ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಮೂರು ಪಂದ್ಯಗಳ ಏಕದಿನ ಸರಣಿಯು 1-1ರ ಸಮಬಲದೊಂದಿಗೆ ಅತ್ಯಂತ ರೋಚಕ ಘಟ್ಟ ತಲುಪಿದೆ. ಇತ್ತೀಚಿನ ಪಂದ್ಯಗಳ ನಂತರ, ಇದೀಗ ಎಲ್ಲರ ಕಣ್ಣು ವಿಶಾಖಪಟ್ಟಣಂನ ವೈಝಾಗ್ ಮೈದಾನದಲ್ಲಿ ನಡೆಯಲಿರುವ ಸರಣಿ ನಿರ್ಣಾಯಕ ಮೂರನೇ ಏಕದಿನ ಪಂದ್ಯದ ಮೇಲಿದೆ.
ತವರು ನೆಲದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಏಕದಿನ ಪಂದ್ಯಗಳಲ್ಲಿ ತಮ್ಮ ಪ್ರಾಬಲ್ಯವನ್ನು ಮುಂದುವರಿಸಲು ಟೀಂ ಇಂಡಿಯಾ ನಿರ್ಧರಿಸಿದ್ದರೆ, ಪ್ರೋಟೀಸ್ ಪಡೆಗೆ ಇದು ಪ್ರತಿಷ್ಠೆಯ ಪ್ರಶ್ನೆಯಾಗಿದೆ. ಏಕೆಂದರೆ, ದಕ್ಷಿಣ ಆಫ್ರಿಕಾ ಭಾರತದ ನೆಲದಲ್ಲಿ ಏಕದಿನ ಸರಣಿ ಗೆದ್ದು 10 ವರ್ಷಗಳೇ ಕಳೆದಿದ್ದು, ಆ ಕಾಯುವಿಕೆಯನ್ನು ಅಂತ್ಯಗೊಳಿಸಲು ಎದುರು ನೋಡುತ್ತಿದೆ.
ಸರಣಿಯ ಈ ನಿರ್ಣಾಯಕ ಪಂದ್ಯಕ್ಕೆ ವಿಶಾಖಪಟ್ಟಣಂ ಮೈದಾನವು ಸಾಕ್ಷಿಯಾಗಲಿದೆ. ಅಂಕಿ-ಅಂಶಗಳ ಪ್ರಕಾರ, ಈ ಮೈದಾನವು ಭಾರತಕ್ಕೆ ಅದೃಷ್ಟದ ಕೋಟೆಯಂತಿದೆ.
ಈ ಮೈದಾನದಲ್ಲಿ ಭಾರತ ಇದುವರೆಗೆ ಆಡಿದ 10 ಏಕದಿನ ಪಂದ್ಯಗಳಲ್ಲಿ 7ರಲ್ಲಿ ಜಯ ಸಾಧಿಸಿದೆ. ಕೇವಲ ಎರಡು ಪಂದ್ಯಗಳಲ್ಲಿ ಸೋಲು ಕಂಡಿದ್ದು, ಒಂದು ಪಂದ್ಯ ಡ್ರಾನಲ್ಲಿ ಅಂತ್ಯಗೊಂಡಿದೆ. ಈ ದಾಖಲೆಗಳು ಹೇಳುವಂತೆ, ಮೈದಾನದ ಮೇಲೆ ಭಾರತಕ್ಕೆ ಸ್ಪಷ್ಟವಾದ ಮೇಲುಗೈ ಇದೆ.
ಆದಾಗ್ಯೂ, ಟೀಂ ಇಂಡಿಯಾ ಈ ಮೈದಾನದಲ್ಲಿ ತನ್ನ ಕೊನೆಯ ಗೆಲುವನ್ನು 2019 ರಲ್ಲಿ ಸಾಧಿಸಿತ್ತು. ಆ ಬಳಿಕ, 2023 ರಲ್ಲಿ ನಡೆದಿದ್ದ ಏಕೈಕ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೋಲು ಕಂಡಿತ್ತು. ಹೀಗಾಗಿ, ಸರಿ ಸುಮಾರು ಆರು ವರ್ಷಗಳ ನಂತರ, ಈ ಗೆಲುವಿನ ‘ಕಾಯುವಿಕೆ’ಯನ್ನು ಕೊನೆಗೊಳಿಸಿ ಗೆಲುವಿನ ಹಾದಿಗೆ ಮರಳಲು ಟೀಂ ಇಂಡಿಯಾ ಉತ್ಸುಕವಾಗಿದೆ.
ಮತ್ತೊಂದೆಡೆ, ದಕ್ಷಿಣ ಆಫ್ರಿಕಾ ತಂಡಕ್ಕೆ ವಿಶಾಖಪಟ್ಟಣಂ ಮೈದಾನದ ಅನುಭವ ಶೂನ್ಯ. ಪ್ರೋಟೀಸ್ ತಂಡ ಇಲ್ಲಿಯವರೆಗೆ ಒಂದೇ ಒಂದು ಏಕದಿನ ಪಂದ್ಯವನ್ನು ಆಡಿಲ್ಲ! ಆದಾಗ್ಯೂ, 2019 ರಲ್ಲಿ ಒಂದು ಟೆಸ್ಟ್ ಮತ್ತು 2022 ರಲ್ಲಿ ಒಂದು ಟಿ20 ಪಂದ್ಯವನ್ನು ಆಡಿದ್ದು, ಆ ಎರಡೂ ಪಂದ್ಯಗಳಲ್ಲಿ ಸೋಲನ್ನು ಕಂಡಿದೆ.
ಇದರಿಂದ, ಭಾರತದ ಬಲಿಷ್ಠ ದಾಖಲೆಯ ಎದುರು, ದಕ್ಷಿಣ ಆಫ್ರಿಕಾದ ದಾಖಲೆಯು ವಿಶಾಖಪಟ್ಟಣಂನಲ್ಲಿ ‘ಶೂನ್ಯ’ವಾಗಿಯೇ ಉಳಿದಿದೆ. ಈ ಸವಾಲನ್ನು ಪ್ರೋಟೀಸ್ ಹೇಗೆ ಎದುರಿಸಲಿದೆ ಎಂಬುದನ್ನು ಕಾದು ನೋಡಬೇಕು.
