ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತವು 2026ರ ಜನವರಿ 1ರಿಂದ ಬ್ರಿಕ್ಸ್ (BRICS) ಒಕ್ಕೂಟದ ಅಧ್ಯಕ್ಷತೆಯನ್ನು ವಹಿಸಿಕೊಳ್ಳಲಿದ್ದು, ನರೇಂದ್ರ ಮೋದಿ ಸರ್ಕಾರ ಈ ಅವಕಾಶವನ್ನು ದೇಶದ ಬಲವಾದ ಬ್ರ್ಯಾಂಡ್ ಇಮೇಜ್ ನಿರ್ಮಾಣಕ್ಕೆ ಬಳಸಿಕೊಳ್ಳಲು ಮಹತ್ವಾಕಾಂಕ್ಷಿ ಯೋಜನೆ ರೂಪಿಸಿದೆ. ಈ ಕಾರ್ಯಕ್ರಮದ ಅಡಿಯಲ್ಲಿ ದೇಶದ 28 ರಾಜ್ಯಗಳು ಮತ್ತು 9 ಕೇಂದ್ರಾಡಳಿತ ಪ್ರದೇಶಗಳಲ್ಲಿ 60ಕ್ಕೂ ಹೆಚ್ಚು ನಗರಗಳಲ್ಲಿ ಬ್ರಿಕ್ಸ್ ಸಭೆಗಳು ನಡೆಯಲಿವೆ ಎಂದು ಮೂಲಗಳು ತಿಳಿಸಿವೆ.
2023ರ ಜಿ20 (G20) ಅಧ್ಯಕ್ಷತೆಯಂತೆಯೇ, ಭಾರತದ ಶ್ರೀಮಂತ ಸಂಸ್ಕೃತಿ, ಪರಂಪರೆ ಮತ್ತು ಸಾಮಾಜಿಕ ವೈವಿಧ್ಯತೆಯನ್ನು ವಿಶ್ವದ ಮುಂದೆ ಪ್ರದರ್ಶಿಸುವುದು ಈ ಬಾರಿ ಪ್ರಮುಖ ಗುರಿಯಾಗಿದೆ. ಬ್ರಿಕ್ಸ್ ಅಧ್ಯಕ್ಷತೆಯ ಥೀಮ್ ಹಾಡು, ಲೋಗೋ ಮತ್ತು ಬ್ರ್ಯಾಂಡಿಂಗ್ ಮೂಲಕ ರಾಷ್ಟ್ರದ ಎಲ್ಲ ಹಂತದ ಜನರನ್ನು ತಲುಪುವ ಯೋಜನೆ ಸರ್ಕಾರ ರೂಪಿಸಿದ್ದು, ಅದನ್ನು “ಜನ ಭಾಗೀದಾರಿ” ಮಾದರಿಯಲ್ಲಿ ಯಶಸ್ವಿಗೊಳಿಸುವ ಉದ್ದೇಶ ಹೊಂದಿದೆ.
ಬ್ರಿಕ್ಸ್ ಒಕ್ಕೂಟದಲ್ಲಿ ಭಾರತ, ಬ್ರೆಜಿಲ್, ರಷ್ಯಾ, ಚೀನಾ, ದಕ್ಷಿಣ ಆಫ್ರಿಕಾ, ಈಜಿಪ್ಟ್, ಇಥಿಯೋಪಿಯಾ, ಇರಾನ್, ಸೌದಿ ಅರೇಬಿಯಾ ಮತ್ತು ಯುಎಇ ಸೇರಿ 11 ಪೂರ್ಣ ಸದಸ್ಯ ರಾಷ್ಟ್ರಗಳಿದ್ದು, 10 ಪಾಲುದಾರ ರಾಷ್ಟ್ರಗಳೂ ಸಹ ಭಾಗಿಯಾಗಿವೆ. ಈ ಅಧ್ಯಕ್ಷತೆಯ ಅವಧಿಯಲ್ಲಿ ಭಾರತವು ಸಾಂಸ್ಥಿಕ ಸುಧಾರಣೆ, ಹವಾಮಾನ ಹಣಕಾಸು, ಡಿಜಿಟಲ್ ಆಡಳಿತ ಮತ್ತು ಜಾಗತಿಕ ದಕ್ಷಿಣದ ಧ್ವನಿ ಬಲಪಡಿಸುವ ವಿಷಯಗಳ ಮೇಲೆ ಗಮನ ಹರಿಸಲಿದೆ. ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬ್ರಿಕ್ಸ್ ಒಕ್ಕೂಟವನ್ನು “ಯುಎಸ್ ಡಾಲರ್ ಮೇಲಿನ ದಾಳಿ” ಎಂದು ಟೀಕಿಸಿದರೂ, ಭಾರತ ತನ್ನ ಸ್ಥಾನವನ್ನು ಜಾಗತಿಕ ವೇದಿಕೆಯಲ್ಲಿ ಬಲಪಡಿಸಲು ಉತ್ಸುಕವಾಗಿದೆ.
ಯೋಜನೆಯ ಭಾಗವಾಗಿ ದೇಶಾದ್ಯಂತ ಆಕರ್ಷಕ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ. ಬ್ರಿಕ್ಸ್ ಥೀಮ್ ಹಾಡನ್ನು ಜಾಗತಿಕ ಪ್ರಶಸ್ತಿ ವಿಜೇತ ಭಾರತೀಯ ಸಂಗೀತಗಾರರಿಂದ ರಚಿಸಲಾಗುವುದು. ಗಾಳಿಪಟ ಉತ್ಸವಗಳು, ದೀಪಾವಳಿಯಲ್ಲಿ ಪರಿಸರ ಸ್ನೇಹಿ ದೀಪಗಳ ಮೂಲಕ ಲೋಗೋ ಪ್ರಕ್ಷೇಪಣ, ನಗರಗಳಲ್ಲಿ ಹೊಲೊಗ್ರಾಫಿಕ್ ಪ್ರದರ್ಶನಗಳು ಮತ್ತು ಗಣರಾಜ್ಯೋತ್ಸವ ಟ್ಯಾಬ್ಲೋಗಳಲ್ಲಿ ಬ್ರಿಕ್ಸ್ ಥೀಮ್ ಒಳಗೊಂಡ ಪ್ರದರ್ಶನಗಳು ನಡೆಯಲಿವೆ.
ಕೇರಳದ ದೋಣಿ ಉತ್ಸವ, ಒಡಿಶಾದ ಮರಳು ಕಲಾ ಉತ್ಸವ, ಗೋವಾ ಕಾರ್ನಿವಲ್‌ಗಳಲ್ಲಿ ಬ್ರಿಕ್ಸ್ ಪ್ರಚಾರ ನಡೆಯಲಿದೆ. ಜೊತೆಗೆ ಮೆಟ್ರೋ, ಬಸ್ ಮತ್ತು ರೈಲುಗಳಲ್ಲಿ ಬ್ರಿಕ್ಸ್ ಲೋಗೋ ಹಾಗೂ ಡ್ರೋನ್ ಶೋಗಳ ಮೂಲಕ ಜನಜಾಗೃತಿ ಮೂಡಿಸಲಾಗುವುದು.
