ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತದ ಅತ್ಯಂತ ಶ್ರೀಮಂತ ವ್ಯಕ್ತಿ ಮುಕೇಶ್ ಅಂಬಾನಿಯವರು ವೈಯಕ್ತಿಕವಾಗಿ ಸರಳ ವೇಷಭೂಷಣಕ್ಕೆ ಆದ್ಯತೆ ನೀಡಿದರೆ, ಅವರ ಪತ್ನಿ ನೀತಾ ಅಂಬಾನಿಯವರದ್ದು ಬಹಳ ವೈಭವಯುತ ಮತ್ತು ಆಕರ್ಷಕ ಜೀವನಶೈಲಿ. ತಮ್ಮ ಉತ್ಕೃಷ್ಟ ಅಭಿರುಚಿಗೆ ಹೆಸರುವಾಸಿಯಾದ ನೀತಾ ಅಂಬಾನಿ ಅವರು ಇತ್ತೀಚೆಗೆ ತಮ್ಮ ಕಿರಿಯ ಮಗನ ವಿವಾಹಪೂರ್ವ ಕಾರ್ಯಕ್ರಮಗಳಲ್ಲಿ ಧರಿಸಿದ್ದ ಆಭರಣ ಮತ್ತು ವಸ್ತ್ರಗಳಿಂದ ಎಲ್ಲರ ಗಮನ ಸೆಳೆದಿದ್ದರು.
ಇದೀಗ ಅವರ ವಿಶಿಷ್ಟ ಕಾರ್ ಕಲೆಕ್ಷನ್ ಮತ್ತೊಮ್ಮೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಯ ವಿಷಯವಾಗಿದೆ. ವಿಶೇಷವಾಗಿ, ಮುಕೇಶ್ ಅಂಬಾನಿಯವರು ತಮ್ಮ ಪತ್ನಿಗೆ ಉಡುಗೊರೆಯಾಗಿ ನೀಡಿದ ಎರಡನೇ ರೋಲ್ಸ್-ರಾಯ್ಸ್ ಕಾರು ಭಾರೀ ವೈರಲ್ ಆಗುತ್ತಿದೆ.
ಕಳೆದ ವರ್ಷ (2023) ದೀಪಾವಳಿಗೆ ಮುಕೇಶ್ ಅಂಬಾನಿಯವರು ತಮ್ಮ ಪತ್ನಿ ನೀತಾ ಅವರಿಗೆ ರೋಲ್ಸ್-ರಾಯ್ಸ್ ಕಲಿನನ್ ಕಾರನ್ನು ಉಡುಗೊರೆಯಾಗಿ ನೀಡಿದ್ದರು. ಅದು ಈಗಾಗಲೇ ಸುದ್ದಿ ಮಾಡಿತ್ತು. ಇದರ ಬೆನ್ನಲ್ಲೇ, ನೀತಾ ಅವರ ಬಳಿ ಈಗ ಹೊಚ್ಚ ಹೊಸ ರೋಲ್ಸ್-ರಾಯ್ಸ್ ಫ್ಯಾಂಟಮ್-8 EWB ಕಾರು ಕಾಣಿಸಿಕೊಂಡಿದೆ. ಇದು 2024ರಲ್ಲಿ ಮುಕೇಶ್ ಅಂಬಾನಿ ಅವರಿಂದ ಸಿಕ್ಕ ಉಡುಗೊರೆ ಎನ್ನಲಾಗುತ್ತಿದೆ.
ಪಿಂಕ್ ಶೇಡ್‌ನಲ್ಲಿ ಮಿಂಚುತ್ತಿರುವ ರೋಲ್ಸ್-ರಾಯ್ಸ್:
ಈ ಫ್ಯಾಂಟಮ್-8 ಕಾರು ಬಹಳ ವಿಶೇಷವಾಗಿದೆ. ಸಾಮಾನ್ಯವಾಗಿ ರೋಲ್ಸ್-ರಾಯ್ಸ್ ಕಾರುಗಳು ಕಪ್ಪು ಅಥವಾ ಬಿಳಿ ಮಿಶ್ರಿತ ಬಣ್ಣಗಳಲ್ಲಿ ಹೆಚ್ಚು ಕಂಡುಬರುತ್ತವೆ. ಆದರೆ, ನೀತಾ ಅಂಬಾನಿಯವರ ಫ್ಯಾಂಟಮ್-8 ಕಾರು ಆಕರ್ಷಕ ಪಿಂಕ್ ಶೇಡ್ ಬಣ್ಣವನ್ನು ಹೊಂದಿದೆ. ಇದರ ವಿಶಿಷ್ಟ ಬಣ್ಣವು ಎಲ್ಲರ ಕಣ್ಮನ ಸೆಳೆಯುತ್ತಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆಗೆ ಪಾತ್ರವಾಗಿದೆ.
ಈ ಐಷಾರಾಮಿ ಫ್ಯಾಂಟಮ್-8 EWB ಕಾರು ಬರೋಬ್ಬರಿ 571 ಬಿಎಚ್‌ಪಿ ಶಕ್ತಿಯುಳ್ಳ ಪ್ರಬಲ ಎಂಜಿನ್ ಹೊಂದಿದೆ. ಈ ಎಂಜಿನ್ ಸಾಮರ್ಥ್ಯದಿಂದಾಗಿ ಕಾರು ಅತ್ಯದ್ಭುತ ರೈಡಿಂಗ್ ಅನುಭವ ನೀಡುತ್ತದೆ.
ಗೃಹಿಣಿಯಾಗಿರುವುದರ ಜೊತೆಗೆ, ನೀತಾ ಅಂಬಾನಿ ಅವರು ರಿಲಯನ್ಸ್ ಇಂಡಸ್ಟ್ರೀಸ್‌ನ ವಿವಿಧ ಉದ್ಯಮಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡಿದ್ದಾರೆ. ಅವರು ಐಪಿಎಲ್‌ನ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ ಮತ್ತು ರಿಲಯನ್ಸ್ ಫೌಂಡೇಶನ್‌ನ ಮುಖ್ಯಸ್ಥರಾಗಿಯೂ ಕಾರ್ಯನಿರ್ವಹಿಸುತ್ತಿದ್ದಾರೆ. ವರದಿಗಳ ಪ್ರಕಾರ, ಅವರ ಒಟ್ಟು ಆಸ್ತಿ ಮೌಲ್ಯ ಸುಮಾರು 2,500 ಕೋಟಿ ಆಸುಪಾಸಿನಲ್ಲಿದೆ.
ಅನೇಕ ವಜ್ರ, ಚಿನ್ನ, ಬೆಳ್ಳಿ ಮತ್ತು ಪ್ಲಾಟಿನಂ ಆಭರಣಗಳ ಮಾಲೀಕರಾಗಿರುವ ನೀತಾ ಅವರ ಸಂಪತ್ತು ಮತ್ತು ವೈಭವವು ಮಗ ಅನಂತ್ ಅಂಬಾನಿ ಅವರ ವಿವಾಹಪೂರ್ವ ಸಮಾರಂಭಗಳಲ್ಲಿ ಎದ್ದು ಕಾಣುತ್ತಿತ್ತು.
