ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಗಾಜಾದಲ್ಲಿ ನಡೆದ ಭೀಕರ ಯುದ್ಧದ ನಂತರದ ಪರಿಸ್ಥಿತಿಯನ್ನು ಸಮರ್ಪಕವಾಗಿ ನಿರ್ವಹಿಸಲು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೊಸ ಪ್ರಯತ್ನಗಳು ಆರಂಭವಾಗಿವೆ. ಯುದ್ಧಾನಂತರ ಆಡಳಿತ ವ್ಯವಸ್ಥೆ, ಮಾನವೀಯ ನೆರವು ಮತ್ತು ಮೂಲಸೌಕರ್ಯ ಪುನರ್ನಿರ್ಮಾಣವನ್ನು ಮೇಲ್ವಿಚಾರಣೆ ಮಾಡುವ ಉದ್ದೇಶದಿಂದ ರೂಪಿಸಲಾಗಿರುವ ಅಂತಾರಾಷ್ಟ್ರೀಯ ‘ಗಾಜಾ ಶಾಂತಿ ಮಂಡಳಿ’ಗೆ ಭಾರತವನ್ನು ಸೇರಿಸಿಕೊಳ್ಳಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಆಹ್ವಾನ ನೀಡಿದ್ದಾರೆ.
ಇಸ್ರೇಲ್–ಹಮಾಸ್ ನಡುವಿನ ಇತ್ತೀಚಿನ ಕದನ ವಿರಾಮದ ಬಳಿಕ ಗಾಜಾದಲ್ಲಿ ಸ್ಥಿರತೆ ತರುವ ಗುರಿಯೊಂದಿಗೆ ಈ ಮಂಡಳಿ ರಚಿಸಲಾಗಿದೆ. ತಾಂತ್ರಿಕ ಪ್ಯಾಲೆಸ್ಟೀನಿಯನ್ ಆಡಳಿತದ ಸ್ಥಾಪನೆ, ಮಾನವೀಯ ಸಹಾಯ ವಿತರಣೆ ಹಾಗೂ ಪುನರ್ನಿರ್ಮಾಣ ಕಾರ್ಯಗಳಿಗೆ ದಿಕ್ಕು ನೀಡುವುದು ಈ ಮಂಡಳಿಯ ಪ್ರಮುಖ ಜವಾಬ್ದಾರಿಯಾಗಿದೆ. ಟ್ರಂಪ್ ಅವರ ಗಾಜಾ ಶಾಂತಿ ಯೋಜನೆಯ 20 ಅಂಶಗಳ ಭಾಗವಾಗಿ ಜನವರಿ 15ರಂದು ಈ ಮಂಡಳಿಗೆ ರೂಪುರೇಷೆ ನೀಡಲಾಗಿದೆ.
ಭಾರತದ ಜೊತೆಗೆ ಅರ್ಜೆಂಟೀನಾ, ಕೆನಡಾ, ಈಜಿಪ್ಟ್, ಟರ್ಕಿ, ಅಲ್ಬೇನಿಯಾ, ಸೈಪ್ರಸ್ ಮತ್ತು ಪಾಕಿಸ್ತಾನ ಸೇರಿದಂತೆ ಹಲವು ದೇಶಗಳಿಗೆ ಆಹ್ವಾನ ನೀಡಲಾಗಿದೆ. ಪಾಕಿಸ್ತಾನ ಆಹ್ವಾನವನ್ನು ಸ್ವೀಕರಿಸಿದೆ ಎನ್ನಲಾಗಿದೆ. ಆದರೆ ಟ್ರಂಪ್ ಅವರ ಆಹ್ವಾನಕ್ಕೆ ಭಾರತ ಇನ್ನೂ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.
ಶ್ವೇತಭವನದ ಮಾಹಿತಿಯಂತೆ, ಈ ಶಾಂತಿ ಮಂಡಳಿ ಗಾಜಾದ ಯುದ್ಧಾನಂತರದ ಪರಿವರ್ತನೆಯನ್ನು ನಿರ್ವಹಿಸುವ ಕೇಂದ್ರ ಸಂಸ್ಥೆಯಾಗಿ ಕಾರ್ಯನಿರ್ವಹಿಸಲಿದೆ. ಹೂಡಿಕೆ ಸಂಗ್ರಹ, ಆಡಳಿತ ಸಾಮರ್ಥ್ಯ ವೃದ್ಧಿ ಮತ್ತು ಪ್ರಾದೇಶಿಕ ಸಹಕಾರಕ್ಕೆ ಇದು ಒತ್ತು ನೀಡಲಿದೆ. ಮಂಡಳಿಯಲ್ಲಿ ಅಮೆರಿಕದ ಉನ್ನತ ಅಧಿಕಾರಿಗಳು, ಮಾಜಿ ಯುಕೆ ಪ್ರಧಾನಿ ಟೋನಿ ಬ್ಲೇರ್, ವಿಶ್ವಬ್ಯಾಂಕ್ ಅಧ್ಯಕ್ಷ ಅಜಯ್ ಬಂಗಾ ಸೇರಿದಂತೆ ಹಲವು ಪ್ರಮುಖರು ಸದಸ್ಯರಾಗಿದ್ದಾರೆ.
