ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಇಡೀ ದೇಶದ ಗಮನ ಸೆಳೆದಿದ್ದ ಬಿಹಾರ ವಿಧಾನಸಭಾ ಚುನಾವಣಾ ಫಲಿತಾಂಶ ಬಹುತೇಕ ಹೊರಬಿದ್ದಿದ್ದು, ಪ್ರಧಾನಿ ನರೇಂದ್ರ ಮೋದಿ ಮತ್ತು ನಿತೀಶ್ ಕುಮಾರ್ ಅವರ ನೇತೃತ್ವದ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ ಪ್ರಚಂಡ ಬಹುಮತದೊಂದಿಗೆ ಅಧಿಕಾರದ ಗದ್ದುಗೆಯನ್ನು ಉಳಿಸಿಕೊಂಡಿದೆ. ತೀವ್ರ ಕುತೂಹಲ ಕೆರಳಿಸಿದ್ದ ಮತ ಎಣಿಕೆಯ ಅಂತಿಮ ಹಂತದಲ್ಲಿ ಎನ್‌ಡಿಎ ಮೈತ್ರಿಕೂಟ 200ಕ್ಕೂ ಹೆಚ್ಚು ಸ್ಥಾನಗಳಲ್ಲಿ ಮುನ್ನಡೆ ಕಾಯ್ದುಕೊಂಡು ಜಯದ ನಗೆ ಬೀರಿದೆ.
ಬಿಜೆಪಿ ಅತಿದೊಡ್ಡ ಪಕ್ಷ, ‘ಡಬಲ್ ಇಂಜಿನ್’ ಸರ್ಕಾರಕ್ಕೆ ಬಹುಪರಾಕ್
ಚುನಾವಣಾ ಫಲಿತಾಂಶದಲ್ಲಿ ಎನ್‌ಡಿಎ ಮೈತ್ರಿಕೂಟದಲ್ಲಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿರುವುದು ಗಮನಾರ್ಹ. ಬಿಜೆಪಿ 95 ಸ್ಥಾನಗಳಲ್ಲಿ, ನಿತೀಶ್ ಕುಮಾರ್ ನೇತೃತ್ವದ ಜೆಡಿಯು 82 ಸ್ಥಾನಗಳಲ್ಲಿ, ಎಲ್‌ಜೆಪಿ (ಆರ್‌ವಿ) 20, ಹೆಚ್‌ಎಎಮ್‌ (ಎಸ್) 5 ಮತ್ತು ಆರ್‌ಎಲ್‌ಎಮ್‌ 4 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿವೆ. ಇದು ಮೋದಿ-ನಿತೀಶ್ ಅವರ ‘ಡಬಲ್ ಇಂಜಿನ್’ ಸರ್ಕಾರದ ಆಡಳಿತಕ್ಕೆ ಬಿಹಾರದ ಜನರು ಮತ್ತೊಮ್ಮೆ ಸ್ಪಷ್ಟ ಜನಾದೇಶ ನೀಡಿದ್ದಾರೆ ಎಂಬುದನ್ನು ತೋರಿಸುತ್ತದೆ.
ಇತ್ತ ಮಹಾಘಟಬಂಧನ್‌ ಮೈತ್ರಿಕೂಟದ ಪ್ರಮುಖ ಪಕ್ಷವಾದ ಆರ್‌ಜೆಡಿ ಕೇವಲ 25 ಸ್ಥಾನಗಳಿಗೆ ತೃಪ್ತಿಪಡುವಂತಾದರೆ, ಕಾಂಗ್ರೆಸ್‌ ಕೇವಲ 5 ಸ್ಥಾನಗಳಲ್ಲಷ್ಟೇ ಮುನ್ನಡೆ ಸಾಧಿಸಿ ಹೀನಾಯ ಸೋಲು ಕಂಡಿದೆ.
ನಿತೀಶ್ ಕುಮಾರ್ ಆಡಳಿತಕ್ಕೆ ಬಹುಮನ್ನಣೆ
ಕಳೆದ 20 ವರ್ಷಗಳ ನಿತೀಶ್ ಕುಮಾರ್ ಆಡಳಿತದ ಅವಧಿಯಲ್ಲಿ ನಡೆದ ಕಾನೂನು-ಸುವ್ಯವಸ್ಥೆಯ ಸುಧಾರಣೆ, ರಸ್ತೆಗಳು ಮತ್ತು ಸೇತುವೆಗಳಂತಹ ಮೂಲಸೌಕರ್ಯ ಅಭಿವೃದ್ಧಿ ಹಾಗೂ ಮಹಿಳಾ ಪರ ಯೋಜನೆಗಳು ಚುನಾವಣೆಯಲ್ಲಿ ದೊಡ್ಡ ಮಟ್ಟದ ಸಕಾರಾತ್ಮಕ ಪರಿಣಾಮ ಬೀರಿವೆ. ಅದರಲ್ಲೂ ಮಹಿಳಾ ಮತದಾರರು ದೊಡ್ಡ ಪ್ರಮಾಣದಲ್ಲಿ ಎನ್‌ಡಿಎಗೆ ಮತ ಚಲಾಯಿಸಿರುವುದು ವಿಜಯಕ್ಕೆ ಮುಖ್ಯ ಕಾರಣವಾಗಿದೆ.
‘ಜಂಗಲ್ ರಾಜ್’ ವಿರುದ್ಧ ‘ಸುಶಾಸನ’ ಪ್ರಚಾರಕ್ಕೆ ಜಯ
ಬಿಹಾರದಲ್ಲಿ 1990-2005ರ ಲಾಲು-ರಾಬ್ರಿ ಆಡಳಿತದ ಅವಧಿಯನ್ನು ʻನೆಪೋಟಿಸಂ, ಅಪರಾಧ ಮತ್ತು ಭ್ರಷ್ಟಾಚಾರʼದಿಂದ ಕೂಡಿದ್ದ ʻಜಂಗಲ್ ರಾಜ್ʼ ಎಂದು ಬಿಜೆಪಿ ತೀವ್ರವಾಗಿ ಟೀಕಿಸಿತ್ತು. ಆ ಕಾಲಘಟ್ಟದ ಅರಾಜಕತೆ ಮತ್ತು ಬಂದೂಕು ಸಂಸ್ಕೃತಿಯ ಕುರಿತು ಪ್ರಧಾನಿ ಮೋದಿ ಸೇರಿದಂತೆ ಎನ್‌ಡಿಎ ನಾಯಕರು ನಡೆಸಿದ ‘ಸುಶಾಸನ’ ವಿರುದ್ಧ ‘ಜಂಗಲ್ ರಾಜ್’ ಪ್ರಚಾರವು ಮತದಾರರ ಮನಸ್ಸಿನ ಮೇಲೆ ಪ್ರಬಲ ಪರಿಣಾಮ ಬೀರಿದೆ.
ಚುನಾವಣಾ ಸಮೀಕರಣಗಳು ಮತ್ತು ಜಾತಿ ಲೆಕ್ಕಾಚಾರ
ಈ ಚುನಾವಣೆಯಲ್ಲಿ ಶೇ.60ರಷ್ಟು ಬ್ರಾಹ್ಮಣ, ಭೂಮಿಹಾರ್‌, ರಜಪೂತ್‌ ಸಮುದಾಯಗಳು, ಆರ್ಥಿಕವಾಗಿ ಹಿಂದುಳಿದ ವರ್ಗಗಳ (EBC) 130ಕ್ಕೂ ಹೆಚ್ಚು ಉಪಜಾತಿಗಳು, ಯಾದವೇತರ ಸಮುದಾಯಗಳು, ಹಿಂದುಳಿದ ವರ್ಗಗಳು ಹಾಗೂ ಪರಿಶಿಷ್ಟ ಸಮುದಾಯಗಳು ಎನ್‌ಡಿಎಗೆ ಬೆಂಬಲ ಸೂಚಿಸಿವೆ. ವಿಶೇಷವಾಗಿ, ಮುಸ್ಲಿಂ ಮತದಾರರೇ ನಿರ್ಣಾಯಕರಾಗಿರುವ 36 ಕ್ಷೇತ್ರಗಳ ಪೈಕಿ 25 ಕ್ಷೇತ್ರಗಳಲ್ಲಿ ಎನ್‌ಡಿಎ ಮುನ್ನಡೆ ಕಾಯ್ದುಕೊಂಡಿರುವುದು ಮಹತ್ವದ ತಿರುವು ನೀಡಿದೆ. ಅಲ್ಲದೆ, ಚುನಾವಣಾ ಪ್ರಣಾಳಿಕೆಯಲ್ಲಿ ಘೋಷಿಸಲಾದ 1 ಕೋಟಿ ಉದ್ಯೋಗ, 7 ಎಕ್ಸ್‌ಪ್ರೆಸ್‌ವೇ, ವೈದ್ಯಕೀಯ ಕಾಲೇಜು, ಉಚಿತ ವಿದ್ಯುತ್ ಮತ್ತು ಆರೋಗ್ಯ ಯೋಜನೆಗಳಂತಹ ಭರವಸೆಗಳು ಗ್ರಾಮೀಣ ಭಾಗದ ಮತಗಳನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿವೆ.
