ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತದ ಕ್ರಿಕೆಟ್‌ನಲ್ಲಿ ನಾಯಕತ್ವ ಬದಲಾವಣೆ ಕುರಿತ ಚರ್ಚೆಗಳು ತೀವ್ರಗೊಂಡಿವೆ. ಟಿ20 ಹಾಗೂ ಟೆಸ್ಟ್ ಕ್ರಿಕೆಟ್‌ನಿಂದ ನಿವೃತ್ತಿ ಘೋಷಿಸಿರುವ ರೋಹಿತ್ ಶರ್ಮಾ, 2027ರ ವಿಶ್ವಕಪ್ ವರೆಗೆ ಏಕದಿನ ತಂಡವನ್ನು ಮುನ್ನಡೆಸುವರೋ ಅಥವಾ ಬೇಗನೇ ನಿವೃತ್ತಿ ಘೋಷಿಸುವರೋ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಮುಂಬರುವ ಆಸ್ಟ್ರೇಲಿಯಾ ಪ್ರವಾಸದಲ್ಲಿ ರೋಹಿತ್ ಏಕದಿನ ಪಂದ್ಯಗಳನ್ನು ಆಡುವ ನಿರೀಕ್ಷೆಯಿದ್ದರೂ, ಅವರ ನಿವೃತ್ತಿ ಬಗ್ಗೆ ಊಹಾಪೋಹಗಳು ಗಟ್ಟಿಯಾಗುತ್ತಿವೆ. ಈ ನಡುವೆ, ಅವರ ಸ್ಥಾನಕ್ಕೆ ಯಾರು ಮುಂದಾಗಬಹುದು ಎಂಬ ಪ್ರಶ್ನೆ ಚರ್ಚೆಯ ಕೇಂದ್ರವಾಗಿದೆ.
ಈ ಕುರಿತು ಭಾರತದ ಮಾಜಿ ಆಟಗಾರ ಸುರೇಶ್ ರೈನಾ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದು, ಹಾರ್ದಿಕ್ ಪಾಂಡ್ಯ ಏಕದಿನ ತಂಡದ ನಾಯಕತ್ವಕ್ಕೆ ಸೂಕ್ತ ಅಭ್ಯರ್ಥಿ ಎಂದು ಹೇಳಿದ್ದಾರೆ. ಬ್ಯಾಟಿಂಗ್, ಬೌಲಿಂಗ್ ಹಾಗೂ ಫೀಲ್ಡಿಂಗ್ all-round ಸಾಮರ್ಥ್ಯ ಹೊಂದಿರುವ ಪಾಂಡ್ಯ, ಕಪಿಲ್ ದೇವ್ ಅವರಂತೆಯೇ ತಂಡಕ್ಕೆ ನಂಬಿಕೆ ಕೊಡುವ ನಾಯಕನಾಗಬಹುದು ಎಂದು ರೈನಾ ಅಭಿಪ್ರಾಯಪಟ್ಟಿದ್ದಾರೆ. ಪಾಂಡ್ಯ ಅವರಲ್ಲಿ ಧೋನಿಯ ಶಾಂತ ವ್ಯಕ್ತಿತ್ವ ಮತ್ತು ಮೈದಾನದಲ್ಲಿ ಮಾತನಾಡುವ ಶೈಲಿ ಕಾಣುತ್ತದೆ ಎಂಬುದೂ ಅವರ ಅಭಿಪ್ರಾಯ.
ಇನ್ನು ಶ್ರೇಯಸ್ ಅಯ್ಯರ್ ಕೂಡ ಬಿಸಿಸಿಐ ಪರಿಗಣನೆಯಲ್ಲಿರುವ ಪ್ರಮುಖ ಸ್ಪರ್ಧಿ. 70 ಏಕದಿನ ಪಂದ್ಯಗಳಲ್ಲಿ 2845 ರನ್‌ಗಳನ್ನು ಗಳಿಸಿರುವ ಅಯ್ಯರ್, 2025ರ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಭಾರತದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು. ಪಂಜಾಬ್ ಕಿಂಗ್ಸ್ ತಂಡವನ್ನು ಐಪಿಎಲ್ 2025ರಲ್ಲಿ ಫೈನಲ್‌ಗೆ ಮುನ್ನಡೆಸಿದ ನಾಯಕತ್ವದ ಅನುಭವವೂ ಅವರ ಪರ ಮಾತಾಡುತ್ತಿದೆ. ಬಿಸಿಸಿಐ ದೀರ್ಘಕಾಲಿಕ ಏಕದಿನ ನಾಯಕತ್ವಕ್ಕಾಗಿ ಅಯ್ಯರ್ ಅವರನ್ನು ಗಮನಿಸುತ್ತಿದೆ ಎಂದು ವರದಿಗಳು ಸೂಚಿಸುತ್ತವೆ.
ಶುಭ್‌ಮನ್ ಗಿಲ್ ಹೆಸರು ಕೂಡ ಕೇಳಿ ಬರುತ್ತಿದೆ
ಟೆಸ್ಟ್ ತಂಡದ ಪ್ರಸ್ತುತ ನಾಯಕನಾದ ಶುಭ್‌ಮನ್ ಗಿಲ್, ಇಂಗ್ಲೆಂಡ್ ಪ್ರವಾಸದಲ್ಲಿ ಭಾರತದ ಸರಣಿಯನ್ನು ಸಮಬಲಕ್ಕೆ ತಂದು ತನ್ನ ನಾಯಕತ್ವದ ಸಾಮರ್ಥ್ಯವನ್ನು ತೋರಿಸಿದ್ದರು. ಏಕದಿನ ತಂಡಕ್ಕೂ ಅವರನ್ನು ಪರಿಗಣಿಸಲಾಗಬಹುದು ಎಂಬ ಊಹಾಪೋಹಗಳು ಕೇಳಿಬರುತ್ತಿವೆ.
ಹಾರ್ದಿಕ್ ಪಾಂಡ್ಯ ಈಗಾಗಲೇ ಟಿ20 ತಂಡವನ್ನು ಮುನ್ನಡೆಸಿದ ಅನುಭವ ಹೊಂದಿದ್ದಾರೆ. ಆದರೆ ಗಾಯಗಳ ಸಮಸ್ಯೆಯಿಂದಾಗಿ ಅವರ ನಾಯಕತ್ವ ನಿರಂತರವಾಗಿರಲಿಲ್ಲ. ಇದೇ ಕಾರಣದಿಂದಾಗಿ ಟಿ20ಐ ತಂಡದ ನಾಯಕತ್ವವನ್ನು ಸೂರ್ಯಕುಮಾರ್ ಯಾದವ್ ಅವರಿಗೆ ನೀಡಲಾಗಿತ್ತು.
