ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಅರ್ಜೆಂಟೀನಾದ ಫುಟ್ಬಾಲ್ ದಂತಕಥೆ ಲಿಯೋನೆಲ್ ಮೆಸ್ಸಿ ಅವರ ಭಾರತ ಭೇಟಿ ‘ಗೋಟ್ ಟೂರ್’ ಭಾಗವಾಗಿ ಕೋಲ್ಕತ್ತಾದ ಸಾಲ್ಟ್ ಲೇಕ್ ಕ್ರೀಡಾಂಗಣದಲ್ಲಿ ಆಯೋಜಿಸಲಾಗಿದ್ದ ಕಾರ್ಯಕ್ರಮವು ಅವಿಸ್ಮರಣೀಯ ಕ್ಷಣವಾಗಬೇಕಿತ್ತು. ಆದರೆ, ಕಾರ್ಯಕ್ರಮದ ಕಳಪೆ ನಿರ್ವಹಣೆ ಮತ್ತು ವಿಐಪಿಗಳ ಅತಿಯಾದ ಹಸ್ತಕ್ಷೇಪದಿಂದಾಗಿ ಇಡೀ ಘಟನೆ ರಣಾಂಗಣದ ಸ್ವರೂಪ ಪಡೆದು ದುರಂತದಲ್ಲಿ ಕೊನೆಗೊಂಡಿತು.
ಮೆಸ್ಸಿ ಅವರನ್ನು ಕಣ್ತುಂಬಿಕೊಳ್ಳಲು 4,000ಕ್ಕೂ ಹೆಚ್ಚು ಬೆಲೆಯ ಟಿಕೆಟ್ಗಳನ್ನು ಖರೀದಿಸಿದ್ದ ಲಕ್ಷಾಂತರ ಅಭಿಮಾನಿಗಳು, ಆಯೋಜನೆಯ ವೈಫಲ್ಯದಿಂದ ರೊಚ್ಚಿಗೆದ್ದು ದಾಂಧಲೆ ನಡೆಸಿದರು. ಒಂದು ಗಂಟೆ ನಿಗದಿಯಾಗಿದ್ದ ಈ ಕಾರ್ಯಕ್ರಮದಲ್ಲಿ ಮೆಸ್ಸಿ ಕೇವಲ 22 ನಿಮಿಷಗಳಲ್ಲಿಯೇ ವೇದಿಕೆಯಿಂದ ನಿರ್ಗಮಿಸಿದ್ದು ಭಾರೀ ಕುತೂಹಲಕ್ಕೆ ಕಾರಣವಾಗಿತ್ತು.
ಸಾಲ್ಟ್ ಲೇಕ್ ಕ್ರೀಡಾಂಗಣದಲ್ಲಿ 50,000ಕ್ಕೂ ಹೆಚ್ಚು ಅಭಿಮಾನಿಗಳೊಂದಿಗೆ ರಾಜಕಾರಣಿಗಳು ಮತ್ತು ವಿವಿಐಪಿಗಳ ದಂಡೇ ನೆರೆದಿತ್ತು. ಬೆಳಗ್ಗೆ 8 ಗಂಟೆಯಿಂದ ಕಾದು ಕುಳಿತಿದ್ದ ಅಭಿಮಾನಿಗಳು, ಬೆಳಗ್ಗೆ 11 ಗಂಟೆಗೆ ಇಂಟರ್ ಮಿಯಾಮಿ ತಂಡದ ಸಹ ಆಟಗಾರರಾದ ಲೂಯಿಸ್ ಸುವಾರೆಜ್ ಮತ್ತು ರೊಡ್ರಿಗೋ ಡಿ ಪಾಲ್ ಅವರೊಂದಿಗೆ ಮೈದಾನಕ್ಕೆ ಆಗಮಿಸಿದ ಮೆಸ್ಸಿಯನ್ನು ಕಂಡು ಹರ್ಷೋದ್ಗಾರ ಮಾಡಿದರು.
ಆದರೆ, ಅಭಿಮಾನಿಗಳ ಸಂತೋಷ ಕ್ಷಣಿಕವಾಗಿತ್ತು. ಕ್ರೀಡಾಂಗಣಕ್ಕೆ ಬಂದ ಕೂಡಲೇ ವಿಐಪಿಗಳ ದೊಡ್ಡ ಗುಂಪು ಮೆಸ್ಸಿಯನ್ನು ಸುತ್ತುವರಿಯಿತು. ವಿಐಪಿಗಳು ತಮ್ಮ ಹಾಗೂ ತಮ್ಮ ಕುಟುಂಬ ಸದಸ್ಯರೊಂದಿಗೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಮುಗಿಬಿದ್ದರು, ಕೆಲವರಿಗೆ ಆಟೋಗ್ರಾಫ್ಗಳನ್ನು ಸಹ ಪಡೆದರು. ದುಬಾರಿ ಟಿಕೆಟ್ ಖರೀದಿಸಿ ಬಂದಿದ್ದ ಸಾಮಾನ್ಯ ಅಭಿಮಾನಿಗಳಿಗೆ ಮೆಸ್ಸಿ ಅವರ ಮುಖವನ್ನೂ ಸರಿಯಾಗಿ ನೋಡಲು ಸಾಧ್ಯವಾಗಲಿಲ್ಲ.
ಕಾರ್ಯಕ್ರಮದ ಆಯೋಜಕರು ಪದೇ ಪದೇ ವಿಐಪಿ ಗುಂಪನ್ನು ನಿಯಂತ್ರಿಸಲು ಹಾಗೂ ಮೆಸ್ಸಿಯನ್ನು ಏಕಾಂಗಿಯಾಗಿ ಬಿಡಲು ವಿನಂತಿಸಿದರೂ, ಅವರ ಮನವಿಯನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಲಾಯಿತು. ಅಂತಿಮವಾಗಿ, ವಿಐಪಿಗಳ ಅನಿಯಂತ್ರಿತ ನಡವಳಿಕೆ ಮತ್ತು ಹೆಚ್ಚಿದ ನೂಕುನುಗ್ಗಲಿನಿಂದಾಗಿ ಭದ್ರತಾ ಪರಿಸ್ಥಿತಿ ಹದಗೆಟ್ಟಿತು. ಯಾವುದೇ ಅಹಿತಕರ ಘಟನೆ ನಡೆಯದಂತೆ, ಮೆಸ್ಸಿಯವರನ್ನು ನಿಗದಿತ ಸಮಯಕ್ಕಿಂತ ಬಹಳ ಮುಂಚೆಯೇ ಸ್ಥಳದಿಂದ ಕರೆದುಕೊಂಡು ಹೋಗಬೇಕಾಯಿತು.
ಮೆಸ್ಸಿ ನಿರ್ಗಮಿಸಿದ ನಂತರ, ಸರಿಯಾಗಿ ದಂತಕಥೆಯನ್ನು ನೋಡಲು ಸಿಗದಿರುವಿಕೆ ಮತ್ತು ಕಳಪೆ ಆಯೋಜನೆಯಿಂದಾಗಿ ರೊಚ್ಚಿಗೆದ್ದ ಪ್ರೇಕ್ಷಕರು ಕ್ರೀಡಾಂಗಣದಲ್ಲಿ ದಾಂಧಲೆ ನಡೆಸಿದರು. ಅಂತರರಾಷ್ಟ್ರೀಯ ಮಟ್ಟದ ಈ ಕಾರ್ಯಕ್ರಮವು, ಆಯೋಜಕರ ನಿರ್ವಹಣಾ ಲೋಪ ಮತ್ತು ವಿಐಪಿಗಳ ವರ್ತನೆಯಿಂದಾಗಿ ಮಹಾನ್ ಫುಟ್ಬಾಲ್ ತಾರೆಯೊಬ್ಬರ ದುರದೃಷ್ಟಕರ ಭೇಟಿಯಾಗಿ ಪರಿಣಮಿಸಿತು.
