ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆಸ್ಟ್ರೇಲಿಯಾದ ಬಿಗ್ ಬ್ಯಾಷ್ ಲೀಗ್ 2025-26ರ ಆರಂಭಿಕ ಹಂತದಲ್ಲೇ ಗಮನಸೆಳೆದ ಘಟನೆಯೊಂದು ನಡೆದಿದೆ. ಬ್ರಿಸ್ಬೇನ್ ಹೀಟ್ ಮತ್ತು ಮೆಲ್ಬೋರ್ನ್ ರೆನೆಗೇಡ್ಸ್ ನಡುವಿನ ಎರಡನೇ ಪಂದ್ಯದಲ್ಲಿ ಪಾಕಿಸ್ತಾನದ ವೇಗದ ಬೌಲರ್ ಶಾಹೀನ್ ಶಾ ಅಫ್ರಿದಿ ಬಿಬಿಎಲ್ನಲ್ಲಿ ಮೊದಲ ಬಾರಿಗೆ ಕಣಕ್ಕಿಳಿದರೂ, ಅವರ ಚೊಚ್ಚಲ ಪಂದ್ಯವು ನಿರೀಕ್ಷೆಯಂತೆ ಸಾಗಲಿಲ್ಲ. ಅನುಭವಿಗಳಾಗಿರುವ ಅಫ್ರಿದಿಗೆ ಈ ಪಂದ್ಯದಲ್ಲಿ ಅಸಹಜ ಮುಜುಗರ ಎದುರಾದುದು ಕ್ರಿಕೆಟ್ ವಲಯದಲ್ಲಿ ಚರ್ಚೆಗೆ ಕಾರಣವಾಯಿತು.
ಮೊದಲು ಬ್ಯಾಟಿಂಗ್ ಮಾಡಿದ ಮೆಲ್ಬೋರ್ನ್ ರೆನೆಗೇಡ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 212 ರನ್ಗಳ ಭಾರೀ ಮೊತ್ತ ದಾಖಲಿಸಿತು. ಈ ದೊಡ್ಡ ಸ್ಕೋರ್ ನಿರ್ಮಾಣದಲ್ಲಿ ಬ್ರಿಸ್ಬೇನ್ ಹೀಟ್ ಬೌಲರ್ಗಳು ಕಷ್ಟಪಟ್ಟರೆ, ಶಾಹೀನ್ ಶಾ ಅಫ್ರಿದಿ ಇನ್ನಷ್ಟು ದುಬಾರಿಯಾದರು. ಅವರು ಕೇವಲ 2.4 ಓವರ್ಗಳನ್ನು ಬೌಲಿಂಗ್ ಮಾಡಿ ಯಾವುದೇ ವಿಕೆಟ್ ಪಡೆಯದೆ 43 ರನ್ಗಳನ್ನು ಬಿಟ್ಟುಕೊಟ್ಟರು.
ಪಂದ್ಯದ ವೇಳೆ ಅಫ್ರಿದಿ ಎಸೆದ ಮೂರನೇ ಓವರ್ನಲ್ಲಿ ಎರಡು ಅಪಾಯಕಾರಿ ಹೈ ಫುಲ್ ಟಾಸ್ ಚೆಂಡುಗಳನ್ನು ಎಸೆದಿರುವುದು ಕಂಡುಬಂದವು. ಕ್ರಿಕೆಟ್ ನಿಯಮಗಳ ಪ್ರಕಾರ ಒಂದು ಓವರ್ನಲ್ಲಿ ಎರಡು ಹೈ ಫುಲ್ ಟಾಸ್ ಎಸೆಯುವುದನ್ನು ತಪ್ಪು ಎಂದು ಪರಿಗಣಿಸಲಾಗುತ್ತದೆ. ಇದೇ ಹಿನ್ನೆಲೆಯಲ್ಲಿ ಅಂಪೈರ್ಗಳು ಓವರ್ ಮಧ್ಯದಲ್ಲೇ ಶಾಹೀನ್ ಅಫ್ರಿದಿಯನ್ನು ಬೌಲಿಂಗ್ನಿಂದ ತಡೆದರು. ಸಾಮಾನ್ಯವಾಗಿ ಅಪರೂಪವಾಗಿ ಅನುಷ್ಠಾನಗೊಳ್ಳುವ ಈ ನಿಯಮವನ್ನು ಕಟ್ಟುನಿಟ್ಟಾಗಿ ಪಾಲಿಸಿದ ಅಂಪೈರ್ಗಳ ನಿರ್ಧಾರ ಅಫ್ರಿದಿಗೆ ಮುಜುಗರ ಉಂಟುಮಾಡಿದುದು ಸ್ಪಷ್ಟವಾಗಿದೆ.
ಬಿಬಿಎಲ್ನ ಚೊಚ್ಚಲ ಪಂದ್ಯವೇ ಈ ರೀತಿ ಅಂತ್ಯಗೊಂಡಿರುವುದು ಶಾಹೀನ್ ಶಾ ಅಫ್ರಿದಿಗೆ ನಿರಾಸೆಯ ಆರಂಭವಾಗಿದ್ದು, ಮುಂದಿನ ಪಂದ್ಯಗಳಲ್ಲಿ ಅವರು ಹೇಗೆ ಆಡಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.
