ಇಂದಿನ ವೇಗದ ಬದುಕಿನಲ್ಲಿ ಮಕ್ಕಳಿಗೆ ಪೋಷಕಾಂಶಗಳ ಸಮತೋಲನ ಅತ್ಯಂತ ಅಗತ್ಯ. ಓದು, ಕ್ರೀಡೆ, ಕೌಶಲ್ಯ ಯಾವ ಕ್ಷೇತ್ರವಾಗಲಿ, ಮಕ್ಕಳ ಮೆದುಳು ಸಕ್ರಿಯವಾಗಿರಲು ಸರಿಯಾದ ಆಹಾರವೇ ಬಲ. ಮೀನು ತಿನ್ನದೇ ಇದ್ದರೂ ಒಮೆಗಾ-3 ದೊರೆಯುತ್ತದೆಯಾ? ಎಂಬ ಪ್ರಶ್ನೆ ಪೋಷಕರಲ್ಲಿ ಸಾಮಾನ್ಯ. ಆದರೆ ಉತ್ತರ ಹೌದು! ಪ್ರಕೃತಿಯಲ್ಲೇ ಮೆದುಳಿಗೆ ಬಲವರ್ಧಕವಾಗಿರುವ ಅನೇಕ ಸಸ್ಯಾಹಾರಿ ಮೂಲಗಳಿವೆ. ಈ ಆಹಾರಗಳು ಮಕ್ಕಳ ಗಮನಶಕ್ತಿ, ಕಲಿಕೆಯ ಸಾಮರ್ಥ್ಯ ಮತ್ತು ನೆನಪಿನ ಸಾಮರ್ಥ್ಯವನ್ನು ಸಹಜವಾಗಿ ಹೆಚ್ಚಿಸುತ್ತವೆ.
- ವಾಲ್‌ನಟ್ – ಮೆದುಳಿನ ಆಕಾರದ ಪೌಷ್ಠಿಕ ಶಕ್ತಿ: ವಾಲ್‌ನಟ್‌ನಲ್ಲಿ ALA ರೂಪದ ಒಮೆಗಾ-3 ಅಧಿಕ. ಇದನ್ನು ಬೆಳಗಿನ ಉಪಹಾರಕ್ಕೆ, ಮಿಲ್ಕ್‌ಶೇಕ್‌ಗೆ ಅಥವಾ ಲಡ್ಡುಗಳಲ್ಲಿ ಸೇರಿಸಿ ಮಕ್ಕಳಿಗೆ ಸುಲಭವಾಗಿ ನೀಡಬಹುದು.
- ಅಗಸೆಬೀಜ – ಸಣ್ಣ ಬೀಜದಲ್ಲಿ ದೊಡ್ಡ ಪೌಷ್ಠಿಕತೆ: ಹುರಿದು ಪುಡಿ ಮಾಡಿ ರೊಟ್ಟಿ ಹಿಟ್ಟು, ರಾಯಿತಾ ಅಥವಾ ಸ್ಮೂಥಿಯಲ್ಲಿ ಮಿಶ್ರಣ ಮಾಡಿ ಪ್ರತಿದಿನ ಮಕ್ಕಳಿಗೆ ಕೊಟ್ಟರೆ ಒಮೆಗಾ-3 ಸಿಗುತ್ತದೆ.
- ಚಿಯಾ ಬೀಜ – ಫೈಬರ್ + ಒಮೆಗಾ-3 ಕಾಂಬೋ: ಹಾಲಿನಲ್ಲಿ ನೆನೆಸಿಟ್ಟು ಚಿಯಾ ಪುಡ್ಡಿಂಗ್ ರೀತಿ ಕೊಡಬಹುದು. ಹಣ್ಣುಗಳ ಸಲಾಡ್ ಮೇಲೂ ಹಾಕಬಹುದು.
- ಸೆಣಬಿನ ಬೀಜ(Hemp Seeds) – ಮೆದುಳಿಗೆ ಹಿತವಾದ ಕೊಬ್ಬಿನಾಂಶ: ಒಮೆಗಾ-3 ಮತ್ತು ಒಮೆಗಾ-6 ಸಮತೋಲನ ಹೊಂದಿರುವ ಈ ಬೀಜಗಳನ್ನು ಸೂಪ್, ಸಲಾಡ್ ಅಥವಾ ಎನರ್ಜಿ ಬಾರ್‌ಗಳಲ್ಲಿ ಸೇರಿಸಬಹುದು.
- ಸೋಯಾಬೀನ್ ಮತ್ತು ಟೋಫು: ಫ್ರೈಡ್ ರೈಸ್, ಪಲ್ಯ ಅಥವಾ ಪ್ಯಾಟಿಗಳಲ್ಲಿ ಬಳಸಿದರೆ ಮಕ್ಕಳ ಊಟವೂ ರುಚಿ, ಪೋಷಕಾಂಶವೂ ಹೆಚ್ಚು.
- ಕುಂಬಳಕಾಯಿ ಬೀಜ – ಏಕಾಗ್ರತೆಯನ್ನು ಹೆಚ್ಚಿಸುವ ಸೂಪರ್ ಫುಡ್: ಜಿಂಕ್ ಮತ್ತು ಮೆಗ್ನೀಸಿಯಮ್ ಜೊತೆಗೆ ಒಮೆಗಾ-3 ಇರುವ ಈ ಬೀಜಗಳನ್ನು ಸ್ನ್ಯಾಕ್ ಅಥವಾ ಸೂಪ್ ಟಾಪಿಂಗ್ ಆಗಿ ನೀಡಬಹುದು.
