ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಟೀಮ್ ಇಂಡಿಯಾದ ಉದಯೋನ್ಮುಖ ವೇಗಿ ಹರ್ಷಿತ್ ರಾಣಾ ತಮ್ಮ ಮಾರಕ ಬೌಲಿಂಗ್ ಮೂಲಕ ನ್ಯೂಜಿಲೆಂಡ್ ಬ್ಯಾಟರ್ಗಳಿಗೆ ನಡುಕ ಹುಟ್ಟಿಸಿದ್ದಾರೆ. ಕಿವೀಸ್ ವಿರುದ್ಧದ ಏಕದಿನ ಸರಣಿಯಲ್ಲಿ ಅಮೋಘ ಪ್ರದರ್ಶನ ನೀಡುತ್ತಿರುವ ಹರ್ಷಿತ್, ಸರಣಿಯ ಉದ್ದಕ್ಕೂ ಸ್ಥಿರತೆ ಕಾಯ್ದುಕೊಳ್ಳುವ ಮೂಲಕ ಆಯ್ಕೆಗಾರರ ನಂಬಿಕೆಯನ್ನು ನಿಜ ಮಾಡಿದ್ದಾರೆ.
ವಿಶೇಷವೆಂದರೆ, ಇಂದೋರ್ನ ಹೋಳ್ಕರ್ ಕ್ರೀಡಾಂಗಣದಲ್ಲಿ ನಡೆದ ಅಂತಿಮ ಪಂದ್ಯದಲ್ಲಿ ಹರ್ಷಿತ್ ರಾಣಾ ಅಪರೂಪದ ‘ವಿಕೆಟ್ ಹ್ಯಾಟ್ರಿಕ್’ ಸಾಧನೆ ಮಾಡಿದ್ದಾರೆ. ಇದು ಒಂದೇ ಪಂದ್ಯದ ಸತತ ಎಸೆತಗಳಲ್ಲಿ ಪಡೆದ ಹ್ಯಾಟ್ರಿಕ್ ಅಲ್ಲ, ಬದಲಾಗಿ ಸರಣಿಯ ಮೂರೂ ಪಂದ್ಯಗಳಲ್ಲಿ ಒಂದೇ ಬ್ಯಾಟರ್ ಅನ್ನು ಔಟ್ ಮಾಡಿದ ವಿಶೇಷ ಸಾಧನೆಯಾಗಿದೆ.
ಪಂದ್ಯದ ಎರಡನೇ ಓವರ್ನಲ್ಲಿಯೇ ಚೆಂಡು ಕೈಗೆತ್ತಿಕೊಂಡ ಹರ್ಷಿತ್ ರಾಣಾ, ಮೊದಲ ಎಸೆತದಲ್ಲೇ ನ್ಯೂಜಿಲೆಂಡ್ನ ಅಪಾಯಕಾರಿ ಆರಂಭಿಕ ಬ್ಯಾಟರ್ ಡೆವೊನ್ ಕಾನ್ವೇ ಅವರನ್ನು ಪೆವಿಲಿಯನ್ಗೆ ಅಟ್ಟಿದರು. ಇದು ಕೇವಲ ಒಂದು ವಿಕೆಟ್ ಆಗಿರಲಿಲ್ಲ, ಬದಲಿಗೆ ಈ ಸರಣಿಯ ಸತತ ಮೂರೂ ಪಂದ್ಯಗಳಲ್ಲಿ ಕಾನ್ವೇ ಅವರನ್ನು ಔಟ್ ಮಾಡುವ ಮೂಲಕ ಹರ್ಷಿತ್ ‘ವಿಶೇಷ ಹ್ಯಾಟ್ರಿಕ್’ ಪೂರ್ಣಗೊಳಿಸಿದರು.
ಒಟ್ಟಾರೆಯಾಗಿ, ಇಡೀ ಸರಣಿಯಲ್ಲಿ ಕಾನ್ವೇ ಅವರ ಪಾಲಿಗೆ ಹರ್ಷಿತ್ ರಾಣಾ ಅಕ್ಷರಶಃ ಸಿಂಹಸ್ವಪ್ನವಾಗಿ ಪರಿಣಮಿಸಿದ್ದಾರೆ. ಯುವ ವೇಗಿಯ ಈ ಅಮೋಘ ಫಾರ್ಮ್ ಭಾರತೀಯ ಕ್ರಿಕೆಟ್ನ ಭವಿಷ್ಯದ ದೃಷ್ಟಿಯಿಂದ ಆಶಾದಾಯಕವಾಗಿದೆ.
