ಹೊಸದಿಗಂತ ಡಿಜಿಟಲ್ ಡೆಸ್ಕ್:
2025ರ ಮಹಿಳಾ ಏಕದಿನ ಕ್ರಿಕೆಟ್ ವಿಶ್ವಕಪ್ ಪಾಕಿಸ್ತಾನ ತಂಡಕ್ಕೆ ನಿರಾಶಾದಾಯಕ ಆರಂಭವನ್ನು ನೀಡಿದೆ. ಭಾರತ ಮತ್ತು ಶ್ರೀಲಂಕಾದಲ್ಲಿ ನಡೆಯುತ್ತಿರುವ ಈ ವಿಶ್ವಕಪ್‌ನ ಮೊದಲ ಪಂದ್ಯದಲ್ಲೇ ಬಾಂಗ್ಲಾದೇಶದ ಎದುರು ಪಾಕಿಸ್ತಾನ 7 ವಿಕೆಟ್‌ಗಳಿಂದ ಶರಣಾಯಿತು. ಪುರುಷರ ಏಷ್ಯಾಕಪ್‌ನಲ್ಲಿ ನಿರಂತರ ಸೋಲು ಕಂಡ ಪಾಕಿಸ್ತಾನ, ಇದೀಗ ಮಹಿಳಾ ಕ್ರಿಕೆಟ್‌ನಲ್ಲಿಯೂ ಹೀನಾಯ ಸೋಲಿನೊಂದಿಗೆ ವಿಶ್ವಕಪ್ ಪ್ರವೇಶಿಸಿದೆ.
ಪಾಕಿಸ್ತಾನ ಮೊದಲು ಬ್ಯಾಟಿಂಗ್ ಮಾಡಿದರೂ ಕೇವಲ 129 ರನ್‌ಗಳಿಗೇ ಆಲೌಟ್ ಆಯಿತು. ಆರಂಭದಲ್ಲಿಯೇ ಬಾಂಗ್ಲಾದೇಶದ ವೇಗಿ ಮರೂಫಾ ಅಖ್ತರ್ ಪಾಕಿಸ್ತಾನಿ ಬ್ಯಾಟರ್‌ಗಳನ್ನು ಒತ್ತಡಕ್ಕೆ ಸಿಲುಕಿಸಿದರು. ಮೊದಲ ಓವರ್‌ನಲ್ಲೇ ಎರಡು ವಿಕೆಟ್ ಕಳೆದುಕೊಂಡ ಪಾಕಿಸ್ತಾನ ಸಂಪೂರ್ಣವಾಗಿ ಹಿಂಜರಿದಿತು. ಮುನೀಬಾ ಅಲಿ ಮತ್ತು ರಮೀನ್ ಶಮೀಮ್ 42 ರನ್‌ಗಳ ಜೊತೆಯಾಟ ನೀಡಿದರೂ, ನಹಿದಾ ಅಖ್ತರ್ ಅವರ ಸ್ಪಿನ್ ಜಾದು ಮತ್ತೆ ಪಾಕಿಸ್ತಾನವನ್ನು ಹಿನ್ನಡೆಯತ್ತ ತಳ್ಳಿತು. ಅಂತಿಮವಾಗಿ 38.3 ಓವರ್‌ಗಳಲ್ಲಿ ಕೇವಲ 129 ರನ್‌ಗಳಿಗೇ ಪಾಕ್ ತಂಡ ಆಲೌಟ್ ಆಯಿತು.
ಬಾಂಗ್ಲಾದೇಶ ಪರ ಮರೂಫಾ ಮತ್ತು ನಹಿದಾ ತಲಾ ಎರಡು ವಿಕೆಟ್ ಪಡೆದರೆ, ಶೋರ್ನಾ ಅಖ್ತರ್ ಮೂರು ವಿಕೆಟ್ ಬೇಟೆಯಾಡಿದರು. ಗುರಿ ಬೆನ್ನಟ್ಟಿದ ಬಾಂಗ್ಲಾದೇಶ ಆರಂಭದಲ್ಲಿ ಎರಡು ವಿಕೆಟ್ ಕಳೆದುಕೊಂಡರೂ, ರುಬಿಯಾ ಹೈದರ್ ಮತ್ತು ನಾಯಕಿ ನಿಗರ್ ಸುಲ್ತಾನ 62 ರನ್‌ಗಳ ಶ್ರೇಷ್ಠ ಪಾಲುದಾರಿಕೆಯನ್ನು ಕಟ್ಟಿಕೊಟ್ಟರು. ಬಳಿಕ ರುಬಿಯಾ ತನ್ನ ಅರ್ಧಶತಕವನ್ನು ಪೂರೈಸಿ, ಸೋಭಾನಾ ಮೊಸ್ತಾರಿಯೊಂದಿಗೆ ತಂಡವನ್ನು ಗೆಲುವಿನತ್ತ ಕೊಂಡೊಯ್ದರು. ರುಬಿಯಾ 54 ರನ್‌ಗಳ ಅಜೇಯ ಆಟವಾಡಿದರೆ, ಸೋಭಾನಾ 24 ರನ್‌ಗಳೊಂದಿಗೆ ಅಜೇಯರಾಗಿಯೇ ಉಳಿದರು.
ಈ ಸೋಲಿನಿಂದ ಪಾಕಿಸ್ತಾನದ ಕಳಪೆ ಫಾರ್ಮ್ ಮತ್ತೊಮ್ಮೆ ಬಯಲಾಯ್ತು. ಏಷ್ಯಾಕಪ್‌ನಲ್ಲಿ ಸೋಲು ಕಂಡಿದ್ದ ಪಾಕಿಸ್ತಾನ, ಇದೀಗ ವಿಶ್ವಕಪ್‌ನಲ್ಲಿಯೂ ಹೀನಾಯ ಆರಂಭ ಮಾಡಿದೆ. ಮುಂದಿನ ಭಾನುವಾರ ಭಾರತ ವಿರುದ್ಧ ಪಾಕಿಸ್ತಾನ ಕಣಕ್ಕಿಳಿಯಲಿದೆ. ಪರಂಪರೆಯಿಂದ ಭಾರತ ಎದುರು ಪಾಕಿಸ್ತಾನಕ್ಕೆ ಜಯ ಸಿಗದಿರುವ ಹಿನ್ನೆಲೆಯಲ್ಲಿ, ಈ ಬಾರಿ ಫಾತಿಮಾ ಸನಾ ನಾಯಕತ್ವದ ಪಾಕ್ ತಂಡ ಯಾವ ರೀತಿಯ ಹೋರಾಟ ನೀಡುತ್ತದೆ ಎಂಬುದನ್ನು ಅಭಿಮಾನಿಗಳು ಕಾದುನೋಡುತ್ತಿದ್ದಾರೆ.
