ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕ್ರಿಕೆಟ್ ಅಭಿಮಾನಿಗಳಿಗೆ ಏಷ್ಯಾಕಪ್ ಎಂದರೆ ಭಾವನೆಗಳ ಮೇಳ. ಏಷ್ಯಾದ ಶ್ರೇಷ್ಠ ಕ್ರಿಕೆಟ್ ರಾಷ್ಟ್ರಗಳು ಒಂದೇ ವೇದಿಕೆಯಲ್ಲಿ ಮುಖಾಮುಖಿಯಾಗುವ ಈ ಟೂರ್ನಿಗೆ ದಶಕಗಳ ಇತಿಹಾಸವಿದೆ. 1984ರಲ್ಲಿ ಪ್ರಾರಂಭವಾದ ಏಷ್ಯಾಕಪ್, ಅಂದು ಏಷಿಯನ್ ಕ್ರಿಕೆಟ್ ಕೌನ್ಸಿಲ್ ಸ್ಥಾಪಿಸಿದ ತಕ್ಷಣ ಆಯೋಜಿಸಲ್ಪಟ್ಟ ಮೊದಲ ಪ್ರಮುಖ ಟೂರ್ನಮೆಂಟ್ ಆಗಿತ್ತು. ಆ ವೇಳೆ ಕೇವಲ ಮೂರು ತಂಡಗಳು – ಭಾರತ, ಪಾಕಿಸ್ತಾನ ಮತ್ತು ಶ್ರೀಲಂಕಾ – ಭಾಗವಹಿಸಿದ್ದವು.
ಕಾಲಕ್ರಮದಲ್ಲಿ ಟೂರ್ನಿಯ ವ್ಯಾಪ್ತಿ ಹೆಚ್ಚುತ್ತಾ ಬಂತು. ಬಾಂಗ್ಲಾದೇಶ, ಅಫ್ಘಾನಿಸ್ತಾನ, ಹಾಂಗ್ ಕಾಂಗ್, ಓಮನ್ ಹಾಗೂ ಯುಎಇ ತಂಡಗಳು ಕೂಡ ಈ ಕಪ್ನಲ್ಲಿ ತಮ್ಮ ಗುರುತು ಮೂಡಿಸಿವೆ. ಇನ್ನೊಂದು ವಿಶೇಷತೆ ಎಂದರೆ ಈ ಟೂರ್ನಿ ಎರಡು ವಿಭಿನ್ನ ಸ್ವರೂಪಗಳಲ್ಲಿ ನಡೆಯುತ್ತದೆ. ಕೆಲವು ಆವೃತ್ತಿಗಳು 50 ಓವರ್ಗಳ ಏಕದಿನ ಸ್ವರೂಪದಲ್ಲಿ ನಡೆದರೆ, ಇತ್ತೀಚಿನ ವರ್ಷಗಳಲ್ಲಿ ಟಿ20 ಸ್ವರೂಪದಲ್ಲಿಯೂ ಆಯೋಜಿಸಲಾಗಿದೆ. ಇದರೊಂದಿಗೆ ಏಷ್ಯಾಕಪ್ ಕೇವಲ ಪ್ರಾದೇಶಿಕ ಸ್ಪರ್ಧೆಯಷ್ಟೇ ಅಲ್ಲ, ಜಾಗತಿಕ ಕ್ರಿಕೆಟ್ನಲ್ಲಿ ಮಹತ್ವ ಪಡೆದಿದೆ.
ಇತಿಹಾಸವನ್ನು ನೋಡಿದರೆ, ಭಾರತ ಅತಿ ಹೆಚ್ಚು ಅಂದರೆ 8 ಬಾರಿ(1984, 1988, 1990-91, 1995, 2010, 2016, 2018 ಮತ್ತು 2023) ಪ್ರಶಸ್ತಿ ಗೆದ್ದು ತನ್ನ ಶ್ರೇಷ್ಠತೆಯನ್ನು ತೋರಿಸಿದೆ. ಶ್ರೀಲಂಕಾ 6 ಬಾರಿ((1986, 1997, 2004, 2008, 2014, 2022) ಮತ್ತು ಪಾಕಿಸ್ತಾನ 2 ಬಾರಿ((2000, 2012) ಕಪ್ನ್ನು ತಮ್ಮದಾಗಿಸಿಕೊಂಡಿವೆ. ಹಲವು ಬಾರಿ ಭಾರತ ಮತ್ತು ಪಾಕಿಸ್ತಾನದ ನಡುವಿನ ಹೋರಾಟವೇ ಟೂರ್ನಿಯ ಪ್ರಮುಖ ಆಕರ್ಷಣೆ ಆಗಿದೆ. ಇದೇ ಕಾರಣದಿಂದ ಏಷ್ಯಾಕಪ್ ಪ್ರತಿ ಆವೃತ್ತಿಯೂ ಅಭಿಮಾನಿಗಳ ಮನಸ್ಸಿನಲ್ಲಿ ಅಪಾರ ಕುತೂಹಲ ಮೂಡಿಸುತ್ತದೆ.
2025ರ ಏಷ್ಯಾಕಪ್ ಟಿ20 ಸ್ವರೂಪದಲ್ಲಿ ನಡೆಯುತ್ತಿದ್ದು, ಸೆಪ್ಟೆಂಬರ್ 9ರಿಂದ 28ರವರೆಗೆ ಯುನೈಟೆಡ್ ಅರಬ್ ಎಮಿರೇಟ್ಸ್ ಆತಿಥ್ಯ ವಹಿಸಿದೆ. ಈ ಬಾರಿ ಒಟ್ಟು ಎಂಟು ತಂಡಗಳು ಭಾಗವಹಿಸುತ್ತಿವೆ, ಇದರಲ್ಲಿ ಭಾರತ, ಪಾಕಿಸ್ತಾನ, ಶ್ರೀಲಂಕಾ, ಬಾಂಗ್ಲಾದೇಶ, ಅಫ್ಘಾನಿಸ್ತಾನ, ಯುಎಇ, ಓಮನ್ ಮತ್ತು ಹಾಂಗ್ ಕಾಂಗ್ ಸೇರಿವೆ. ದುಬೈ ಮತ್ತು ಅಬುಧಾಬಿ ಮುಖ್ಯ ಆತಿಥ್ಯ ನಗರಗಳಾಗಿದ್ದು, ದುಬೈನಲ್ಲಿ ಫೈನಲ್ ನಡೆಯಲಿದೆ. ವಿಶೇಷವಾಗಿ ಸೆಪ್ಟೆಂಬರ್ 14ರಂದು ಭಾರತ ಮತ್ತು ಪಾಕಿಸ್ತಾನ ನಡುವಿನ ಹೋರಾಟ ಈಗಾಗಲೇ ಅಭಿಮಾನಿಗಳಲ್ಲಿ ತೀವ್ರ ನಿರೀಕ್ಷೆ ಮೂಡಿಸಿದೆ.
