ಹೊಸದಿಗಂತ ಡಿಜಿಟಲ್ ಡೆಸ್ಕ್:
ದೇಶದ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಒಂದಾನೊಂದು ಕಾಲಕ್ಕೆ ಅಧಿಪತ್ಯ ಸ್ಥಾಪಿಸಿದ್ದ ಓಲಾ ಎಲೆಕ್ಟ್ರಿಕ್, ಈಗ ತೀವ್ರ ಸಂಕಷ್ಟಕ್ಕೆ ಸಿಲುಕಿದೆ. ಕೇವಲ ಒಂದು ವರ್ಷದ ಹಿಂದೆ ದೇಶಾದ್ಯಂತ 4,000 ಮಾರಾಟ ಮಳಿಗೆಗಳನ್ನು ತೆರೆಯುವ ಮಹತ್ವಾಕಾಂಕ್ಷೆ ಹೊಂದಿದ್ದ ಕಂಪನಿ, ಈಗ ಅನಿವಾರ್ಯವಾಗಿ ತನ್ನ ಶೋರೂಂ ಸಂಖ್ಯೆಯನ್ನು ಕಡಿತಗೊಳಿಸುತ್ತಿದೆ.
ಈಗಾಗಲೇ ತನ್ನ ಶೋರೂಂ ಸಂಖ್ಯೆಯನ್ನು 700ಕ್ಕೆ ಇಳಿಸಿರುವ ಓಲಾ, ಮಾರ್ಚ್ ಅಂತ್ಯದ ವೇಳೆಗೆ ಇದನ್ನು 550ಕ್ಕೆ ಸೀಮಿತಗೊಳಿಸಲು ನಿರ್ಧರಿಸಿದೆ.
ಶೋರೂಂಗಳನ್ನು ಮುಚ್ಚುತ್ತಿರುವ ಹಿನ್ನೆಲೆಯಲ್ಲಿ ಅನೇಕ ಉದ್ಯೋಗಿಗಳಿಗೆ ಕೆಲಸ ಬಿಡುವಂತೆ ಸೂಚಿಸಲಾಗಿದೆ ಎಂದು ವರದಿಗಳು ತಿಳಿಸಿವೆ.
‘ವಾಹನ್’ ಪೋರ್ಟಲ್ ಮಾಹಿತಿಯಂತೆ, ಕಳೆದ ವರ್ಷ 26% ರಷ್ಟಿದ್ದ ಓಲಾದ ಮಾರುಕಟ್ಟೆ ಪಾಲು ಪ್ರಸ್ತುತ ಕೇವಲ 6.3% ಕ್ಕೆ ಕುಸಿದಿದೆ. ಫೆಬ್ರವರಿ ತಿಂಗಳ ಮೊದಲ 18 ದಿನಗಳಲ್ಲಿ ಕೇವಲ 2,575 ವಾಹನಗಳು ಮಾತ್ರ ಮಾರಾಟವಾಗಿವೆ.
ಟಿವಿಎಸ್ ಮೋಟಾರ್, ಬಜಾಜ್ ಆಟೋ, ಹೀರೋ ಮೋಟೋಕಾರ್ಪ್ ಮತ್ತು ಎಥರ್ ಎನರ್ಜಿಯಂತಹ ದೈತ್ಯ ಸಂಸ್ಥೆಗಳು ಅತ್ಯುತ್ತಮ ಪೈಪೋಟಿ ನೀಡುತ್ತಿರುವುದು ಓಲಾದ ಈ ಹಿನ್ನಡೆಗೆ ಮುಖ್ಯ ಕಾರಣ ಎನ್ನಲಾಗಿದೆ.
