ಹೊಸದಿಗಂತ ವರದಿ,ಮಡಿಕೇರಿ:
ರಸ್ತೆಯಲ್ಲಿ ನಡೆದು ಹೋಗುತ್ತಿದ್ದವರನ್ನು ಅಡ್ಡಗಟ್ಟಿ ದರೋಡೆ ಮಾಡಿದ ಆರೋಪದಡಿ ಅಸ್ಸಾಂ ಮೂಲದ ಐವರನ್ನು ವೀರಾಜಪೇಟೆ ಪೊಲೀಸರು ಬಂಧಿಸಿದ್ದಾರೆ.
ಕೇರಳದ ಅನ್ವರ್ ಅವರು ತಮ್ಮ ಸ್ನೇಹಿತರೊಂದಿಗೆ ವೀರಾಜಪೇಟೆ ಹೊರವಲಯದ ಮಗ್ಗುಲದ ಡೆಂಟಲ್ ಕಾಲೇಜು ಬಳಿ ನಡೆದುಕೊಂಡು ಹೋಗುತ್ತಿದ್ದರೆನ್ನಲಾಗಿದೆ.
ಈ ಸಂದರ್ಭ ಆಟೋದಲ್ಲಿ ಬಂದ ಐದು ಮಂದಿಯ ತಂಡ ಅನ್ವರ್ ಹಾಗೂ ಇತರ ಇಬ್ಬರ ಮೇಲೆ ಹಲ್ಲೆ ನಡೆಸಿ ಅವರ ಬಳಿ ಇದ್ದ 37ಸಾವಿರ ರೂ.ಗಳನ್ನು ಕಿತ್ತುಕೊಂಡು ಪರಾರಿಯಾಗಿದ್ದರು.
ಈ ಕುರಿತು ಮಾಹಿತಿ ಪಡೆದ ವೀರಾಜಪೇಟೆ ಪೊಲೀಸರು ಅಸ್ಸಾಂ ಮೂಲದ ಐವರನ್ನು ಬಂಧಿಸಿದ್ದು, ಬಂಧಿತರಿಂದ 4 ಮೊಬೈಲ್‌ ಫೋನ್‌ಗಳು, 31ಸಾವಿರ ರೂ.ನಗದು, ಒಂದು ಚಾಕು, ಒಂದು ಬಿಯರ್‌ ಬಾಟಲಿ, ಒಂದು ಎ.ಟಿ.ಎಂ ಕಾರ್ಡ್ ಹಾಗೂ ಕೃತ್ಯಕ್ಕೆ 2 ಆಟೋ ರಿಕ್ಷಾಗಳನ್ನು ವಶಪಡಿಸಿಕೊಂಡಿದ್ದಾರೆ. ಕೃತ್ಯದಲ್ಲಿ ಸ್ಥಳೀಯರು ಭಾಗಿಯಾಗಿರುವ ಶಂಕೆ ವ್ಯಕ್ತವಾಗಿದ್ದು, ತನಿಖೆ ಮುಂದುವರಿದಿದ್ದಾರೆ.
