ಫ್ರಿಡ್ಜ್ನ ಕೆಳಭಾಗದಲ್ಲಿ ನೀರು ಕಾಣಿಸಿಕೊಳ್ಳುವುದು ಸಾಮಾನ್ಯ ಸಮಸ್ಯೆಯಾದರೂ, ಅದನ್ನು ನಿರ್ಲಕ್ಷಿಸಿದರೆ ದೊಡ್ಡ ತೊಂದರೆಗೆ ಕಾರಣವಾಗಬಹುದು. ಆದರೆ ಪ್ರತಿಯೊಂದು ಲೀಕ್ಗೂ ಮೆಕ್ಯಾನಿಕ್ ಅನ್ನು ಕರೆಸುವ ಅಗತ್ಯವಿಲ್ಲ. ಕೆಲವೊಮ್ಮೆ ಸಣ್ಣ ಕಾರಣಗಳಿಂದಲೇ ಈ ಸಮಸ್ಯೆ ಉಂಟಾಗುತ್ತದೆ. ಮನೆಯಲ್ಲೇ ಕೆಲವು ಸರಳ ಪರಿಶೀಲನೆಗಳನ್ನು ಮಾಡಿದರೆ ಸಮಸ್ಯೆ ಬಗೆಹರಿಯುವ ಸಾಧ್ಯತೆ ಹೆಚ್ಚು.
ಡ್ರೇನ್ ಹೋಲ್ ಬ್ಲಾಕ್ ಆಗಿದೆಯೇ?
ಫ್ರಿಡ್ಜ್ನ ಒಳಭಾಗದಲ್ಲಿರುವ ಡ್ರೇನ್ ಹೋಲ್ನಲ್ಲಿ ಆಹಾರದ ಕಣಗಳು ಅಥವಾ ಧೂಳು ಸಿಲುಕಿದರೆ ನೀರು ಹೊರಹೋಗದೆ ಕೆಳಭಾಗಕ್ಕೆ ಹರಿಯುತ್ತದೆ. ಬೆಚ್ಚಗಿನ ನೀರು ಅಥವಾ ಸಣ್ಣ ಪ್ಲಾಸ್ಟಿಕ್ ಸ್ಟಿಕ್ ಬಳಸಿ ಅದನ್ನು ಸ್ವಚ್ಛಗೊಳಿಸಿದರೆ ಸಮಸ್ಯೆ ನಿವಾರಣೆಯಾಗಬಹುದು.
ಡೋರ್ ಸರಿಯಾಗಿ ಮುಚ್ಚುತ್ತಿದೆಯೇ ನೋಡಿ
ಫ್ರಿಡ್ಜ್ನ ಬಾಗಿಲಿನ ರಬ್ಬರ್ (ಗ್ಯಾಸ್ಕೆಟ್) ಸಡಿಲವಾಗಿದ್ದರೆ ಅಥವಾ ಹಾಳಾಗಿದ್ದರೆ ಹೊರಗಿನ ಬಿಸಿ ಗಾಳಿ ಒಳಗೆ ಪ್ರವೇಶಿಸುತ್ತದೆ. ಇದರಿಂದ ಹೆಚ್ಚುವರಿ ತೇವಾಂಶ ಉಂಟಾಗಿ ನೀರು ಸೋರಿಕೆಯಾಗಬಹುದು. ಗ್ಯಾಸ್ಕೆಟ್ನ್ನು ಸ್ವಚ್ಛಗೊಳಿಸಿ, ಅಗತ್ಯವಿದ್ದರೆ ಬದಲಾಯಿಸಿ.
ಫ್ರಿಡ್ಜ್ ಸಮತಟ್ಟಾಗಿ ಇಟ್ಟಿದ್ದೀರಾ?
ಫ್ರಿಡ್ಜ್ ಒಂದು ಬದಿಗೆ ವಾಲಿದ್ದರೆ ನೀರು ಸರಿಯಾಗಿ ಡ್ರೇನ್ ಆಗದೆ ಹೊರಗೆ ಹರಿಯಬಹುದು. ಫ್ರಿಡ್ಜ್ ಸಮತಟ್ಟಾದ ನೆಲದ ಮೇಲೆ ಇದೆಯೇ ಎಂದು ಪರಿಶೀಲಿಸಿ. ಅಗತ್ಯವಿದ್ದರೆ ಅದರ ಕಾಲುಗಳನ್ನು ಸರಿಹೊಂದಿಸಿ.
ಡ್ರೇನ್ ಟ್ರೇ ಪರಿಶೀಲಿಸಿ
ಕೆಲವು ಮಾದರಿಗಳಲ್ಲಿ ಫ್ರಿಡ್ಜ್ನ ಹಿಂಭಾಗದಲ್ಲಿ ಡ್ರೇನ್ ಟ್ರೇ ಇರುತ್ತದೆ. ಅದು ತುಂಬಿಹೋಗಿದ್ದರೆ ಅಥವಾ ಸರಿಯಾದ ಸ್ಥಾನದಲ್ಲಿರದಿದ್ದರೆ ನೀರು ಹೊರಗೆ ಬೀಳಬಹುದು. ಟ್ರೇ ಅನ್ನು ತೆಗೆದು ಸ್ವಚ್ಛಗೊಳಿಸಿ ಮತ್ತೆ ಸರಿಯಾಗಿ ಅಳವಡಿಸಿ.
ಇದನ್ನೂ ಓದಿ:
ಫ್ರೀಜರ್ನಲ್ಲಿ ಹೆಚ್ಚು ಐಸ್ ಕಟ್ಟಿದೆಯೇ?
ಅತಿಯಾಗಿ ಐಸ್ ಕಟ್ಟಿದರೆ ಕರಗುವ ನೀರು ಸರಿಯಾಗಿ ಹೊರಹೋಗದೆ ಲೀಕ್ ಆಗಬಹುದು. ಫ್ರೀಜರ್ ಅನ್ನು ಡಿಫ್ರಾಸ್ಟ್ ಮಾಡಿ ಸ್ವಚ್ಛಗೊಳಿಸಿದರೆ ಈ ಸಮಸ್ಯೆ ಕಡಿಮೆಯಾಗುತ್ತದೆ.
ಫ್ರಿಡ್ಜ್ ಅನ್ನು ಅತಿಯಾಗಿ ತುಂಬಬೇಡಿ
ಅಗತ್ಯಕ್ಕಿಂತ ಹೆಚ್ಚು ಆಹಾರ ಪದಾರ್ಥಗಳನ್ನು ತುಂಬಿದರೆ ಗಾಳಿಯ ಸಂಚಾರಕ್ಕೆ ಅಡ್ಡಿಯಾಗುತ್ತದೆ. ಇದರಿಂದ ತೇವಾಂಶ ಹೆಚ್ಚಾಗಿ ನೀರು ಸೋರಬಹುದು. ವಸ್ತುಗಳನ್ನು ಸರಿಯಾದ ಅಂತರದಲ್ಲಿ ಜೋಡಿಸಿ.
ಯಾವಾಗ ಮೆಕ್ಯಾನಿಕ್ ಅನ್ನು ಕರೆಸಬೇಕು?
ಮೇಲಿನ ಎಲ್ಲ ಕ್ರಮಗಳನ್ನು ಅನುಸರಿಸಿದರೂ ನೀರು ಸೋರಿಕೆ ನಿಲ್ಲದಿದ್ದರೆ, ಕಂಪ್ರೆಸರ್, ವಾಟರ್ ಲೈನ್ ಅಥವಾ ಒಳಭಾಗದ ತಾಂತ್ರಿಕ ದೋಷ ಇರಬಹುದು. ಅಂತಹ ಸಂದರ್ಭಗಳಲ್ಲಿ ತಜ್ಞರ ಸಹಾಯ ಪಡೆಯುವುದು ಉತ್ತಮ.
