ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಉಕ್ರೇನ್ ವಿರುದ್ಧ ನಡೆಯುತ್ತಿರುವ ರಷ್ಯಾದ ಯುದ್ಧಕ್ಕೆ ಆರ್ಥಿಕ ಬೆಂಬಲ ಕಡಿತಗೊಳಿಸಲು ಅಮೆರಿಕ ಮತ್ತೊಮ್ಮೆ ಕಠಿಣ ನಿಲುವು ತಾಳಿದೆ. ಚೀನಾ ಸೇರಿದಂತೆ ರಷ್ಯಾದಿಂದ ತೈಲ ಖರೀದಿ ಮಾಡುತ್ತಿರುವ ರಾಷ್ಟ್ರಗಳ ಮೇಲೆ ಸುಂಕ ವಿಧಿಸುವಂತೆ ಅಮೆರಿಕ ತನ್ನ ಜಿ7 ರಾಷ್ಟ್ರಗಳಿಗೆ ಕರೆ ನೀಡಿದೆ.
ಶುಕ್ರವಾರ ನಡೆದ ಜಿ7 ಹಣಕಾಸು ಸಚಿವರ ಸಭೆಯಲ್ಲಿ ಈ ಬಗ್ಗೆ ಚರ್ಚೆ ನಡೆದಿದ್ದು, ಕೆನಡಾ ಹಣಕಾಸು ಸಚಿವ ಫ್ರಾಂಕೋಯಿಸ್-ಫಿಲಿಪ್ ಷಾಂಪೇನ್ ಸಭೆಯ ಅಧ್ಯಕ್ಷತೆ ವಹಿಸಿದ್ದರು.
ಸಭೆಯಲ್ಲಿ ರಷ್ಯಾದ ಮೇಲೆ ಗರಿಷ್ಠ ಒತ್ತಡ ಹೇರುವ ಕ್ರಮಗಳನ್ನು ಚರ್ಚಿಸಲಾಗಿದ್ದು, ಯುದ್ಧಕ್ಕೆ ನೆರವಾಗುತ್ತಿರುವ ರಾಷ್ಟ್ರಗಳ ಮೇಲೂ ಆರ್ಥಿಕ ನಿರ್ಬಂಧ ಹಾಗೂ ಸುಂಕದಂತಹ ಕ್ರಮಗಳನ್ನು ಕೈಗೊಳ್ಳಲು ತೀರ್ಮಾನ ಕೈಗೊಳ್ಳಲಾಗಿದೆ. ಸಭೆಯ ನಂತರ ಅಮೆರಿಕದ ವ್ಯಾಪಾರ ಪ್ರತಿನಿಧಿ ಜೇಮಿಸನ್ ಗ್ರೀರ್ ಮತ್ತು ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಜಂಟಿ ಹೇಳಿಕೆ ಬಿಡುಗಡೆ ಮಾಡಿದರು. ಪುಟಿನ್‌ ಅವರ ಯುದ್ಧ ತಂತ್ರವನ್ನು ನಿಲ್ಲಿಸಲು ಹಣಕಾಸಿನ ಮಾರ್ಗಗಳನ್ನು ಕಡಿತಗೊಳಿಸುವುದು ಮುಖ್ಯ. ಅರ್ಥಹೀನ ಹತ್ಯೆ ನಿಲ್ಲಿಸಲು ಆರ್ಥಿಕ ಒತ್ತಡವೇ ಪರಿಹಾರ ಎಂದು ಅವರು ಒತ್ತಿ ಹೇಳಿದರು.
ಈ ಮೊದಲು ಕೂಡ ಅಮೆರಿಕ, ಜಿ7 ಮತ್ತು ಯುರೋಪಿಯನ್ ಒಕ್ಕೂಟ ರಾಷ್ಟ್ರಗಳಿಗೆ ರಷ್ಯಾದ ತೈಲ ಖರೀದಿಯನ್ನು ನಿಲ್ಲಿಸುವಂತೆ ಒತ್ತಡ ಹೇರಿತ್ತು. ಆದರೆ ಭಾರತ ಸೇರಿದಂತೆ ಕೆಲವು ರಾಷ್ಟ್ರಗಳು ರಷ್ಯಾದ ತೈಲವನ್ನು ಖರೀದಿಸುತ್ತಿರುವುದರಿಂದ ಅಮೆರಿಕ ಅಸಮಾಧಾನ ವ್ಯಕ್ತಪಡಿಸಿದೆ. ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡಾ ಇದೇ ವಿಷಯವನ್ನು ತೀವ್ರವಾಗಿ ವಿರೋಧಿಸಿ, ರಷ್ಯಾದ ತೈಲದ ಮೂಲಕ ಉಕ್ರೇನ್ ಯುದ್ಧಕ್ಕೆ ಹಣ ಒದಗುತ್ತಿದೆ ಎಂದು ವಾದಿಸಿದ್ದರು. ಇದರ ಭಾಗವಾಗಿ ಅಮೆರಿಕ ಕಳೆದ ಆಗಸ್ಟ್ 27ರಿಂದ ಆಮದು ಸುಂಕವನ್ನು 25ರಿಂದ 50 ಶೇಕಡಕ್ಕೆ ಏರಿಸಿತ್ತು.
ಆದರೆ, ಪಾಕಿಸ್ತಾನದ ಆಮದುಗಳ ಮೇಲೆ ಕೇವಲ 19 ಶೇಕಡ ಸುಂಕ ವಿಧಿಸಿರುವುದರಿಂದ ಅಸಮಾನತೆ ಆರೋಪವೂ ಕೇಳಿಬಂದಿದೆ. ಜಿ7 ಸಭೆಯಲ್ಲಿ ಕೈಗೊಂಡ ನಿರ್ಧಾರಗಳ ಪ್ರಕಾರ ಮುಂದಿನ ದಿನಗಳಲ್ಲಿ ರಷ್ಯಾ ಮತ್ತು ಅದರ ಬೆಂಬಲಿಗ ರಾಷ್ಟ್ರಗಳ ಮೇಲೆ ಆರ್ಥಿಕ ಒತ್ತಡ ಹೆಚ್ಚುವ ನಿರೀಕ್ಷೆಯಿದೆ.
ಈ ತೀರ್ಮಾನವು ಜಾಗತಿಕ ಇಂಧನ ಮಾರುಕಟ್ಟೆಗೆ ನೇರ ಪರಿಣಾಮ ಬೀರುವ ಸಾಧ್ಯತೆಯಿದ್ದು, ತೈಲದ ಬೆಲೆ ಏರಿಕೆಗೆ ಕಾರಣವಾಗಬಹುದು. ಉಕ್ರೇನ್ ಯುದ್ಧವನ್ನು ಶೀಘ್ರದಲ್ಲೇ ಕೊನೆಗಾಣಿಸಲು ಅಮೆರಿಕ ಮುಂದಿಟ್ಟಿರುವ ಆರ್ಥಿಕ ಒತ್ತಡ ತಂತ್ರ ಎಷ್ಟು ಪರಿಣಾಮಕಾರಿಯಾಗುತ್ತದೆ ಎಂಬುದನ್ನು ಕಾಲವೇ ನಿರ್ಧರಿಸಬೇಕು.
