ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌ :
ಆಸ್ಟ್ರೇಲಿಯಾದಲ್ಲಿ ಮತ್ತೊಂದು ಹಿಂದೂ ದೇವಾಲಯವನ್ನು ಖಲಿಸ್ತಾನಿ ಬೆಂಬಲಿಗರು ಧ್ವಂಸಗೊಳಿಸಿದ್ದಾರೆ. ಕಳೆದ ಎರಡು ವಾರಗಳಲ್ಲಿ ದೇಶದಲ್ಲಿ ಹಿಂದೂ ದೇವಾಲಯಗಳ ಮೇಲೆ ನಡೆದ ಮೂರನೇ ದಾಳಿ ಇದಾಗಿದೆ.
ಮೆಲ್ಬೋರ್ನ್‌ನ ಆಲ್ಬರ್ಟ್ ಪಾರ್ಕ್‌ನಲ್ಲಿರುವ ಹರೇ ಕೃಷ್ಣ ದೇವಸ್ಥಾನ ಎಂದೂ ಕರೆಯಲ್ಪಡುವ ಇಂಟರ್ನ್ಯಾಷನಲ್ ಸೊಸೈಟಿ ಫಾರ್ ಕೃಷ್ಣ ಕಾನ್ಶಿಯಸ್ನೆಸ್ (ಇಸ್ಕಾನ್) ದೇವಸ್ಥಾನವು ಭಕ್ತಿ ಯೋಗ ಚಳುವಳಿಯ ಪ್ರಸಿದ್ಧ ಕೇಂದ್ರವಾಗಿದೆ. ಈ ದೇವಾಲಯದ ಗೋಡೆಗಳ ಮೇಲೆ “ಹಿಂದುಸ್ತಾನ್ ಮುರ್ದಾಬಾದ್”, “ಖಾಲಿಸ್ತಾನ್ ಜಿಂದಾಬಾದ್” ಎಂಬ ಭಾರತ ವಿರೋಧಿ ಘೋಷಣೆಗಳಿಂದ ಮಸಿ ಬಳಿಯಲಾಗಿದೆ. ಪ್ರಧಾನಿ ನರೇಂದ್ರ ಮೋದಿ ವಿರುದ್ಧದ ದ್ವೇಷದ ಮಾತುಗಳನ್ನು ಗೋಡೆಗಳ ಮೇಲೂ ಬರೆಯಲಾಗಿದೆ.
ಖಲಿಸ್ತಾನ್ ಬೆಂಬಲಿಗರು 20,000 ಕ್ಕೂ ಹೆಚ್ಚು ಹಿಂದೂಗಳು ಮತ್ತು ಸಿಖ್ಖರನ್ನು ಕೊಂದ ಭಯೋತ್ಪಾದಕ ಭಿಂದ್ರಾವಾಲಾ ಅವರನ್ನು ಹೊಗಳಿದ್ದಾರೆ. ಅವರನ್ನು ‘ಹುತಾತ್ಮ’ ಎಂದು ಕರೆದಿದ್ದಾರೆ. ಹಿಂದಿನ ಘಟನೆಗಳಲ್ಲಿಯೂ ಇದೇ ರೀತಿಯ ಘೋಷಣೆಗಳನ್ನು ದೇವಾಲಯದ ಗೋಡೆಗಳ ಮೇಲೆ ಬರೆಯಲಾಗಿತ್ತು.
ಈ ಹಿಂದೆ ಕ್ಯಾರಂ ಡೌನ್ಸ್‌ನಲ್ಲಿರುವ ಶ್ರೀ ಶಿವ ವಿಷ್ಣು ದೇವಸ್ಥಾನ ಮತ್ತು ಮಿಲ್ ಪಾರ್ಕ್‌ನಲ್ಲಿರುವ ಬಿಎಪಿಎಸ್ ಸ್ವಾಮಿನಾರಾಯಣ ಮಂದಿರದಲ್ಲಿ ಹಿಂದೂಗಳು ಮತ್ತು ಭಾರತದ ವಿರುದ್ಧ ದ್ವೇಷದ ಸಂದೇಶಗಳನ್ನು ಹರಡಲಾಗಿತ್ತು. ಹಿಂದೂ ದೇವಾಲಯಗಳ ಮೇಲಿನ ದಾಳಿಗಳ ಸರಣಿಯು ದೇಶದಲ್ಲಿ ಹಿಂದೂಫೋಬಿಯಾಕ್ಕೆ ಅಂತ್ಯವಿಲ್ಲದೇ ವ್ಯಾಪಕ ಕಳವಳವನ್ನು ಉಂಟುಮಾಡಿದೆ.
ದಾಳಿಯ ನಂತರ ಭಾರತದಲ್ಲಿನ ಆಸ್ಟ್ರೇಲಿಯಾದ ಹೈಕಮಿಷನರ್ ಘಟನೆಗಳ ಬಗ್ಗೆ ಆಘಾತ ವ್ಯಕ್ತಪಡಿಸಿದ್ದಾರೆ ಮತ್ತು ಅಧಿಕಾರಿಗಳು ಘಟನೆಯ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ ಎಂದು ಒತ್ತಿ ಹೇಳಿದರು. “ಆಸ್ಟ್ರೇಲಿಯಾ ಒಂದು ಹೆಮ್ಮೆಯ, ಬಹುಸಂಸ್ಕೃತಿಯ ದೇಶ” ಎಂದು ಹೇಳಿದ್ದ ಅವರು, ಮೆಲ್ಬೋರ್ನ್‌ನಲ್ಲಿ ಹಿಂದೂ ದೇವಾಲಯಗಳ ಧ್ವಂಸವು ತಮ್ಮನ್ನು ಬೆಚ್ಚಿಬೀಳಿಸಿದೆ ಎಂದು ಹೇಳಿದರು. “ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ನಮ್ಮ ಬಲವಾದ ಬೆಂಬಲವು ದ್ವೇಷ ಭಾಷಣ ಅಥವಾ ಹಿಂಸೆಯನ್ನು ಒಳಗೊಂಡಿಲ್ಲ” ಎಂದು ಅವರು ಹೇಳಿದರು.
ಭಾರತ ಮತ್ತು ಆಸ್ಟ್ರೇಲಿಯಾ ಸರ್ಕಾರಗಳು ಈ ವಿಷಯವನ್ನು ಚರ್ಚಿಸಿವೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (ಎಂಇಎ) ವಕ್ತಾರ ಅರಿಂದಮ್ ಬಾಗ್ಚಿ ಹೇಳಿದ್ದಾರೆ. “ನಾವು ಈ ಕ್ರಮಗಳನ್ನು ಬಲವಾಗಿ ಖಂಡಿಸಿದ್ದೇವೆ” ಎಂದು ಅವರು ಹೇಳಿದರು. ಮೆಲ್ಬೋರ್ನ್‌ನಲ್ಲಿರುವ ಭಾರತೀಯ ಕಾನ್ಸುಲೇಟ್ ಜನರಲ್ ಸ್ಥಳೀಯ ಪೊಲೀಸರೊಂದಿಗೆ ಸಮಸ್ಯೆಯನ್ನು ಎತ್ತಿದ್ದಾರೆ.
ಜನವರಿ 11 ರಂದು ಆಸ್ಟ್ರೇಲಿಯಾದ ಮಿಲ್ ಪಾರ್ಕ್‌ನಲ್ಲಿರುವ BAPS ಸಂಸ್ಥಾ ಮಂದಿರವನ್ನು ಭಾರತ ವಿರೋಧಿ ಮತ್ತು ಹಿಂದೂ ವಿರೋಧಿ ಗೀಚುಬರಹದಿಂದ ಲೇಪಿಸಿದ ನಂತರ ಪ್ರತಿಕ್ರಿಯೆ ಬಂದಿದೆ. ದಾಳಿಕೋರರು ಗೋಡೆಗಳ ಮೇಲೆ “ಹಿಂದೂಸ್ತಾನ್ ಮುರ್ದಾಬಾದ್”, “ಮೋದಿ ಹಿಟ್ಲರ್” ಘೋಷಣೆಗಳನ್ನು ಚಿತ್ರಿಸಿದ್ದಾರೆ.
ಕ್ಯಾರಮ್ ಡೌನ್ಸ್‌ನಲ್ಲಿರುವ ಎರಡನೇ ಹಿಂದೂ ದೇವಾಲಯವಾದ ಶ್ರೀ ಶಿವ ವಿಷ್ಣು ಮಂದಿರವನ್ನು ಜನವರಿ 17 ರಂದು ಗೀಚುಬರಹದಿಂದ ಧ್ವಂಸಗೊಳಿಸಲಾಯಿತು. ಈ ಘಟನೆಯು ಜನವರಿ 15-16 ರ ಮಧ್ಯರಾತ್ರಿಯ ಸಮಯದಲ್ಲಿ ಸಂಭವಿಸಿದೆ ಎಂದು ವರದಿಯಾಗಿದೆ ಮತ್ತು ಜನವರಿ 18 ರಂದು ಪೊಲೀಸರಿಗೆ ವರದಿಯಾಗಿದೆ.
