗಿದೆ. ಆದರೆ ನಾವು ಅವುಗಳನ್ನು ತರಾತುರಿಯಲ್ಲಿ ಮಾಡಲು ಸಾಧ್ಯವಿಲ್ಲ. ನಾವು ಒಟ್ಟಿಗೆ ಕುಳಿತು 2024 ರ ವಿಶ್ವಕಪ್‌ನ ಮಾರ್ಗಸೂಚಿಯನ್ನು ಚರ್ಚಿಸುವವರೆಗೆ, ಪ್ರತಿಯೊಬ್ಬರೂ ಆಯ್ಕೆಗೆ ಲಭ್ಯವಿರುತ್ತಾರೆ. ರಾಹುಲ್ ಬಗ್ಗೆ ಹೇಳುವುದಾದರೆ, ಅವರು ಇನ್ನೂ ತಂಡದ ಅಮೂಲ್ಯ ಸದಸ್ಯರಾಗಿದ್ದಾರೆ. ಅವರು ಐಪಿಎಲ್‌ನಲ್ಲಿ ಸಾಬೀತಾದ ದಾಖಲೆ ಹೊಂದಿದ್ದಾರೆ. ಹಾಗಾಗಿ ಟಿ20 ಕ್ರಿಕೆಟ್‌ನಲ್ಲಿ ಅವರು ಏಕಾಏಕಿ ಉತ್ತಮವಾಗಿಲ್ಲ ಎಂದು ಹೇಳಲು ಸಾಧ್ಯವಿಲ್ಲ. ಪ್ರತಿಯೊಬ್ಬ ಫಾರ್ಮ್ ಒಮ್ಮೆ ಕುಸಿತ ಕಾಣುತ್ತದೆ. ಹಾಗೆಂದ ಮಾತ್ರಕ್ಕೆ ನಾವು ಉತ್ತಮ ಆಟಗಾರರನ್ನು ಬಿಟ್ಟುಕೊಡಲು ಸಾಧ್ಯವಿಲ್ಲ ”ಎಂದು ಬಿಸಿಸಿಐ ಅಧಿಕಾರಿ ಹೇಳಿದ್ದಾರೆ.
