ಹೊಸದಿಗಂತ ಡಿಜಿಟಲ್ ಡೆಸ್ಕ್‌:
ಕಳೆದ ವರ್ಷ ನಡೆದ ತಿರುಪತಿ ಕಾಲ್ತುಳಿತ ಪ್ರಕರಣ ಮರುಕಳಿಸದಂತೆ ತಡೆಯಲು ಈ ವರ್ಷ ವೈಕುಂಠದ್ವಾರ ದರುಶನ ಮತ್ತು ಹೊಸವರ್ಷಾಚರಣೆಯ ದಿನದಂದು ದರುಶನಕ್ಕೆ ,ತಿರುಮಲ ತಿರುಪತಿ ದೇವಸ್ಥಾನ ಸ್ಪಷ್ಟವಾದ ವೇಳಾಪಟ್ಟಿಯನ್ನು ಪ್ರಕಟಿಸಿದೆ.
ಡಿಸೆಂಬರ್ 30 ರಿಂದ 10 ದಿನಗಳ ಕಾಲ ನಡೆಯಲಿರುವ ವೈಕುಂಠ ಏಕಾದಶಿ ಸಂದರ್ಭದಲ್ಲಿ ತೆರೆಯಲಾಗುವ ವೈಕುಂಠ ದ್ವಾರದ ದರ್ಶನಕ್ಕೆ ಟಿಕೆಟ್‌ಗಳನ್ನು ಟಿಟಿಡಿ ಆನ್‌ಲೈನ್‌ನಲ್ಲಿ ಲಭ್ಯವಾಗುವಂತೆ ಮಾಡಿದೆ. ಇಂದಿನಿಂದ (ನ.27) ಡಿಸೆಂಬರ್ 1 ರವರೆಗೆ ನೋಂದಣಿ ಸೌಲಭ್ಯ ಲಭ್ಯವಿರುತ್ತದೆ. ಈ ಡಿಪ್‌ನಲ್ಲಿ ಆಯ್ಕೆಯಾದ ಭಕ್ತರಿಗೆ ಸಂದೇಶ ಕಳುಹಿಸಲಾಗುತ್ತದೆ. ಅವರ ದರುಶನದ ದಿನಾಂಕ ಮತ್ತು ಸಮಯವನ್ನು ತಿಳಿಸಲಾಗುತ್ತದೆ.
ಹತ್ತು ದಿನಗಳ ಡಿಸೆಂಬರ್ 30 (ವೈಕುಂಠ ಏಕಾದಶಿ), ಡಿಸೆಂಬರ್ 31 (ವೈಕುಂಠ ದ್ವಾದಶಿ), ಮತ್ತು ಜನವರಿ 1 (ಹೊಸ ವರ್ಷ) ವೈಕುಂಠ ದ್ವಾರ ದರ್ಶನಕ್ಕಾಗಿ ಟಿಟಿಡಿ ವ್ಯಾಪಕ ವ್ಯವಸ್ಥೆಗಳನ್ನು ಮಾಡುತ್ತಿದೆ. ಕಳೆದ ವರ್ಷ ಸಂಭವಿಸಿದ ದುರಂತವನ್ನು ಗಮನದಲ್ಲಿಟ್ಟುಕೊಂಡು, ಸಾಮಾನ್ಯ ಭಕ್ತರಿಗೆ ಯಾವುದೇ ಅನಾನುಕೂಲತೆ ಉಂಟಾಗದಂತೆ ನೋಡಿಕೊಳ್ಳಲು ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ. ಅದಕ್ಕಾಗಿಯೇ ದರುಶನಕ್ಕೆ ನೋಂದಣಿಗೆ ಮೂರು ದಿನಗಳವರೆಗೆ ಅವಕಾಶ ನೀಡಲಾಗಿದೆ. ಟಿಟಿಡಿ ವೆಬ್‌ಸೈಟ್, ಮೊಬೈಲ್ ಅಪ್ಲಿಕೇಶನ್ ಮತ್ತು ಸರ್ಕಾರಿ ವಾಟ್ಸಾಪ್ ಸೇವೆಗಳ ಮೂಲಕ ನೋಂದಣಿ ಮಾಡಬಹುದು.
ವೈಕುಂಠ ದ್ವಾರ ದರುಶನ ಸಮಯದಲ್ಲಿ ಭಕ್ತರಿಗೆ ಸುಮಾರು 182 ಗಂಟೆಗಳ ಕಾಲ ಭಗವಂತನ ದರ್ಶನದ ಅವಕಾಶ ಸಿಗಲಿದೆ ಎಂದು ಟಿಟಿಡಿ ಘೋಷಿಸಿದ್ದು, ಇದರಲ್ಲಿ ಹೆಚ್ಚಿನ ಸಮಯ ಸಾಮಾನ್ಯ ಭಕ್ತರಿಗೆ ಮೀಸಲಾಗಲಿದೆ. ಸಾಮಾನ್ಯ ಭಕ್ತರಿಗೆ 164 ಗಂಟೆಗಳ ದರುಶನ ಸಮಯವನ್ನು ನಿಗದಿಪಡಿಸಲಾಗುವುದು ಎಂದು ಟಿಟಿಡಿ ಅಧ್ಯಕ್ಷರು ಘೋಷಿಸಿದ್ದಾರೆ. ತಿರುಮಲಕ್ಕೆ ಬರುವ ಭಕ್ತರು ಟಿಟಿಡಿ ಸೂಚನೆಗಳನ್ನು ಪಾಲಿಸಿ ಕ್ರಮಬದ್ಧವಾಗಿ ಮುಂದುವರಿದರೆ ಯಾವುದೇ ಸಮಸ್ಯೆ ಇರುವುದಿಲ್ಲ ಮತ್ತು ದರುಶನ ಸುಗಮವಾಗಿ ನಡೆಯುತ್ತದೆ ಎಂದು ಅವರು ಹೇಳಿದ್ದಾರೆ.
