ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ‘ಡೆವಿಲ್’ ಗಲ್ಲಾಪೆಟ್ಟಿಗೆಯಲ್ಲಿ ಭರ್ಜರಿ ಓಪನಿಂಗ್ ಪಡೆದುಕೊಂಡಿದೆ. ಅಭಿಮಾನಿಗಳಲ್ಲಿ ದೊಡ್ಡ ನಿರೀಕ್ಷೆ ಮೂಡಿಸಿದ್ದ ಈ ಸಿನಿಮಾವು ಬಿಡುಗಡೆಯಾದ ಕೇವಲ ಎರಡೇ ದಿನಗಳಲ್ಲಿ 17 ಕೋಟಿ ರೂಪಾಯಿಗಳ ಒಟ್ಟು ಕಲೆಕ್ಷನ್ ಮಾಡುವ ಮೂಲಕ ತನ್ನ ಪವರ್ ಪ್ರದರ್ಶಿಸಿದೆ.
ನಿರ್ದೇಶಕ ಮಿಲನ ಪ್ರಕಾಶ ಅವರ ಈ ಚಿತ್ರಕ್ಕೆ ದರ್ಶನ್ ಕಟ್ಟಾ ಅಭಿಮಾನಿಗಳು ಭುಜಕೊಟ್ಟಿದ್ದಾರೆ. ದರ್ಶನ್ ಅವರ ಅನುಪಸ್ಥಿತಿಯಲ್ಲಿ, ಸಿನಿಮಾವನ್ನು ಗೆಲ್ಲಿಸುವ ಜವಾಬ್ದಾರಿಯನ್ನು ತಮ್ಮದೇ ಎಂದು ಭಾವಿಸಿದ ಅಭಿಮಾನಿಗಳು, ಚಿತ್ರದ ಪ್ರಚಾರದಲ್ಲಿ ಸಕ್ರಿಯರಾಗಿದ್ದರು. ಈಗ, ಅವರು ಚಿತ್ರವನ್ನು ಪದೇ ಪದೇ ವೀಕ್ಷಿಸುವ ಮೂಲಕ ಅದರ ಯಶಸ್ಸಿಗೆ ಕಾರಣರಾಗಿದ್ದಾರೆ.
ಮೊದಲ ದಿನದ ಕಲೆಕ್ಷನ್: ಚಿತ್ರತಂಡದ ಪ್ರಕಾರ 13.5 ಕೋಟಿ.
ಎರಡನೇ ದಿನದ ಕಲೆಕ್ಷನ್: 3.5 ಕೋಟಿ ರೂಪಾಯಿಗಳು ಎಂದು sacnilk ವರದಿ ಮಾಡಿದೆ.
ಒಟ್ಟು ಕಲೆಕ್ಷನ್ (2 ದಿನಕ್ಕೆ): 17 ಕೋಟಿ!
ಸಿನಿಮಾ ಬಿಡುಗಡೆಯಾದ ಎರಡನೇ ದಿನ ಶುಕ್ರವಾರವಾಗಿದ್ದರೂ, ವಾರದ ದಿನದಂದು ಕೂಡ ‘ಡೆವಿಲ್’ ಉತ್ತಮ ಪ್ರದರ್ಶನ ನೀಡಿದ್ದು, ಇದು ಚಿತ್ರದ ಬಗ್ಗೆ ಇರುವ ಕ್ರೇಜ್ಗೆ ಸಾಕ್ಷಿಯಾಗಿದೆ. ದರ್ಶನ್ ಅವರ ಅಭಿಮಾನಿಗಳು ಚಿತ್ರದ ಟಿಕೆಟ್ ದರ ಗಗನಕ್ಕೇರಿದ್ದರೂ ಸಹ ಅದನ್ನು ಲೆಕ್ಕಿಸದೆ ಪದೇ ಪದೇ ಸಿನಿಮಾ ನೋಡುತ್ತಿರುವುದು ಈ ಕಲೆಕ್ಷನ್ಗೆ ಪ್ರಮುಖ ಕಾರಣವಾಗಿದೆ.
ಶನಿವಾರ ಮತ್ತು ಭಾನುವಾರ ವೀಕೆಂಡ್ ಆಗಿರುವುದರಿಂದ, ಮುಂದಿನ ಎರಡು ದಿನಗಳಲ್ಲಿ ‘ಡೆವಿಲ್’ ಕಲೆಕ್ಷನ್ ಮತ್ತಷ್ಟು ಅಬ್ಬರಿಸುವ ನಿರೀಕ್ಷೆ ಇದೆ. ಹಿಂದಿನ ದರ್ಶನ್ ಚಿತ್ರ ‘ಕಾಟೇರ’ ಮಾಡಿದ ದಾಖಲೆಯನ್ನು ‘ಡೆವಿಲ್’ ಮುರಿಯುತ್ತದೆಯೇ ಕಾದು ನೋಡಬೇಕು.
