Thursday, June 30, 2022

Latest Posts

ಸಮಾಜದ ಘಟಕ ಕುಟುಂಬ, ವ್ಯಕ್ತಿಯಲ್ಲ: ಡಾ. ಮೋಹನ್ ಭಾಗವತ್

ಹೊಸದಿಗಂತ ಡಿಜಿಟಲ್ ಡೆಸ್ಕ್
ಗೋರಖ್‌ಪುರ:
ಕುಟುಂಬವು ಒಟ್ಟುಗೂಡಿದ ಘಟಕವಲ್ಲ, ಅದು ಪ್ರಕೃತಿ ನೀಡಿದ ರಚನೆಯಾಗಿದೆ. ಅದನ್ನು ಸಂರಕ್ಷಿಸುವ, ಕಾಳಜಿವಹಿಸುವ ಜವಾಬ್ದಾರಿ ನಮ್ಮ ಮೇಲಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಸಂಘಚಾಲಕ್ ಡಾ. ಮೋಹನ್ ಭಾಗವತ್ ಹೇಳಿದ್ದಾರೆ.
ಬಾಬಾ ಗಂಭೀರ್‌ನಾಥ್ ಸಭಾಂಗಣದಲ್ಲಿ ಆಯೋಜಿಸಿದ್ದ ಕುಟುಂಬ ಪ್ರಬೋಧನ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ನಮ್ಮ ಸಮಾಜದ ಘಟಕವೆಂದರೆ ಕುಟುಂಬ, ವ್ಯಕ್ತಿಯಲ್ಲ. ಪಾಶ್ಚಿಮಾತ್ಯ ದೇಶಗಳಲ್ಲಿ ವ್ಯಕ್ತಿಯನ್ನು ಒಂದು ಘಟಕವೆಂದು ಪರಿಗಣಿಸಲಾಗುತ್ತದೆ. ಆದರೆ ನಮ್ಮ ದೇಶದಲ್ಲಿ ನಾವು ಒಬ್ಬಂಟಿಯಾಗಿಲ್ಲ. ಭಾಷೆ, ಆಹಾರ, ಭಜನೆ, ಪ್ರವಾಸ, ಭೂಷಣ ಮತ್ತು ಭವನದ ಮೂಲಕ ಕುಟುಂಬದ ಬೇರುಗಳೊಂದಿಗೆ ಸಂಪರ್ಕದಲ್ಲಿರಲು ಸಂದೇಶ ನೀಡಿದರು.
ನನ್ನ ಕುಟುಂಬವು ಆರೋಗ್ಯವಾಗಿರಲಿ, ಸಂತೋಷವಾಗಿರಲಿ. ಇದರೊಂದಿಗೆ ಸಮಾಜವನ್ನು ಆರೋಗ್ಯವಾಗಿ, ಸುಖವಾಗಿಡಲು ಚಿಂತಿಸಬೇಕಿದೆ. ಪರಸ್ಪರ ಸಂಘರ್ಷ ಮಾಡಬೇಡಿ. ನಾವು ನಮ್ಮ ಸ್ವಂತ ಹಿತಾಸಕ್ತಿಗಳನ್ನು ನೋಡಿಕೊಳ್ಳಬೇಕು, ಆದರೆ ಇತರರಿಗೆ ಹಾನಿ ಮಾಡುವ ಬಗ್ಗೆ ನಾವು ಚಿಂತಿಸಬಾರದು. ಇದು ಸನಾತನ ಧರ್ಮ, ಇದು ಮಾನವ ಧರ್ಮ ಮತ್ತು ಇದು ಹಿಂದು ಧರ್ಮ. ಇಡೀ ಜಗತ್ತಿಗೆ ಮೋಕ್ಷವನ್ನು ನೀಡುವ ಧರ್ಮವಾಗಿದೆ ಎಂದರು.
ಮಣಿಪುರದ ಉದಾಹರಣೆ ನೀಡಿದ ಡಾ. ಭಾಗವತ್, ನಾವು ನಮ್ಮ ಸಾಂಪ್ರದಾಯಿಕ ವಸ್ತ್ರಗಳನ್ನು ಕನಿಷ್ಠ ಶುಭ ಸಮಾರಂಭಗಳಲ್ಲಿ ಧರಿಸಬೇಕು. ನಾವು ಏನಾಗಿದ್ದೇವೆ, ನಮ್ಮ ತಂದೆ-ತಾಯಿ ಎಲ್ಲಿಂದ ಬಂದವರು ಎಂಬ ಅರಿವು ನಮಗಿರಬೇಕು. ನಾವು ನಮ್ಮ ಪೂರ್ವಜರ ಆಚಾರ-ವಿಚಾರಗಳನ್ನು ಪಾಲಿಸುತ್ತಿದ್ದೇವೋ ಇಲ್ಲವೋ ಎಂಬ ಯೋಜನೆಯೂ ನಮಗಿರಬೇಕು. ನಾವು ಇಡೀ ಕುಟುಂಬದೊಂದಿಗೆ ಕುಳಿತು ಯೋಚಿಸಬೇಕು. ಅಲ್ಲದೆ, ಮಕ್ಕಳೊಂದಿಗೆ ಮುಕ್ತ ಹೃದಯದಿಂದ ಮಾತನಾಡಬೇಕು. ಜೊತೆಗೆ ಸಮಾಜಕ್ಕೆ ನಾನೇನು ಮಾಡುತ್ತಿದ್ದೇನೆ ಎಂದು ಯೋಚಿಸಬೇಕು ಎಂದು ಹೇಳಿದರು.
ವೇದಿಕೆಯಲ್ಲಿ ಪ್ರಾಂತ ಸಂಘಚಾಲಕ್ ಡಾ.ಪೃಥ್ವಿರಾಜ್ ಸಿಂಗ್, ಸಹ ಸಂಘಚಾಲಕ್ ಡಾ.ಮಹೇಂದ್ರ ಅಗರ್ವಾಲ್ ಉಪಸ್ಥಿತರಿದ್ದರು.

ಈ ಸುದ್ದಿ ಇತರರೊಂದಿಗೂ ಹಂಚಿಕೊಳ್ಳಿ

Whatsapp Group
Telegram

Latest Posts

Don't Miss