ಇತ್ತೀಚಿನ ದಿನಗಳಲ್ಲಿ ಹಲ್ಲು ಹುಳುಕು ಹಿಡಿಯುವುದು ಕೇವಲ ಒಂದು ಆರೋಗ್ಯ ಸಮಸ್ಯೆಯಲ್ಲ, ಜೀವನಶೈಲಿಯ ಭಾಗವಾಗಿಯೇ ಬದಲಾಗುತ್ತಿದೆ. ವಯಸ್ಸಿನ ಅಂತರವಿಲ್ಲದೆ ಮಕ್ಕಳಿಂದ ಹಿಡಿದು ವಯಸ್ಕರವರೆಗೂ ಈ ಸಮಸ್ಯೆ ಕಾಡುತ್ತಿದೆ. ಆರಂಭದಲ್ಲಿ ಗಮನಿಸದ ಹಲ್ಲಿನ ಸಣ್ಣ ತೊಂದರೆಗಳು, ಮುಂದೆ ತೀವ್ರ ನೋವು, ಸೋಂಕು ಮತ್ತು ಹಲ್ಲು ತೆಗೆಸಿಕೊಳ್ಳುವ ಪರಿಸ್ಥಿತಿಗೂ ಕಾರಣವಾಗುತ್ತವೆ. ಆದರೆ ಇನ್ನೂ ಹಲವರಿಗೆ ಹಲ್ಲು ಹುಳುಕಿನ ನಿಜವಾದ ಕಾರಣಗಳು ತಿಳಿದಿಲ್ಲ.
ಹೆಚ್ಚಾಗಿ ಸಿಹಿ ತಿನ್ನುವುದೇ ಹಲ್ಲು ಹುಳುಕಿಗೆ ಕಾರಣ ಎಂಬ ನಂಬಿಕೆ ಇದೆ. ವಾಸ್ತವದಲ್ಲಿ ಸಕ್ಕರೆ ನೇರವಾಗಿ ಹಲ್ಲು ಹಾಳು ಮಾಡುವುದಿಲ್ಲ. ಹಲ್ಲಿನ ಮೇಲೆ ಉಳಿಯುವ ಸಕ್ಕರೆ ಅಂಶವನ್ನು ಬ್ಯಾಕ್ಟೀರಿಯಾಗಳು ಆಹಾರವಾಗಿ ಬಳಸಿಕೊಂಡು ಆಮ್ಲವನ್ನು ಉತ್ಪಾದಿಸುತ್ತವೆ. ಈ ಆಮ್ಲವೇ ಹಲ್ಲಿನ ಮೇಲಿನ ಎನಾಮೆಲ್ ಅನ್ನು ಹಾಳುಮಾಡಿ ಹುಳುಕು ಹುಟ್ಟಿಸುತ್ತದೆ.
ಹಲ್ಲುಜ್ಜಿದರೆ ಸಾಕು ಎಂಬ ಭಾವನೆ ತಪ್ಪು. ಗಟ್ಟಿಯಾಗಿ ಹಲ್ಲು ಉಜ್ಜುವುದರಿಂದ ಹಲ್ಲಿನ ಮೇಲ್ತ್ವಚೆ ಸವೆದು, ಒಸಡುಗಳಿಗೆ ಹಾನಿಯಾಗಬಹುದು. ಮೃದುವಾದ ಬ್ರಷ್ ಬಳಸಿ ಸರಿಯಾದ ವಿಧಾನದಲ್ಲಿ ಹಲ್ಲುಜ್ಜುವುದು ಅತ್ಯಂತ ಅಗತ್ಯ.
ಚಾಕೊಲೇಟ್ ತಿಂದರೆ ತಪ್ಪೇನಿಲ್ಲ:
ಚಾಕೊಲೇಟ್ ತಿಂದರೆ ಹಲ್ಲು ಖಂಡಿತ ಹುಳುಕಾಗುತ್ತದೆ ಎನ್ನುವುದು ಸತ್ಯವಲ್ಲ. ಚಾಕೊಲೇಟ್ ಸೇವಿಸಿದ ಬಳಿಕ ಹಲ್ಲು ಸ್ವಚ್ಛವಾಗಿಟ್ಟರೆ ಸಮಸ್ಯೆ ಕಡಿಮೆಯಾಗುತ್ತದೆ. ಕಡಿಮೆ ಸಕ್ಕರೆಯ ಚಾಕೊಲೇಟ್ ಆಯ್ಕೆ ಕೂಡ ಸಹಾಯಕ.
ಮಕ್ಕಳಲ್ಲಿ ಹಲ್ಲು ಹುಳುಕು ಹೆಚ್ಚಾಗಲು ಕಾರಣ:
ಮಕ್ಕಳಲ್ಲಿ ಹಲ್ಲು ಹುಳುಕು ಹೆಚ್ಚಾಗಲು ಸರಿಯಾದ ಬಾಯಿ ಸ್ವಚ್ಛತೆ ಕೊರತೆ, ರಾತ್ರಿ ಹಾಲು ಕುಡಿದು ಹಲ್ಲು ತೊಳೆಯದಿರುವುದು ಪ್ರಮುಖ ಕಾರಣಗಳಾಗಿವೆ. ಆರಂಭದಲ್ಲೇ ಜಾಗೃತಿ ಅಗತ್ಯ.
ದಿನಕ್ಕೆ ಕನಿಷ್ಠ ಎರಡು ಬಾರಿ ಹಲ್ಲುಜ್ಜುವುದು, ಸಿಹಿ ತಿಂದ ಬಳಿಕ ಬಾಯಿ ತೊಳೆಯುವುದು ಮತ್ತು ನಿಯಮಿತವಾಗಿ ದಂತವೈದ್ಯರನ್ನು ಭೇಟಿಯಾಗುವುದು ಹಲ್ಲಿನ ಆರೋಗ್ಯ ಕಾಪಾಡುವ ಸರಳ ಮಾರ್ಗಗಳಾಗಿವೆ.(Disclaimer: ಈ ಲೇಖನವು ಅಂತರ್ಜಾಲ ಮೂಲಗಳಿಂದ ಸಂಗ್ರಹಿಸಿದ ಮಾಹಿತಿಯಾಧಾರಿತವಾಗಿದೆ. ಇದು ವೈದ್ಯಕೀಯ ಸಲಹೆಯಲ್ಲ. ಹೆಚ್ಚಿನ ಮಾಹಿತಿಗಾಗಿ ತಜ್ಞರನ್ನು ಸಂಪರ್ಕಿಸಿ.)
