ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕಳೆದ ಒಂದು ದಶಕದಲ್ಲಿ ಭಾರತವು ಉದ್ಯಮಶೀಲತೆಯಲ್ಲಿ ಅಗಾಧ ಪ್ರಗತಿಯನ್ನು ಕಂಡಿದೆ. ಭಾರತದ ಬೆಳವಣಿಗೆಯು ಉದಯೋನ್ಮುಖ ಸ್ಟಾರ್ಟ್-ಅಪ್‌ಗಳಿಂದ ನಡೆಸಲ್ಪಡುತ್ತಿದೆ ಎಂದು ಕೇಂದ್ರ ಸಂವಹನ ಸಚಿವ ಜ್ಯೋತಿರಾದಿತ್ಯ ಸಿಂದಿಯಾ ಹೇಳಿದರು.
ದಿಲ್ಲಿಯ ಯಶೋಭೂಮಿಯಲ್ಲಿ ನಡೆದ ಇಂಡಿಯಾ ಮೊಬೈಲ್ ಕಾಂಗ್ರೆಸ್ ಶೃಂಗಸಭೆಯ ಎರಡನೇ ದಿನವಾದ ಇಂದು ಮಾತನಾಡಿದ ಸಚಿವರು, ಭಾರತ ಇನ್ನು ಕೇವಲ ದೇಶೀಯ ಮಾರುಕಟ್ಟೆಯಾಗಿ ಉಳಿದಿಲ್ಲ, ಬದಲಿಗೆ ದೇಶದ ಉದ್ಯಮಿಗಳು, ನಾವೀನ್ಯಕಾರರು ಮತ್ತು ಕೈಗಾರಿಕೆಗಳು ಈಗ ಜಗತ್ತಿಗೆ ಉತ್ಪನ್ನಗಳು ಮತ್ತು ಸೇವೆಗಳನ್ನು ಒದಗಿಸುವ ಮೂಲಕ ಜಾಗತಿಕ ಮಾರುಕಟ್ಟೆಯಲ್ಲಿ ಅಪಾರ ಕೊಡುಗೆ ನೀಡುತ್ತಿದೆ ಎಂದರು.
ಇಂದು ಭಾರತವು ಸೇವಾ ರಾಷ್ಟ್ರ ಎಂದು ಪರಿಗಣಿಸಲ್ಪಡುತ್ತಿದೆ. ದೇಶೀಯವಾಗಿ ಮಾತ್ರವಲ್ಲದೆ ಅಂತರರಾಷ್ಟ್ರೀಯ ಮಟ್ಟದಲ್ಲಿಯೂ ತನ್ನ ಹೆಜ್ಜೆಗುರುತುಗಳನ್ನು ಬಲಪಡಿಸಿದೆ ಎಂದರು. 15 ವರ್ಷಗಳ ಹಿಂದೆ ದೇಶವು ಬೆರಳೆಣಿಕೆಯಷ್ಟು ಸ್ಟಾರ್ಟ್-ಅಪ್‌ಗಳನ್ನು ಹೊಂದಿತ್ತು. ಆದರೆ ಇಂದು ದೇಶದಲ್ಲಿ 1.80 ಲಕ್ಷಕ್ಕೂ ಹೆಚ್ಚು ಸ್ಟಾರ್ಟ್-ಅಪ್‌ಗಳಿವೆ. ಸುಮಾರು 73 ಸಾವಿರ ಮಹಿಳಾ ನೇತೃತ್ವದ ಸ್ಟಾರ್ಟ್-ಅಪ್‌ಗಳು ಹೊರಹೊಮ್ಮಿವೆ. 10 ವರ್ಷಗಳ ಹಿಂದೆ ಭಾರತದಲ್ಲಿ ಶೂನ್ಯ ಯುನಿಕಾರ್ನ್‌ಗಳಿದ್ದವು, ಆದರೆ ಇಂದು ಮೂರು ಪಟ್ಟು ಯುನಿಕಾರ್ನ್‌ಗಳಿವೆ ಎಂದು ಎಂದು ಸಚಿವ ಜ್ಯೋತಿರಾದಿತ್ಯ ಸಿಂದಿಯಾ ಹೇಳಿದರು. ಇಂದು ದೇಶದಲ್ಲಿ 1.2 ಬಿಲಿಯನ್ ಮೊಬೈಲ್ ಚಂದಾದಾರರಿದ್ದು, ವಿಶ್ವದ ಮೊಬೈಲ್ ಜನಸಂಖ್ಯೆಯ ಶೇಕಡ 20 ರಷ್ಟು ಜನರು ಭಾರತದಲ್ಲಿದ್ದಾರೆ ಎಂದರು.
ಮಹಿಳಾ ನೇತೃತ್ವದ 73 ಸಾವಿರ ಸಹಿತ 1.80 ಲಕ್ಷ ಸ್ಟಾರ್ಟ್-ಅಪ್‌: ಉದ್ಯಮಶೀಲತೆಯಲ್ಲಿ ಅಗಾಧ ಪ್ರಗತಿ ಕಾಣುತ್ತಿದೆ ಭಾರತ!
