ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವರ್ಷಕ್ಕೊಮ್ಮೆ ದರ್ಶನ ನೀಡುವ ಹಾಸನದ ಅಧಿದೇವತೆ ಶ್ರೀ ಹಾಸನಾಂಬೆ ದರ್ಶನೋತ್ಸವದ 11ನೇ ದಿನವೂ ಭಕ್ತರ ದಂಡು ಹರಿದುಬರುತ್ತಿದೆ. ದೀಪಾವಳಿ ಹಬ್ಬದ ಸಡಗರದ ನಡುವೆಯೂ ತಾಯಿಯ ದರ್ಶನ ಪಡೆಯಲು ದೇಶದ ಮೂಲೆ ಮೂಲೆಗಳಿಂದ ಲಕ್ಷಾಂತರ ಭಕ್ತರು ಹಾಸನಕ್ಕೆ ಆಗಮಿಸುತ್ತಿದ್ದಾರೆ.
ದರ್ಶನೋತ್ಸವವು ತನ್ನ ಅಂತಿಮ ಘಟ್ಟವನ್ನು ತಲುಪಿದ್ದು, ಭಕ್ತರಿಗೆ ಇನ್ನು ಕೇವಲ ಎರಡು ದಿನಗಳ ದರ್ಶನಕ್ಕೆ ಮಾತ್ರ ಅವಕಾಶವಿದೆ. ಈ ಕಾರಣಕ್ಕಾಗಿ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ದೇವಾಲಯದತ್ತ ಧಾವಿಸುತ್ತಿದ್ದಾರೆ. ಇಂದು (ಸೋಮವಾರ) ಮುಂಜಾನೆ 5 ಗಂಟೆಗೆ ದೇವಿಯ ದರ್ಶನ ಪುನರಾರಂಭಗೊಂಡಿದ್ದು, ಭಕ್ತರು ತಾಯಿ ಹಾಸನಾಂಬೆಯನ್ನು ಕಣ್ತುಂಬಿಕೊಳ್ಳಲು ಕಿಲೋಮೀಟರ್ಗಟ್ಟಲೆ ಉದ್ದದ ಸರತಿ ಸಾಲುಗಳಲ್ಲಿ ಶ್ರದ್ಧೆಯಿಂದ ಕಾಯುತ್ತಿದ್ದಾರೆ.
ವರ್ಷವಿಡೀ ಗರ್ಭಗುಡಿಯೊಳಗೆ ಕಾಯುವ ತಾಯಿಯ ದರ್ಶನ ಭಾಗ್ಯವನ್ನು ಕಳೆದುಕೊಳ್ಳಬಾರದೆಂಬ ಕಾರಣಕ್ಕೆ, ದೀಪಾವಳಿ ರಜೆಯನ್ನು ಸದುಪಯೋಗಪಡಿಸಿಕೊಂಡು ಭಕ್ತ ಸಮೂಹವು ಹಾಸನದಲ್ಲಿ ನೆರೆದಿದೆ. ದೇವಿಯ ದಿವ್ಯ ದರ್ಶನವು ಭಕ್ತರ ಪಾಲಿಗೆ ಈ ಬಾರಿಯ ದೀಪಾವಳಿಯ ಪವಿತ್ರ ಉಡುಗೊರೆಯಾಗಿದೆ. ಜಿಲ್ಲಾಡಳಿತವು ಭಕ್ತರ ನಿಯಂತ್ರಣಕ್ಕಾಗಿ ಸೂಕ್ತ ಭದ್ರತೆ ಮತ್ತು ವ್ಯವಸ್ಥೆಗಳನ್ನು ಮಾಡಿದೆ.
