ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಗಣರಾಜ್ಯೋತ್ಸವದ ಶುಭ ಸಂದರ್ಭದಲ್ಲಿ ದೇಶದ ವಿವಿಧ ಭದ್ರತಾ ಪಡೆಗಳ ಒಟ್ಟು 982 ಸಿಬ್ಬಂದಿಗೆ ಶೌರ್ಯ ಮತ್ತು ಸೇವಾ ಪದಕಗಳನ್ನು ಘೋಷಿಸಲಾಗಿದೆ. ಈ ಪೈಕಿ ಪೊಲೀಸ್, ಅಗ್ನಿಶಾಮಕ ದಳ, ಗೃಹರಕ್ಷಕ ದಳ ಹಾಗೂ ನಾಗರಿಕ ರಕ್ಷಣಾ ವಿಭಾಗದ ಸಿಬ್ಬಂದಿ ಸೇರಿದ್ದಾರೆ ಎಂದು ಕೇಂದ್ರ ಗೃಹ ಸಚಿವಾಲಯ ತಿಳಿಸಿದೆ.
ಒಟ್ಟು 982 ಪದಕಗಳಲ್ಲಿ ಪ್ರಮುಖವಾಗಿ 125 ಶೌರ್ಯ ಪದಕಗಳನ್ನು ನೀಡಲಾಗಿದೆ. ಉಳಿದಂತೆ:
102: ರಾಷ್ಟ್ರಪತಿಗಳ ವಿಶಿಷ್ಟ ಸೇವಾ ಪದಕಗಳು (PSM)
755: ಶ್ಲಾಘನೀಯ ಸೇವಾ ಪದಕಗಳು (MSM)
ಈ ಬಾರಿಯ ಶೌರ್ಯ ಪದಕಗಳ ಪಟ್ಟಿಯಲ್ಲಿ ಜಮ್ಮು ಮತ್ತು ಕಾಶ್ಮೀರದ ಪೊಲೀಸರು ಮೇಲುಗೈ ಸಾಧಿಸಿದ್ದಾರೆ. ಕಠಿಣ ಪರಿಸ್ಥಿತಿಗಳಲ್ಲಿ ಕಾರ್ಯನಿರ್ವಹಿಸಿದ ಸಿಬ್ಬಂದಿಗೆ ಹೆಚ್ಚಿನ ಆದ್ಯತೆ ನೀಡಲಾಗಿದ್ದು, ವಿವರಗಳು ಹೀಗಿವೆ:
ಜಮ್ಮು ಮತ್ತು ಕಾಶ್ಮೀರ ಪೊಲೀಸ್: 31 ಪದಕಗಳು.
ಮಹಾರಾಷ್ಟ್ರ ಪೊಲೀಸ್: 31 ಪದಕಗಳು.
ಉತ್ತರ ಪ್ರದೇಶ: 17 ಪದಕಗಳು.
ದೆಹಲಿ: 14 ಪದಕಗಳು.
ನಕ್ಸಲ್ ಪೀಡಿತ ಪ್ರದೇಶಗಳಲ್ಲಿ ಸಾಹಸ ಮೆರೆದ 35 ಸಿಬ್ಬಂದಿ ಹಾಗೂ ಈಶಾನ್ಯ ರಾಜ್ಯಗಳಲ್ಲಿ ಕಾರ್ಯಾಚರಣೆ ನಡೆಸಿದ 5 ಸಿಬ್ಬಂದಿಗೂ ಶೌರ್ಯ ಪದಕ ಸಂದಿದೆ. ವಿಶೇಷವೆಂದರೆ, ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಗಳ (CAPF) ಪೈಕಿ CRPF ಮಾತ್ರ 12 ಶೌರ್ಯ ಪದಕಗಳನ್ನು ತನ್ನದಾಗಿಸಿಕೊಂಡಿದೆ.
ಕೇವಲ ಪೊಲೀಸ್ ಪಡೆ ಮಾತ್ರವಲ್ಲದೆ, ಪ್ರಾಣದ ಹಂಗು ತೊರೆದು ಜನರನ್ನು ರಕ್ಷಿಸಿದ ನಾಲ್ವರು ಅಗ್ನಿಶಾಮಕ ಸಿಬ್ಬಂದಿಗೂ ಈ ಬಾರಿ ಶೌರ್ಯ ಪದಕ ನೀಡಿ ಗೌರವಿಸಲಾಗಿದೆ. ದೇಶದ ಸುರಕ್ಷತೆ ಮತ್ತು ಶಾಂತಿಗಾಗಿ ಶ್ರಮಿಸಿದ ಈ ಎಲ್ಲಾ ವೀರರಿಗೆ ಗಣರಾಜ್ಯೋತ್ಸವದಂದು ಅಧಿಕೃತವಾಗಿ ಪದಕ ವಿತರಿಸಲಾಗುವುದು.
