ಹೊಸದಿಗಂತ ಡಿಜಿಟಲ್‌ ಡೆಸ್ಕ್: (ಸ್ವಾತಂತ್ರ್ಯೋತ್ಸವದ ಅಮೃತ ಮಹೋತ್ಸವ ವಿಶೇಷ)
ಅತುಲ್ ಚಂದ್ರ ಗೋಷ್ ಅವರು 1881 ರಲ್ಲಿ ಪಶ್ಚಿಮ ಬಂಗಾಳದ ಬರ್ಧಮಾನ್ ಜಿಲ್ಲೆಯ ಖಂಡಘೋಷ್ ಗ್ರಾಮದಲ್ಲಿ ಜನಿಸಿದರು. 1908 ರಲ್ಲಿ ತಮ್ಮ ಕಾನೂನು ಪದವಿಯಲ್ಲಿ ಉತ್ತೀರ್ಣರಾಗಿ ಪುರುಲಿಯಾದಲ್ಲಿ ಕಾನೂನಿನ ಅಭ್ಯಾಸದಲ್ಲಿ ತೊಡಗಿದರು. 1920ರಲ್ಲಿ ಗಾಂಧೀಜಿಯವರ ಅಸಹಕಾರ ಚಳುವಳಿಯಿಂದ ಪ್ರಭಾವಿತರಾಗಿ ತಮ್ಮ ವಕೀಲ ವೃತ್ತಿ ತೊರೆದು ಸ್ವಾತಂತ್ರ್ಯ ಹೋರಾಟಕ್ಕೆ ಧುಮುಕಿದರು.
ಅತುಲ್ ಚಂದ್ರ ಘೋಷ್ ಅವರ ಮಾವ ನಿಬಾರನ್ ಚಂದ್ರ ದಾಸ್ಗುಪ್ತ ಅವರು ಮಂಭುಮ್‌ನಲ್ಲಿ ಸ್ವಾತಂತ್ರ್ಯ ಹೋರಾಟದ ನೇತೃತ್ವ ವಹಿಸಿದ್ದರು. ನಿಬಾರನ್ ಚಂದ್ರ ದಾಸ್‌ಗುಪ್ತರನ್ನು ಅಸಹಕಾರ ಚಳವಳಿಯ ಸಂದರ್ಭದಲ್ಲಿ ಬಂಧಿಸಲಾಯಿತು. ಬಿಡುಗಡೆಯಾದ ನಂತರ, ಅವರು ಅತುಲ್ ಚಂದ್ರರೊಂದಿಗೆ ಕೈಜೋಡಿಸಿ ಶಿಲ್ಪಾಶ್ರಮ ಎಂಬ ತಳಮಟ್ಟದ ಸಂಘಟನೆಯನ್ನು ಸ್ಥಾಪಿಸಿದರು, ಅದು ಮಂಭುಮ್ ಜಿಲ್ಲೆಯಲ್ಲಿ ಸ್ವಾತಂತ್ರ್ಯ ಹೋರಾಟದ ಕೇಂದ್ರಬಿಂದುವಾಯಿತು.
ಬ್ರಿಟೀಷ್ ಸರ್ಕಾರವು 1856 ರಲ್ಲಿ ಗ್ರಾಮ ಚೌಕಿದಾರಿ ಕಾಯಿದೆಯನ್ನು ಪರಿಚಯಿಸಿತು, ಹಳ್ಳಿಗರಿಗೆ ರಾತ್ರಿ-ಕಾವಲುಗಾರ ಸೇವೆಯನ್ನು ಒದಗಿಸುವುದಕ್ಕಾಗಿ ತೆರಿಗೆಯನ್ನು ಸಂಗ್ರಹಿಸಿತು. ಚೌಕಿದಾರರು ಬ್ರಿಟಿಷ್ ಸರ್ಕಾರದ ಗೂಢಚಾರರಾಗಿ ಮತ್ತು ಸ್ಥಳೀಯ ಜಮೀನ್ದಾರರಿಗೆ ವಿಧೇಯರಾಗಿರುತ್ತಿದ್ದರು ಇದು ಹಳ್ಳಿಗರಿಗೆ ಇಷ್ಟವಾಗಲಿಲ್ಲ. ಉಪ್ಪಿನ ಕಾನೂನುಗಳನ್ನು ಮುರಿಯಲು 1930 ರಲ್ಲಿ ಮಹಾತ್ಮಾ ಗಾಂಧಿಯವರು ಪ್ರಾರಂಭಿಸಿದ ನಾಗರಿಕ ಅಸಹಕಾರ ಚಳವಳಿಯು ಪೂರ್ವ ಭಾರತದಲ್ಲಿ ಬೆಂಬಲವನ್ನು ಪಡೆಯಿತು. ಏಪ್ರಿಲ್ 8, 1930 ರಂದು ರಾಷ್ಟ್ರೀಯ ನಾಗರಿಕ ಅಸಹಕಾರ ಚಳವಳಿಯ ಭಾಗವಾಗಿ ರಾಂಚಿಯಲ್ಲಿ ಬೃಹತ್ ಸಭೆಯನ್ನು ಆಯೋಜಿಸಲಾಯಿತು, ಅಲ್ಲಿ ಮಂಭುಮ್ ಜಿಲ್ಲಾ ಸತ್ಯಾಗ್ರಹ ಸಮಿತಿಯ ಕಾರ್ಯದರ್ಶಿ ಅತುಲ್ ಚಂದ್ರ ಘೋಷ್ ಅವರು ಚೌಕಿದಾರಿ ತೆರಿಗೆಯನ್ನು ಪಾವತಿಸುವುದನ್ನು ನಿಲ್ಲಿಸುವಂತೆ ಜನರಿಗೆ ಕರೆ ನೀಡಿದರು. ಈ ‘ಚೌಕಿದಾರಿ ತೆರಿಗೆ ಬೇಡ’ ಅಭಿಯಾನವು ಅಂತಿಮವಾಗಿ ಚೌಕಿದಾರರನ್ನು ರಾಜೀನಾಮೆ ನೀಡುವಂತೆ ಮಾಡಿತು.ನಾಗರಿಕ ಅಸಹಕಾರ ಚಳವಳಿಯ ಹಿನ್ನೆಲೆಯಲ್ಲಿ, ಚಳವಳಿಯೊಂದಿಗೆ ಸಂಬಂಧ ಹೊಂದಿದ್ದ ಮಂಭೂಮ್‌ನ ಹಲವಾರು ನಾಯಕರನ್ನು ಬಂಧಿಸಲಾಯಿತು. ಅವರ ಬಿಡುಗಡೆಯ ನಂತರ, ಈ ನಾಯಕರು ಲೋಕ ಸೇವಕ ಸಂಘ (LSS) ವನ್ನು ಸ್ಥಾಪಿಸಿದರು, ಇದು ಈ ಪ್ರದೇಶದ ಅಸ್ಪೃಶ್ಯರು ಮತ್ತು ಬುಡಕಟ್ಟು ಜನರನ್ನು ಉನ್ನತೀಕರಿಸುವ ಗುರಿಯನ್ನು ಹೊಂದಿತ್ತು.
ಅತುಲ್ ಚಂದ್ರ ಘೋಷ್ LSS ನ ನಾಯಕರಾಗಿದ್ದರು ಮತ್ತು ಜಿಲ್ಲಾ ಕಾಂಗ್ರೆಸ್ ಸಮಿತಿಯ ನಾಯಕರಲ್ಲಿ ಒಬ್ಬರಾಗಿದ್ದರು. 9 ಆಗಸ್ಟ್ 1942 ರಂದು, ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ಕ್ವಿಟ್ ಇಂಡಿಯಾ ಚಳುವಳಿಯನ್ನು ಪ್ರಾರಂಭಿಸಿತು. ಮಂಭುಮ್ ಜಿಲ್ಲಾ ಕಾಂಗ್ರೆಸ್ ಸಮಿತಿಯ ಭಾಗವಾಗಿದ್ದ LSS ನ ಕಾರ್ಯಕರ್ತರನ್ನು ತಕ್ಷಣವೇ ಬಂಧಿಸಲಾಯಿತು ಮತ್ತು ಅವರ ಕಚೇರಿಯನ್ನು ಬ್ರಿಟಿಷ್ ಸರ್ಕಾರವು ಸೀಲ್ ಮಾಡಿತು. ಅಖಿಲ ಭಾರತ ಕಾಂಗ್ರೆಸ್ ಸಮಿತಿ ಸಭೆಯಲ್ಲಿ ಭಾಗವಹಿಸಿ ವಾಪಸ್ಸಾದ ನಂತರ ಅವರ ಪತ್ನಿ ಹಾಗೂ ಮಗಳೊಂದಿಗೆ ಘೋಷ್ ಅವರನ್ನು ಬಂಧಿಸಲಾಯಿತು.
ಭಾರತವು 1947 ರಲ್ಲಿ ಸ್ವಾತಂತ್ರ್ಯ ಪಡೆದ ನಂತರ, ಹೆಚ್ಚಿನ ಬಂಗಾಳಿ ಮಾತನಾಡುವ ಜನಸಂಖ್ಯೆಯನ್ನು ಹೊಂದಿದ್ದ ಮಂಭುಮ್ ಜಿಲ್ಲೆಯನ್ನು ಬಿಹಾರ ರಾಜ್ಯದ ಭಾಗವಾಗಿ ಮಾಡಲಾಯಿತು. ಕಾಂಗ್ರೆಸ್ ಜಿಲ್ಲಾ ಸಮಿತಿಯ ಅಧ್ಯಕ್ಷರಾಗಿ, ಅತುಲ್ ಚಂದ್ರ ಘೋಷ್ ಅವರು ಪಶ್ಚಿಮ ಬಂಗಾಳಕ್ಕೆ ಮಂಭುಮ್ ಅನ್ನು ಸೇರಿಸುವ ನಿರ್ಣಯವನ್ನು ಮಂಡಿಸಿದರು. ಅವರ ಪ್ರಸ್ತಾಪವನ್ನು ತಿರಸ್ಕರಿಸಲಾಯಿತು, ನಂತರ ಅವರು ಕಾಂಗ್ರೆಸ್ ಪಕ್ಷಕ್ಕೆ ರಾಜೀನಾಮೆ ನೀಡಿದರು. 1948 ರಲ್ಲಿ, ಅತುಲ್ ಚಂದ್ರ ಗೋಷ್, ಬಿಭೂತಿ ದಾಸ್ಗುಪ್ತ, ಮತ್ತು ಇತರರು LSS ಅನ್ನು ಸಾಮಾಜಿಕ ಸುಧಾರಣಾ ಸಂಘಟನೆಯಿಂದ ಪೂರ್ಣ ಪ್ರಮಾಣದ ರಾಜಕೀಯ ಪಕ್ಷವಾಗಿ ಪರಿವರ್ತಿಸಿದರು, ಪಶ್ಚಿಮ ಬಂಗಾಳದಲ್ಲಿ ಮಂಭುಮ್ ಸೇರ್ಪಡೆಗಾಗಿ ಸಾಮೂಹಿಕ ಚಳುವಳಿಯನ್ನು ನಡೆಸಿದರು.
ಎಲ್‌ಎಸ್‌ಎಸ್‌ನ ಅಧ್ಯಕ್ಷ ಅತುಲ್ ಚಂದ್ರ ಘೋಷ್ ಅವರು ಜಿಲ್ಲೆಯಾದ್ಯಂತ ‘ಭಾಸ ಸತ್ಯಾಗ್ರಹ’ವನ್ನು ಸಂಘಟಿಸಿದರು ಮತ್ತು ನಂತರ ‘ಬಂಗಾ ಸತ್ಯಾಗ್ರಹ ಅಭಿಜನ್’ ಎಂಬ ಸುದೀರ್ಘ ಮೆರವಣಿಗೆಯನ್ನು ಆಯೋಜಿಸಿದರು. ಆರಂಭದಲ್ಲಿ ತಮ್ಮ ಮಾವ ಆರಂಭಿಸಿದ ‘ಮುಕ್ತಿ’ ಪತ್ರಿಕೆಯ ಸಂಪಾದಕರೂ ಆದರು ಮತ್ತು ಅದನ್ನು ಬಂಗ ಸತ್ಯಾಗ್ರಹದ ಧ್ವನಿಯಾಗಿಸಿದರು. LSS ನ ಪ್ರಯತ್ನಗಳ ಫಲವಾಗಿ ಅಂತಿಮವಾಗಿ 1953 ರಲ್ಲಿ ರಾಜ್ಯಗಳ ಮರುಸಂಘಟನೆ ಆಯೋಗವು ಅವರ ಬೇಡಿಕೆಗಳನ್ನು ಅಂಗೀಕರಿಸಿತು ಮತ್ತು ಪುರುಲಿಯ ಎಂಬ ಹೊಸ ಜಿಲ್ಲೆಯನ್ನು 1 ನವೆಂಬರ್ 1956 ರಂದು ಮಂಭುಮ್ನಿಂದ ಬೇರ್ಪಡಿಸಿ ಪಶ್ಚಿಮ ಬಂಗಾಳದ ಭಾಗವನ್ನಾಗಿಸಲಾಯಿತು.
ಆಂದೋಲನಕ್ಕೆ ಅವರ ಪಾತ್ರ ಮತ್ತು ಕೊಡುಗೆಗಾಗಿ, ಅತುಲ್ ಚಂದ್ರ ಘೋಷ್ ಅವರಿಗೆ ‘ಮಂಭುಂ ಕೇಸರಿ’ ಎಂಬ ಬಿರುದು ನೀಡಲಾಯಿತು. ಅವರು 1969 ರಲ್ಲಿ ನಿಧನರಾದರು, ಸಾಮಾಜಿಕ ಸುಧಾರಣೆಗಳು ಮತ್ತು ಪ್ರಗತಿಪರ ರಾಜಕೀಯದ ಪರಂಪರೆಯನ್ನು ಬಿಟ್ಟುಹೋದರು. ಸ್ವಾತಂತ್ರ್ಯ ಹೋರಾಟಗಾರ್ತಿಯೂ ಆಗಿದ್ದ ಅವರ ಪತ್ನಿ ಲಾಬಣ್ಯ ಪ್ರಭಾ ಘೋಷ್ ಅವರ ಮರಣಾನಂತರ ಮುಕ್ತಿಯ ಸಂಪಾದಕರಾಗಿ ಮುಂದುವರಿದರು.
