ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಖ್ಯಾತ ನಿರ್ದೇಶಕ ಪ್ರಶಾಂತ್ ನೀಲ್ ಅರ್ಪಿಸುತ್ತಿರುವ ಈ ಚಿತ್ರವನ್ನು ಮೈತ್ರಿ ಮೂವಿ ಮೇಕರ್ಸ್ ನಿರ್ಮಿಸಿದೆ. ಭಯ, ನಿಗೂಢ ಘಟನೆಗಳು ಮತ್ತು ಅತೀಂದ್ರಿಯ ಶಕ್ತಿಗಳ ಸುಳಿವುಗಳಿಂದ ಕೂಡಿರುವ ಟ್ರೇಲರ್ ಪ್ರೇಕ್ಷಕರಲ್ಲಿ ಕುತೂಹಲ ಹೆಚ್ಚಿಸಿದೆ. ಚಿತ್ರವು ಅಕ್ಟೋಬರ್ 23ರಂದು ತೆಲುಗು, ಕನ್ನಡ, ಹಿಂದಿ ಮತ್ತು ತಮಿಳು ಭಾಷೆಗಳಲ್ಲಿ ಚಿತ್ರಮಂದಿರಗಳಿಗೆ ಬರಲಿದೆ ಎಂದು ಚಿತ್ರತಂಡ ತಿಳಿಸಿದೆ.
ನಿಗೂಢ ಕೊಠಡಿ, ಸಾವಿನ ನೆರಳು
ಹೊಸ ಟ್ರೇಲರ್‌ನಲ್ಲಿ ತಾಯಿಯಾಗಲು ಹಂಬಲಿಸುವ ಮಹಿಳೆಯ ಕಥೆಯ ಜೊತೆಗೆ, ಒಂದು ಕಟ್ಟಡದ ಸ್ಟೋರ್‌ರೂಮ್ ಸುತ್ತ ನಡೆಯುವ ಭಯಾನಕ ಘಟನೆಗಳ ಸುಳಿವು ಸಿಗುತ್ತದೆ. ಆ ಕೊಠಡಿಗೆ ಪ್ರವೇಶಿಸುವ ಯಾವುದೇ ಮಹಿಳೆ ಜೀವಂತವಾಗಿ ಹೊರಬರುವುದಿಲ್ಲ ಎಂಬ ಆತಂಕಕಾರಿ ಅಂಶ ಕಥೆಯ ನಿಗೂಢತೆಯನ್ನು ಹೆಚ್ಚಿಸಿದೆ. ಈ ಹಿಂದೆ ಬಿಡುಗಡೆಯಾಗಿದ್ದ ಟ್ರೇಲರ್‌ನಲ್ಲಿ 15 ವರ್ಷಗಳಿಂದ ಮುಚ್ಚಿದ್ದ ವಿಐಎಂಎಸ್ ಕಟ್ಟಡವನ್ನು ಮತ್ತೆ ತೆರೆಯುವುದು, ಅದರ 418ನೇ ಕೊಠಡಿಯಲ್ಲಿರುವ ರಹಸ್ಯ ಮತ್ತು ವಿಚಿತ್ರ ಘಟನೆಗಳನ್ನು ಗ್ರಹಿಸುವ ವಿವೇಕ್ ಎಂಬ ಯುವಕನ ಸುತ್ತ ಕಥೆ ಸಾಗುವ ಸುಳಿವು ನೀಡಲಾಗಿತ್ತು.
ಕೀರ್ತನ್ ನಾಗಗೌಡಗೆ ನಿರ್ದೇಶನದ ಹೊಣೆ
ಈ ಚಿತ್ರದ ಮೂಲಕ ಕೀರ್ತನ್ ನಾಗಗೌಡ ನಿರ್ದೇಶಕರಾಗಿ ಪರಿಚಯವಾಗುತ್ತಿದ್ದಾರೆ. ಕಥೆಯನ್ನೂ ಅವರೇ ಬರೆದಿದ್ದಾರೆ. ನವೀನ್ ಯೆರ್ನೇನಿ ಮತ್ತು ಯಲಮಂಚಿಲಿ ರವಿಶಂಕರ್ ನಿರ್ಮಾಣದ ಜವಾಬ್ದಾರಿ ಹೊತ್ತಿದ್ದಾರೆ. ಚಿತ್ರದಲ್ಲಿ ಚೈತ್ರಾ ಆಚಾರ್, ಸೂರ್ಯ ರಾಜ್, ಚರಣ್ ಲಕ್ಕರಾಜು, ಪ್ರೀತಿ ಪಗಡಾಲ ಮತ್ತು ಶಶಾಂಕ್ ಪಾಟೀಲ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಚಿತ್ರದ ಛಾಯಾಗ್ರಹಣವನ್ನು ದಿನೇಶ್ ದಿವಾಕರ್ ನಿರ್ವಹಿಸಿದ್ದು, ವೆಂಕಿ ಜಿಜಿ ಸಂಗೀತ ಸಂಯೋಜಿಸಿದ್ದಾರೆ. ಉಲ್ಲಾಸ್ ಹೈದೂರ್ ಕಲಾ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ.
ಬಿಡುಗಡೆ ದಿನಾಂಕ ಹಲವು ಬಾರಿ ಬದಲು
ಮೊದಲು ಜುಲೈ 31ರಂದು ಬಿಡುಗಡೆಯಾಗಬೇಕಿದ್ದ ಸಿನಿಮಾ ನಂತರ ಸೆಪ್ಟೆಂಬರ್ 18ಕ್ಕೆ ಮುಂದೂಡಿಕೆಯಾಗಿತ್ತು. ಇದೀಗ ಅಕ್ಟೋಬರ್ 23 ಅಂತಿಮ ಬಿಡುಗಡೆಯ ದಿನಾಂಕವಾಗಿ ಘೋಷಿಸಲಾಗಿದೆ.
