ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಚೀನಾದಲ್ಲಿ ಕೋವಿಡ್ ತಾಂಡವ ಹೆಚ್ಚುತ್ತಲೇ ಇದೆ. ಇತ್ತೀಚೆಗಷ್ಟೇ ಚೀನಾ ತನ್ನ ಶೂನ್ಯ ಕೋವಿಡ್ ನಿರ್ಬಂಧಗಳನ್ನು ತೆಗದುಹಾಕಿದ್ದು ಇದರ ಬೆನ್ನಲ್ಲೇ ದೇಶದಲ್ಲಿ ಏಕಾಏಕಿ ಕೋವಿಡ್ ಉಲ್ಬಣಿಸಿದೆ. ಪೂರ್ವಚೀನಾ ಭಾಗದ ಝೆಜಿಯಾಂಗ್ ಪ್ರಾಂತ್ಯದಲ್ಲಿ ದಿನಕ್ಕೆ ಒಂದು ಮಿಲಿಯನ್ ಕೋವಿಡ್ ಪ್ರಕರಣಗಳು ದಾಖಲಾಗುತ್ತಿದ್ದು ಮುಂದಿನ ದಿನಗಳಲ್ಲಿ ಈ ಸಂಖ್ಯೆ ದ್ವಿಗುಣಗೊಳ್ಳುವ ನಿರೀಕ್ಷೆಯಿದೆ ಎಂದು ಪ್ರಾಂತೀಯ ಸರ್ಕಾರ ಭಾನುವಾರ ತಿಳಿಸಿದೆ ಎಂದು ಮೂಲಗಳು ವರದಿ ಮಾಡಿವೆ.
ದೇಶವ್ಯಾಪಿಯಾಗಿ ಕೋವಿಡ್ ಪ್ರಕರಣಗಳ ದಾಖಲೆಯ ಉಲ್ಬಣದ ಹೊರತಾಗಿಯೂ, ಶನಿವಾರದಿಂದ ಐದು ದಿನಗಳವರೆಗೆ ಮುಖ್ಯ ಭೂಭಾಗದಲ್ಲಿ ಯಾವುದೇ COVID ಸಾವುಗಳನ್ನು ವರದಿಯಾಗಿಲ್ಲ ಎಂದು ಚೀನಾದ ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರವು ಭಾನುವಾರ ತಿಳಿಸಿದೆ ಎಂದು ಮೂಲಗಳ ವರದಿ ಉಲ್ಲೇಖಿಸಿದೆ. ಸೋಂಕುಗಳು ಹೆಚ್ಚಾಗುತ್ತಿದ್ದಂತೆ ನಾಗರಿಕರು ಮತ್ತು ತಜ್ಞರು ಹೆಚ್ಚು ನಿಖರವಾದ ಡೇಟಾವನ್ನು ಕೇಳುತ್ತಿದ್ದಾರೆ, ಆದರೆ ಚೀನಾ ಈ ಕುರಿತು ನಿಖರ ಪ್ರಕರಣಗಳನ್ನು ವರದಿ ಮಾಡುತ್ತಿಲ್ಲ. ರಾಷ್ಟ್ರೀಯ ಆರೋಗ್ಯ ಆಯೋಗವು ಲಕ್ಷಣರಹಿತ ಸೋಂಕುಗಳನ್ನು ವರದಿ ಮಾಡುವುದನ್ನು ನಿಲ್ಲಿಸಿದ್ದರಿಂದ ಚೀನಾದ ರಾಷ್ಟ್ರವ್ಯಾಪಿ ಅಂಕಿಅಂಶಗಳು ಅಪೂರ್ಣವಾಗಿವೆ.
“ಸೋಂಕಿನ ಉತ್ತುಂಗವು ಝೆಜಿಯಾಂಗ್‌ಗೆ ಮುಂಚೆಯೇ ಆಗಮಿಸುತ್ತದೆ ಮತ್ತು ಹೊಸ ವರ್ಷದ ದಿನದಂದು ಕೋವಿಡ್ ಪ್ರಕರಣಗಳ ಸಂಖ್ಯೆ ಉತ್ತುಂಗಕ್ಕೇರಲಿದೆ ಎಂದು ಅಂದಾಜಿಸಲಾಗಿದೆ, ಈ ಸಮಯದಲ್ಲಿ ದೈನಂದಿನ ಹೊಸ ಸೋಂಕಿನ ಸಂಖ್ಯೆ 2 ಮಿಲಿಯನ್‌ನಷ್ಟಿರುತ್ತದೆ” ಎಂದು ಝೆಜಿಯಾಂಗ್ ಸರ್ಕಾರ ಹೇಳಿಕೆಯಲ್ಲಿ ತಿಳಿಸಿದೆ.
ಬೀಜಿಂಗ್ ತನ್ನ ನಿರ್ಬಂಧಗಳನ್ನು ಸಡಿಲಿಸಿದ ನಂತರ ವಿಶ್ವ ಆರೋಗ್ಯ ಸಂಸ್ಥೆಯು ಹೊಸ ಕೋವಿಡ್ ಆಸ್ಪತ್ರೆಗಳ ಕುರಿತು ಚೀನಾದಿಂದ ಯಾವುದೇ ಡೇಟಾವನ್ನು ಸ್ವೀಕರಿಸಿಲ್ಲ. ವಿಶ್ವದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶದಲ್ಲಿ ಪ್ರಕರಣಗಳನ್ನು ಲೆಕ್ಕಹಾಕಲು ಅಧಿಕಾರಿಗಳು ಹೆಣಗಾಡುತ್ತಿರುವುದೇ ಡೇಟಾ ಅಂತರಕ್ಕೆ ಕಾರಣ ಎಂದು WHO ಹೇಳಿದೆ.
