ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತೀಯ ತಂತ್ರಜ್ಞಾನ ಕ್ಷೇತ್ರದ ಪ್ರಮುಖ ಸಂಸ್ಥೆಯಾದ ಇನ್ಫೋಸಿಸ್ (Infosys) ತನ್ನ ಉನ್ನತ ಆಡಳಿತ ಮಂಡಳಿಯಲ್ಲಿ ಬೃಹತ್ ಬದಲಾವಣೆಯನ್ನು ಘೋಷಿಸಿದೆ. ಹಾಲಿ ಮ್ಯಾನೇಜಿಂಗ್ ಡೈರೆಕ್ಟರ್ ಹಾಗೂ ಸಿಇಒ ಸಲೀಲ್ ಪಾರೇಕ್ ಅವರು 2027ರ ಮಾರ್ಚ್ 31ರಂದು ತಮ್ಮ ಅಧಿಕಾರಾವಧಿಯನ್ನು ಪೂರ್ಣಗೊಳಿಸಲಿದ್ದಾರೆ. ಸಂಸ್ಥೆಯ ಮುಂದಿನ ಚುಕ್ಕಾಣಿ ಹಿಡಿಯಲು ಹಿರಿಯ ಆಡಳಿತಗಾರ ಆಶಿಶ್ ಕುಮಾರ್ ದಾಶ್ ಅವರನ್ನು ನೂತನ ‘ಸಿಇಒ ನಿಯೋಜಿತ’ (CEO Designate) ಆಗಿ ಮಂಡಳಿ ಆಯ್ಕೆ ಮಾಡಿದೆ.
ಹೊಸ ಸಿಇಒ ಅಧಿಕಾರ ಸ್ವೀಕಾರ ಮತ್ತು ಅವಧಿ
ಆಡಳಿತ ಮಂಡಳಿಯ ತೀರ್ಮಾನದಂತೆ, ಆಶಿಶ್ ಕುಮಾರ್ ದಾಶ್ ಅವರು 2027ರ ಏಪ್ರಿಲ್ 1 ರಿಂದ ಜಾರಿಗೆ ಬರುವಂತೆ 5 ವರ್ಷಗಳ ಕಾಲ ಇನ್ಫೋಸಿಸ್ನ ಎಂಡಿ ಮತ್ತು ಸಿಇಒ ಆಗಿ ಕಾರ್ಯನಿರ್ವಹಿಸಲಿದ್ದಾರೆ. 2018 ರಲ್ಲಿ ಸಂಸ್ಥೆ ಸೇರಿದ್ದ ಸಲೀಲ್ ಪಾರೇಕ್, ಇನ್ಫೋಸಿಸ್ ಸಂಸ್ಥಾಪಕರನ್ನು ಹೊರತುಪಡಿಸಿ ಅತಿ ದೀರ್ಘಾವಧಿ (9 ವರ್ಷ) ಸಿಇಒ ಆಗಿದ್ದ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಸಲೀಲ್ ಪಾರೇಕ್ ಸಾಧನೆ ಹಾಗೂ ಸುಸೂತ್ರ ಹಸ್ತಾಂತರ
ತಮ್ಮ 9 ವರ್ಷಗಳ ಯಶಸ್ವಿ ಅಧಿಕಾರಾವಧಿಯಲ್ಲಿ ಇನ್ಫೋಸಿಸ್ನ ವಾರ್ಷಿಕ ಆದಾಯವನ್ನು $10 ಬಿಲಿಯನ್ನಿಂದ $20 ಬಿಲಿಯನ್ಗಿಂತಲೂ (ಸುಮಾರು ₹1.90 ಲಕ್ಷ ಕೋಟಿ) ಹೆಚ್ಚಿಸಿದ ಕೀರ್ತಿ ಸಲೀಲ್ ಪಾರೇಕ್ ಅವರಿಗೆ ಸಲ್ಲುತ್ತದೆ. “ಇಂತಹ ಪ್ರತಿಷ್ಠಿತ ಸಂಸ್ಥೆಯನ್ನು ಮುನ್ನಡೆಸಿದ್ದು ನನ್ನ ಸೌಭಾಗ್ಯ. ಮುಂಬರುವ ತಿಂಗಳುಗಳಲ್ಲಿ ಅಧಿಕಾರ ಹಸ್ತಾಂತರ ಸುಸೂತ್ರವಾಗಿ ನಡೆಯಲು ಆಶಿಶ್ ಅವರೊಂದಿಗೆ ನಿಕಟವಾಗಿ ಶ್ರಮಿಸುತ್ತೇನೆ” ಎಂದು ಅವರು ತಿಳಿಸಿದ್ದಾರೆ.
ನೂತನ ನಾಯಕ ಆಶಿಶ್ ದಾಶ್ ಹಿನ್ನೆಲೆ
ಐಐಟಿ ಖರಗ್ಪುರದ ಹಳೆಯ ವಿದ್ಯಾರ್ಥಿಯಾಗಿರುವ ಆಶಿಶ್ ಕುಮಾರ್ ದಾಶ್, ಕಳೆದ 30ಕ್ಕೂ ಹೆಚ್ಚು ವರ್ಷಗಳಿಂದ ಇನ್ಫೋಸಿಸ್ನಲ್ಲಿ ವಿವಿಧ ಜವಾಬ್ದಾರಿಗಳನ್ನು ನಿಭಾಯಿಸಿದ್ದಾರೆ. ಪ್ರಸ್ತುತ ಅವರು ಸಂಸ್ಥೆಯ ಜಾಗತಿಕ ಇಂಧನ, ಯುಟಿಲಿಟೀಸ್ ಮತ್ತು ಸುಸ್ಥಿರತೆ ವಿಭಾಗದ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.
