ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಟಿ20 ವಿಶ್ವಕಪ್ನ 18ನೇ ಪಂದ್ಯಕ್ಕೆ ವೇದಿಕೆ ಸಿದ್ಧವಾಗಿದೆ. ದೆಹಲಿಯ ಅರುಣ್ ಜೇಟ್ಲಿ ಸ್ಟೇಡಿಯಂನಲ್ಲಿ ಭಾರತ ಮತ್ತು ನಮೀಬಿಯಾ ತಂಡಗಳು ಮುಖಾಮುಖಿಯಾಗುತ್ತಿವೆ. ಆದರೆ, ಪಂದ್ಯ ಆರಂಭಕ್ಕೂ ಮುನ್ನವೇ ಮೈದಾನದ ಹೊರಗೆ ದೊಡ್ಡ ವಿವಾದವೊಂದು ಭುಗಿಲೆದ್ದಿದೆ. ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಭಾರತಕ್ಕೆ ಒಂದು ನ್ಯಾಯ, ನಮೀಬಿಯಾಗೆ ಮತ್ತೊಂದು ನ್ಯಾಯ ಒದಗಿಸುತ್ತಿದೆ ಎಂದು ನಮೀಬಿಯಾ ನಾಯಕ ಗೆರ್ಹಾರ್ಡ್ ಎರಾಸ್ಮಸ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಪಂದ್ಯದ ಪೂರ್ವಸಿದ್ಧತೆಗಾಗಿ ಟೀಮ್ ಇಂಡಿಯಾಗೆ ದೆಹಲಿಯ ಮೈದಾನದಲ್ಲಿ ಎರಡು ಬಾರಿ ಫ್ಲಡ್ಲೈಟ್ ಅಡಿಯಲ್ಲಿ ಅಭ್ಯಾಸ ನಡೆಸಲು ಅವಕಾಶ ನೀಡಲಾಗಿದೆ. ಆದರೆ, ನಮೀಬಿಯಾ ತಂಡಕ್ಕೆ ರಾತ್ರಿ ವೇಳೆಯ ಟ್ರೈನಿಂಗ್ ಸೆಷನ್ ನಿರಾಕರಿಸಲಾಗಿದೆ. ಇದೇ ಈಗ ದೊಡ್ಡ ಚರ್ಚೆಗೆ ಕಾರಣವಾಗಿದೆ.
“ನಮಗೆ ರಾತ್ರಿ ಅಭ್ಯಾಸಕ್ಕೆ ಅವಕಾಶ ನೀಡಿಲ್ಲ, ಆದರೆ ಭಾರತಕ್ಕೆ ಎರಡು ಬಾರಿ ಅವಕಾಶ ನೀಡಲಾಗಿದೆ. ಐಸಿಸಿ ತನಗಿಷ್ಟ ಬಂದಂತೆ ನಡೆದುಕೊಳ್ಳಬಹುದೇ? ಇದು ಅನ್ಯಾಯ,” ಎಂದು ಎರಾಸ್ಮಸ್ ನೇರವಾಗಿಯೇ ಪ್ರಶ್ನಿಸಿದ್ದಾರೆ.
ನಮೀಬಿಯಾದಲ್ಲಿ ಫ್ಲಡ್ಲೈಟ್ ಸೌಲಭ್ಯವಿರುವ ಪ್ರಮುಖ ಮೈದಾನಗಳಿಲ್ಲ. ಹಾಗಾಗಿ ಆಟಗಾರರಿಗೆ ತವರಿನಲ್ಲಿ ರಾತ್ರಿ ಪಂದ್ಯವಾಡಿದ ಅನುಭವ ಕಡಿಮೆ.
ನಮೀಬಿಯಾದ ಹೆಚ್ಚಿನ ಆಟಗಾರರು ಐಪಿಎಲ್ನಂತಹ ದೊಡ್ಡ ಲೀಗ್ಗಳಲ್ಲಿ ಆಡುವುದಿಲ್ಲ. ಕೇವಲ ನೇಪಾಳ ಪ್ರೀಮಿಯರ್ ಲೀಗ್ ಅಥವಾ ಐಎಲ್ಟಿ20 ನಂತಹ ಲೀಗ್ಗಳಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತಾರೆ.
ಹೊಸ ಅನುಭವ: ಹೊನಲು ಬೆಳಕಿನಲ್ಲಿ ಚೆಂಡನ್ನು ಅಂದಾಜಿಸುವುದು ಸವಾಲಿನ ಕೆಲಸ. ಇಂತಹ ಸಂದರ್ಭದಲ್ಲಿ ಅಭ್ಯಾಸ ಸಿಗದಿರುವುದು ತಂಡಕ್ಕೆ ಹಿನ್ನಡೆಯಾಗುವ ಸಾಧ್ಯತೆಯಿದೆ.
ಐಸಿಸಿಯ ಈ ತಾರತಮ್ಯದ ನಡೆಯಿಂದ ತಂಡದ ನೈತಿಕ ಸ್ಥೈರ್ಯ ಕುಗ್ಗದಂತೆ ನೋಡಿಕೊಳ್ಳುವುದು ನಾಯಕನಾಗಿ ತಮಗೆ ದೊಡ್ಡ ಸವಾಲು ಎಂದು ಎರಾಸ್ಮಸ್ ಹೇಳಿದ್ದಾರೆ. ಆದರೂ, ಇತ್ತೀಚಿನ ದಿನಗಳಲ್ಲಿ ಯುಎಸ್ಎ ಮತ್ತು ನೇಪಾಳದಂತಹ ತಂಡಗಳು ತೋರಿದ ಕೆಚ್ಚೆದೆಯ ಪ್ರದರ್ಶನದ ಹಾದಿಯಲ್ಲೇ ನಾವು ಕೂಡ ಭಾರತಕ್ಕೆ ಪ್ರಬಲ ಪೈಪೋಟಿ ನೀಡುತ್ತೇವೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಒಟ್ಟಿನಲ್ಲಿ, ಬಲಿಷ್ಠ ತಂಡಗಳಿಗೆ ಒಂದು ನಿಯಮ, ಬೆಳೆಯುತ್ತಿರುವ ತಂಡಗಳಿಗೆ ಮತ್ತೊಂದು ನಿಯಮ ಎನ್ನುವ ಐಸಿಸಿಯ ಧೋರಣೆಗೆ ಕ್ರಿಕೆಟ್ ಅಭಿಮಾನಿಗಳಿಂದ ವ್ಯಾಪಕ ಟೀಕೆ ವ್ಯಕ್ತವಾಗುತ್ತಿದೆ.
