ಏರ್‌ಬಸ್ ವಿಮಾನಗಳ ಸಂಚಾರ ತುರ್ತು ಸ್ಥಗಿತ: ಜಾಗತಿಕ ವಾಯು ಸಂಚಾರದಲ್ಲಿ ಭಾರೀ ತಲ್ಲಣ! ಅಷ್ಟಕ್ಕೂ ಆಗಿದ್ದೇನು?

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ವಿಮಾನಯಾನ ಸುರಕ್ಷತೆಯ ವಿಚಾರವು ಮತ್ತೊಮ್ಮೆ ಜಾಗತಿಕ ಮಟ್ಟದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಹಾರಾಟದ ಸಮಯದಲ್ಲಿ ಅಪರೂಪದ ತಾಂತ್ರಿಕ ದೋಷ ಕಂಡುಬಂದ ಹಿನ್ನೆಲೆಯಲ್ಲಿ Airbus ಸಂಸ್ಥೆಯ ಎ320 ಸರಣಿಯ ವಿಮಾನಗಳಿಗೆ ತಕ್ಷಣದ ಸಾಫ್ಟ್‌ವೇರ್ ಮೇಲ್ದರ್ಜೆಗೇರಿಸುವ ಕ್ರಮ ಕೈಗೊಳ್ಳಲಾಗಿದೆ.

ಈ ಅನಿರೀಕ್ಷಿತ ತೀರ್ಮಾನದಿಂದ ವಿಶ್ವದ ಅನೇಕ ದೇಶಗಳಲ್ಲಿ ವಾರಾಂತ್ಯ ಮತ್ತು ಮುಂದಿನ ಕೆಲ ದಿನಗಳವರೆಗೆ ವಿಮಾನ ಸಂಚಾರದಲ್ಲಿ ವ್ಯತ್ಯಯ ಉಂಟಾಗುವ ಸಾಧ್ಯತೆ ಇದೆ. ಭಾರತದಲ್ಲಿಯೂ IndiGo ಹಾಗೂ Air India ಸಂಸ್ಥೆಗಳು ಬಳಸುತ್ತಿರುವ ನೂರಾರು ಎ320 ವಿಮಾನಗಳು ಈ ಪ್ರಕ್ರಿಯೆಗೆ ಒಳಪಡಲಿವೆ.

ಈ ನಿರ್ಧಾರಕ್ಕೆ ಕಾರಣವಾದ ಘಟನೆ ಅಮೆರಿಕದಲ್ಲಿ ನಡೆದಿದ್ದು, ಒಂದು ಎ320 ವಿಮಾನ ಹಾರಾಟದ ಮಧ್ಯೆ ಅನಿಯಂತ್ರಿತವಾಗಿ ಕೆಳಮುಖವಾಗಿ ಚಲಿಸಿದ ಅನುಭವವನ್ನು ಪೈಲಟ್ ವರದಿ ಮಾಡಿದ್ದರು. ಈ ಪ್ರಕರಣದ ಬಳಿಕ ತಾಂತ್ರಿಕ ಪರಿಶೀಲನೆ ನಡೆಸಿದ ಅಧಿಕಾರಿಗಳು, ಹಾರಾಟ ನಿಯಂತ್ರಣ ಕಂಪ್ಯೂಟರ್‌ಗೆ ಸಂಬಂಧಿಸಿದ ದೋಷ ಕಂಡುಬಂದಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಇದರ ಹಿನ್ನೆಲೆಯಲ್ಲಿ ಸುಮಾರು 6,000 ಎ320 ವಿಮಾನಗಳಿಗೆ ತಕ್ಷಣದ ದುರಸ್ತಿ ಅವಶ್ಯಕವಾಗಿದೆ ಎನ್ನಲಾಗಿದೆ.

ಈ ಸಂಬಂಧ European Union Aviation Safety Agency ತುರ್ತು ಸುರಕ್ಷತಾ ಸೂಚನೆಗಳನ್ನು ಹೊರಡಿಸಿದ್ದು, ಪ್ರಯಾಣಿಕರ ಸುರಕ್ಷತೆಯೇ ಮೊದಲ ಆದ್ಯತೆ ಎಂದು ತಿಳಿಸಿದೆ. ಭಾರತದಲ್ಲಿಯ ಹೆಚ್ಚಿನ ವಿಮಾನಗಳು ಹೊಸ ಮಾದರಿಯದ್ದಾಗಿರುವುದರಿಂದ, ಅಪ್‌ಡೇಟ್ ಪ್ರಕ್ರಿಯೆ ಎರಡು–ಮೂರು ದಿನಗಳಲ್ಲಿ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.