ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸಂಘರ್ಷ ಮತ್ತು ಭಾವನೆಗಳಿಂದ ತುಂಬಿರುವ ಪ್ರೇಮಕಥೆಗಳ ಮೂಲಕ ಪ್ರೇಕ್ಷಕರ ಮನಸ್ಸು ಗೆದ್ದ ನಟ-ನಿರ್ದೇಶಕ ಡಾರ್ಲಿಂಗ್ ಕೃಷ್ಣ ಇದೀಗ ತಮ್ಮ ಹೊಸ ಚಿತ್ರ ‘ಲವ್ ಮಾಕ್ಟೆಲ್-3’ ಮೂಲಕ ಮತ್ತೊಮ್ಮೆ ಪ್ರೇಕ್ಷಕರ ಹೃದಯ ತಟ್ಟಲು ಸಜ್ಜಾಗಿದ್ದಾರೆ. ಈ ಚಿತ್ರದ ಶೂಟಿಂಗ್ ಈಗ ಬಹುತೇಕ ಮುಕ್ತಾಯಗೊಂಡಿದ್ದು, ಮುಂದಿನ ವರ್ಷ ಫೆಬ್ರವರಿ 14ರಂದು ಅಂದರೆ ಪ್ರೇಮಿಗಳ ದಿನದಂದು ಚಿತ್ರವನ್ನು ಬಿಡುಗಡೆಯ ಮಾಡಲು ತಂಡ ಯೋಜನೆ ರೂಪಿಸಿದೆ. ಮೊದಲ ಎರಡು ಭಾಗಗಳೂ ಯಶಸ್ವಿಯಾಗಿದ್ದ ಹಿನ್ನೆಲೆಯಲ್ಲಿ, ಈ ಬಾರಿ ಪ್ರೇಕ್ಷಕರ ನಿರೀಕ್ಷೆ ಇನ್ನಷ್ಟು ಹೆಚ್ಚಾಗಿದೆ.
‘ಲವ್ ಮಾಕ್ಟೆಲ್-3’ ಚಿತ್ರವು ಸರಣಿ ಕಥೆಯ ಮುಂದುವರಿಕೆಯಾಗಿದೆ. ‘ಲವ್ ಮಾಕ್ಟೆಲ್-2’ನ ಕಥೆಯಿಂದ ಮುಂದುವರೆಯುತ್ತಿದ್ದು, ಹೊಸ ಪಾತ್ರಗಳು ಮತ್ತು ಹೊಸ ಎಮೋಷನಲ್ ಹಾದಿಗಳನ್ನು ಕೃಷ್ಣ ಬರೆದಿದ್ದಾರೆ. ಮಿಲನ ನಾಗರಾಜ್ ಅವರ ಪಾತ್ರವೂ ಈ ಭಾಗದಲ್ಲಿ ಮುಂದುವರಿಯುವ ಸಾಧ್ಯತೆ ಇದೆ ಎಂಬ ಮಾಹಿತಿ ಲಭ್ಯವಾಗಿದೆ.
ಕೃಷ್ಣ ನಿರ್ದೇಶನದ ಮೊದಲ ಎರಡು ಭಾಗಗಳು ಹಿಟ್ ಆಗಿದ್ದಂತೆ, ಈ ಬಾರಿ ಕೂಡ ಉತ್ತಮ ಕಥೆ ಮತ್ತು ಮನಸೂರೆಗೊಳ್ಳುವ ಸಂಗೀತದೊಂದಿಗೆ ‘ಲವ್ ಮಾಕ್ಟೆಲ್-3’ ಹೃದಯಸ್ಪರ್ಶಿ ಸಿನಿಮಾ ಆಗುವ ಭರವಸೆ ಮೂಡಿಸಿದೆ. ಇತ್ತೀಚಿನ ‘ಬ್ರ್ಯಾಟ್’ ಚಿತ್ರವೂ ಯಶಸ್ಸು ಕಂಡಿರುವ ಕಾರಣ, ಕೃಷ್ಣ ಅವರ ಕ್ರಿಯೇಟಿವ್ ಟ್ರ್ಯಾಕ್ ಇದೀಗ ಚೆನ್ನಾಗಿಯೇ ಓಡುತ್ತಿದೆ. ಅಭಿಮಾನಿಗಳು ಈಗ ಪ್ರೇಮಿಗಳ ದಿನದತ್ತ ಕಾದು ನೋಡುವಂತಾಗಿದೆ.
