ಇತ್ತೀಚೆಗೆ ಜಿಎಸ್ಟಿ ದರ ಪರಿಷ್ಕರಣೆ ಜಾರಿಗೆ ಬಂದಿದ್ದು, ವಿದ್ಯಾರ್ಥಿಗಳಿಗೆ ಅಗತ್ಯವಿರುವ ಕಾಗದ ಉತ್ಪನ್ನಗಳ ಬೆಲೆಯಲ್ಲಿ ಗೊಂದಲ ಉಂಟಾಗಿದೆ. ವಿಶೇಷವಾಗಿ ನೋಟ್ಬುಕ್ ತಯಾರಕರು ಕಾಗದವನ್ನು 18% ತೆರಿಗೆ ಪಾವತಿಸಿ ಖರೀದಿಸುತ್ತಿರುವಾಗ, ಅಂತಿಮ ಉತ್ಪನ್ನಕ್ಕೆ ಜಿಎಸ್ಟಿ ಶೂನ್ಯ ದರ ಇರುವುದರಿಂದ ಇನ್ಪುಟ್ ಟ್ಯಾಕ್ಸ್ ಕ್ರೆಡಿಟ್ ಕ್ಲೈಮ್ ಮಾಡಲು ಸಾಧ್ಯವಾಗುತ್ತಿಲ್ಲ. ಇದರ ಪರಿಣಾಮವಾಗಿ ತಯಾರಕರು ಪಾವತಿಸಿದ ತೆರಿಗೆ ನೇರವಾಗಿ ಉತ್ಪನ್ನದ ಬೆಲೆಯಲ್ಲಿ ಸೇರುತ್ತಿದೆ.
ಕರ್ನಾಟಕ ಕಾಗದ ಮತ್ತು ಲೇಖನ ಸಾಮಗ್ರಿಗಳ ಸಂಘದ ವ್ಯಾಪಾರಿಗಳು ಈ ನಿಯಮದಿಂದ ವಿದ್ಯಾರ್ಥಿಗಳ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಾಗುವ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ. ಸೆಪ್ಟೆಂಬರ್ 21ರ ನಂತರ ಸ್ಟಾಕ್ ಮೇಲೆ ಇನ್ಪುಟ್ ಕ್ರೆಡಿಟ್ ಸಿಗದ ಕಾರಣ, ನೋಟ್ಬುಕ್ ಬೆಲೆ ಹೆಚ್ಚುವ ಸಾಧ್ಯತೆ ಇದೆ ಎಂದು ತಯಾರಕರು ಮತ್ತು ವ್ಯಾಪಾರಿಗಳು ಅಧಿಕಾರಿಗಳಿಗೆ ತಿಳಿಸಿರುತ್ತಾರೆ.
ವಿದ್ಯಾರ್ಥಿ ಸಮುದಾಯದ ಹಿತವನ್ನು ಕಾಪಾಡಲು ಕಾಗದ ಉತ್ಪನ್ನಗಳಿಗೆ ಒಂದೇ ದರದಲ್ಲಿ ಜಿಎಸ್ಟಿ ನಿಗದಿಪಡಿಸುವಂತೆ ಒತ್ತಾಯ ಮಾಡಲಾಗುತ್ತಿದೆ. ಜಿಎಸ್ಟಿ ಮಂಡಳಿಯು ತ್ವರಿತವಾಗಿ ಸ್ಪಷ್ಟನೆ ನೀಡದೆ ಸಮಸ್ಯೆ ಬಗೆಹರಿಸದಿದ್ದರೆ, ದೇಶಾದ್ಯಂತ ಕಾಗದ ಉತ್ಪನ್ನ ತಯಾರಕರು ಮತ್ತು ವ್ಯಾಪಾರಿಗಳ ಮೇಲೆ ಆರ್ಥಿಕ ಹೊರೆ ಹೆಚ್ಚಾಗುವ ಸಾಧ್ಯತೆ ಇದೆ.
ಜಿಎಸ್ಟಿ ದರಗಳ ಪ್ರಸ್ತುತ ಸ್ಥಿತಿ:
ಕಾಗದ ಮತ್ತು ಕಾಗದದ ಫಲಕಗಳು – 18% ಜಿಎಸ್ಟಿ
ಕೆಲವು ಕಾಗದದ ಉತ್ಪನ್ನಗಳು – 18% ಜಿಎಸ್ಟಿ
ಪ್ಯಾಕೇಜಿಂಗ್ ಸಾಮಗ್ರಿಗಳು – 5% ಜಿಎಸ್ಟಿ
ನೋಟ್ಬುಕ್ ಮತ್ತು ಪಠ್ಯಪುಸ್ತಕಗಳು – 0% (ಶೂನ್ಯ ದರ)
