ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಇಸ್ರೇಲ್ ಮತ್ತು ಗಾಜಾದ ನಡುವಿನ ಯುದ್ದ ಕೊನೆಗೂ ಅಮೆರಿಕಾದ ಮಧ್ಯಸ್ಥಿಕೆಯಲ್ಲಿ ಕೊನೆಗೊಂಡಿದೆ. ಈ ನಂತರ ಡೊನಾಲ್ಡ್‌ ಟ್ರಂಪ್ ಇಸ್ರೇಲ್ ಮತ್ತು ಹಮಾಸ್‌ ನಡುವೆ ಕದನ ವಿರಾಮದ ನಂತರ ವಾಷಿಂಗ್ಟನ್ ಟೆಹ್ರಾನ್ ಜೊತೆ ಶಾಂತಿ ಒಪ್ಪಂದ ಮಾಡಿಕೊಳ್ಳಲು ಸಾಧ್ಯವಾದರೆ ಅದು ಉತ್ತಮವಾಗಿರುತ್ತದೆ ಎಂದು ಪ್ರಸ್ತಾಪಿಸಿದ್ದರು. ಆದರೆ ಈ ಪ್ರಸ್ತಾವನೆಯನ್ನು ಇರಾನ್ ತಿರಸ್ಕರಿಸಿದೆ.
ಈ ವರ್ಷ ಜೂನ್‌ ನಲ್ಲಿ ನಡೆದ ಇರಾನ್ ಹಾಗೂ ಅಮೆರಿಕಾ ನಡುವೆ ನಡೆದ ವೈಮಾನಿಕ ದಾಳಿಯಲ್ಲಿ ಇರಾನ್ ನ ಪರಮಾಣು ಸ್ಥಾವರಗಳು ಹಾಗೂ ಸೌಲಭ್ಯಗಳನ್ನು ನಾಶಪಡಿಸಿದ್ದೇವೆ ಎಂಬ ಟ್ರಂಪ್ ಹೇಳಿಕೆಯನ್ನು ತಿರಸ್ಕರಿಸಿದ ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ‘ಟ್ರಂಪ್ ತಾವು ಡೀಲ್‌ಮೇಕರ್ ಎಂದು ಹೇಳುತ್ತಾರೆ, ಆದರೆ ಒಂದು ಒಪ್ಪಂದವು ಬಲವಂತದಿಂದ ಕೂಡಿದ್ದರೆ ಮತ್ತು ಅದರ ಫಲಿತಾಂಶವು ಪೂರ್ವನಿರ್ಧರಿತವಾಗಿದ್ದರೆ, ಅದು ಒಪ್ಪಂದವಲ್ಲ, ಬದಲಾಗಿ ಹೇರಿಕೆ ಮತ್ತು ಬೆದರಿಸುವಿಕೆಯಾಗಿದೆ’ಎಂದು ತಮ್ಮ ಅಧಿಕೃತ ಎಕ್ಸ್‌ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಅಮೆರಿಕಾದ ದಾಳಿ ಕುರಿತು ಮಾತನಾಡಿ, ಅಮೆರಿಕದ ಅಧ್ಯಕ್ಷರು ಹೆಮ್ಮೆಯಿಂದ ಅವರು ಇರಾನ್‌ನ ಪರಮಾಣು ಉದ್ಯಮದ ಮೇಲೆ ಬಾಂಬ್ ದಾಳಿ ಮಾಡಿ ನಾಶಪಡಿಸಿದ್ದೇವೆ ಎಂದು ಹೇಳುತ್ತಾರೆ. ಸರಿ, ನೀವು ಈ ಕನಸನ್ನು ಕಾಣುತ್ತಲೇ ಇರಿ! ಎಂದು ವ್ಯಂಗ್ಯ ಮಾಡಿದ್ದಾರೆ.ಅಷ್ಟೇ ಅಲ್ಲದೇ ಇರಾನ್ ಪರಮಾಣು ಉದ್ಯಮದ ಮೇಲೆ ಯಾವಾಗಲೂ ಕಿಡಿ ಕಾರುವ ಅಮೆರಿಕಾವನ್ನು ಉದ್ದೇಶಿಸಿ ಯಾವ ದೇಶವು ಪರಮಾಣು ಉದ್ಯಮವನ್ನು ಹೊಂದಬಹುದು ಎಂದು ನಿರ್ದೇಶಿಸಲು ವಾಷಿಂಗ್ಟನ್‌ಗೆ ಯಾವ ಅಧಿಕಾರವಿದೆ? ಜಗತ್ತಿನಲ್ಲಿ ನೀವು ಯಾವ ಸ್ಥಾನವನ್ನು ಹೊಂದಿದ್ದೀರಿ? ಇರಾನ್ ಪರಮಾಣು ಸಾಮರ್ಥ್ಯ ಮತ್ತು ಪರಮಾಣು ಉದ್ಯಮವನ್ನು ಹೊಂದಿದೆಯೋ ಇಲ್ಲವೋ ಎಂಬುದರಲ್ಲಿ ಅಮೆರಿಕಗೆ ಏನು ಸಂಬಂಧ? ಅಮೆರಿಕಾದ ಈ ಹಸ್ತಕ್ಷೇಪ ಅನುಚಿತವಾಗಿದೆ ಮತ್ತು ತಪ್ಪಾಗಿದೆ ಎಂದು ಕಿಡಿಕಾರಿದ್ದಾರೆ.
ಇಸ್ರೇಲ್ ಜೊತೆ ಇರಾನ್ ನಡೆಸಿದ 12 ದಿನಗಳ ಯುದ್ಧದ ಸಮಯದಲ್ಲಿ, ಇಸ್ರೇಲಿ ಪಡೆಗಳಿಗೆ ಭಾರಿ ಹೊಡೆತ ಬಿದ್ದಿದ್ದು, ಅದನ್ನು ಇಸ್ರೇಲರು ನಂಬಲು ಸಾಧ್ಯವಾಗಲಿಲ್ಲ. ಅವರು ಅದನ್ನು ನಿರೀಕ್ಷಿಸಿರಲಿಲ್ಲ ಮತ್ತು ಅವರು ಭರವಸೆಯನ್ನು ಕಳೆದುಕೊಂಡಿದ್ದಾರೆ. ಅವರನ್ನು ಹತಾಶೆಯಿಂದ ಹೊರತರಲು ಅಮೆರಿಕ ಅಧ್ಯಕ್ಷರು ಆಕ್ರಮಿತ ಪ್ಯಾಲೆಸ್ತಿನ್‌ ಪ್ರದೇಶಕ್ಕೆ ಭೇಟಿ ನೀಡಿದ್ದರು ಎಂದಿದ್ದಾರೆ. ಆದರೆ ಇರಾನ್ ಕ್ಷಿಪಣಿಗಳು ಇಸ್ರೇಲ್ ಆಡಳಿತದ ಹಲವಾರು ಪ್ರಮುಖ ಕೇಂದ್ರಗಳ ಆಳಕ್ಕೆ ನುಗ್ಗಿ ಅವುಗಳನ್ನು ನಾಶಮಾಡಲು ಸಮರ್ಥವಾಗಿವೆ ಎಂದು ಹೇಳಿದ್ದಾರೆ.
ಇನ್ನೂ ಅಮೆರಿಕಾವನ್ನು ಭಯೋತ್ಪಾದಕ ರಾಷ್ಟ್ರ ಎಂದು ಕರೆದ ಖಮೇನಿ ಗಾಜದಲ್ಲಿ ನಡೆದ ನರಮೇಧದಲ್ಲಿ ಅಮೆರಿಕಾ ಪ್ರಮುಖ ಪಾತ್ರವಹಿಸುತ್ತದೆ ಎಂದು ಆರೋಪಿಸಿದ್ದಾರೆ. ಅಮೆರಿಕಾ ಇಸ್ರೇಲಿಗೆ ಹಲವು ಶಸ್ತ್ರಾಸ್ತ್ರಗಳನ್ನು ಒದಗಿಸಿದೆ. ಇದರಿಂದ ಗಾಜದಲ್ಲಿನ ಅಮಾಯಕ ಜನರ ಮೇಲೆ ಯುದ್ದವನ್ನು ಸಾರಿದ್ದಾರೆ. ಇದರಿಂದ ಸುಮಾರು 20 ಸಾವಿರ ಹೆಚ್ಚು ಮಕ್ಕಳು ಮತ್ತು ಶಿಶುಗಳು ಹುತಾತ್ಮರಾಗಿದ್ದಾರೆ ಎಂದಿದ್ದಾರೆ.
;ಅಮೆರಿಕಾದ ಅಧ್ಯಕ್ಷ ನಾವು ಭಯೋತ್ಪಾದನೆಯ ವಿರುದ್ಧ ಹೋರಾಡುತ್ತಿದ್ದೇವೆ ಎಂದು ಹೇಳುತ್ತಾರೆ. ನಾಲ್ಕು ವರ್ಷ, ಐದು ವರ್ಷ ಮತ್ತು ನವಜಾತ ಶಿಶುಗಳಂತಹ ಚಿಕ್ಕ ಮಕ್ಕಳು -ನೀವು ಅವರಲ್ಲಿ 20 ಸಾವಿರಕ್ಕೂ ಹೆಚ್ಚು ಜನರನ್ನು ಕೊಂದಿದ್ದೀರಿ! ಈ ಮಕ್ಕಳು ಭಯೋತ್ಪಾದಕರೇ? ನೀವೇ ಭಯೋತ್ಪಾದಕರು!’ ಎಂದು ಕಿಡಿಕಾರಿದ್ದಾರೆ.
ಅಮೆರಿಕವು ಐಸಿಸ್ ನಂತಹ ಭಯೋತ್ಪಾದಕ ಗುಂಪುಗಳನ್ನು ಪ್ರಾಯೋಜಿಸುತ್ತಿದೆ ಮತ್ತು ಅವುಗಳನ್ನು ಪಶ್ಚಿಮ ಏಷ್ಯಾದ ಮೇಲೆ ದಾಳಿಮಾಡಲು ಕಳುಹಿಸುತ್ತಿದ್ದಾರೆ ಎಂದು ಆರೋಪಿಸಿದ ಖಮೇನಿ ನೀವು, ಅಮೆರಿಕ, ಐಸಿಸ್ ಅನ್ನು ಸೃಷ್ಟಿಸಿ ಪಶ್ಚಿಮ ಏಷ್ಯಾದ ಮೇಲೆ ಛೂ ಬಿಟ್ಟ ಭಯೋತ್ಪಾದಕರು. ಮುಂದೊಂದು ದಿನ ಅವುಗಳನ್ನು ಬಳಸಲು ನೀವು ಅವರನ್ನು ಮೀಸಲು ಇಡುತ್ತೀರಿ. ಐಸಿಸ್‌ನ ಹಲವಾರು ಗುಂಪುಗಳು ಪ್ರಸ್ತುತ ಅಮೆರಿಕದ ನಿಯಂತ್ರಣದಲ್ಲಿವೆ. ಅವುಗಳನ್ನು ಯಾವುದೇ ಸಮಯದಲ್ಲಿ ಎಲ್ಲಿ ಬೇಕಾದರೂ ಬಳಸಲು ಎಲ್ಲೋ ಇರಿಸಲಾಗಿದೆ ಎಂದಿದ್ದಾರೆ.
