ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಮೂರು ಪಂದ್ಯಗಳ ರೋಚಕ ಏಕದಿನ ಸರಣಿಯು ಅಂತಿಮ ಮತ್ತು ನಿರ್ಣಾಯಕ ಹಂತವನ್ನು ತಲುಪಿದೆ. ಉಭಯ ತಂಡಗಳು 1-1 ಸಮಬಲ ಸಾಧಿಸಿರುವ ಹಿನ್ನೆಲೆಯಲ್ಲಿ, ಡಿಸೆಂಬರ್ 6, 2025 ರಂದು ವಿಶಾಖಪಟ್ಟಣಂನ ಡಾ. ವೈ.ಎಸ್. ರಾಜಶೇಖರ ರೆಡ್ಡಿ ಎಸಿಎ-ವಿಡಿಸಿಎ ಕ್ರೀಡಾಂಗಣದಲ್ಲಿ ನಡೆಯಲಿರುವ ಕೊನೆಯ ಪಂದ್ಯದ ಮೇಲೆ ಇಡೀ ಕ್ರಿಕೆಟ್ ಲೋಕದ ದೃಷ್ಟಿ ನೆಟ್ಟಿದೆ.
ಗೆದ್ದವರಿಗೆ ಸರಣಿ ಕಿರೀಟ ಎಂಬ ಒತ್ತಡದಲ್ಲಿ ಎರಡು ತಂಡಗಳು ಕಣಕ್ಕಿಳಿಯಲಿವೆ. ಆದರೆ, ಈ ಹೈ-ವೋಲ್ಟೇಜ್ ಕದನಕ್ಕೆ ಮುನ್ನವೇ ಕ್ರೀಡಾಂಗಣದ ಹೊರಗೆ ಅಭಿಮಾನಿಗಳ ಉತ್ಸಾಹ ಗಗನಕ್ಕೇರಿದೆ. ಈ ಭಾರಿ ಬೇಡಿಕೆಗೆ ಪ್ರಮುಖ ಕಾರಣ: ವಿರಾಟ್ ಕೊಹ್ಲಿ.
ಪ್ರಸ್ತುತ ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ವಿರಾಟ್ ಕೊಹ್ಲಿ ಅವರು ಸತತವಾಗಿ ಶತಕಗಳನ್ನು ಬಾರಿಸಿರುವುದೇ ಟಿಕೆಟ್ ಮಾರಾಟದ ಮೇಲೆ ದೊಡ್ಡ ಪರಿಣಾಮ ಬೀರಿದೆ. ವರದಿಗಳ ಪ್ರಕಾರ, ರಾಂಚಿಯಲ್ಲಿ ನಡೆದ ಎರಡನೇ ಏಕದಿನ ಪಂದ್ಯದಲ್ಲಿ ಕೊಹ್ಲಿ ಅವರು ಸಿಡಿಸಿದ 135 ರನ್ಗಳ ಅಮೋಘ ಇನ್ನಿಂಗ್ಸ್, ವಿಶಾಖಪಟ್ಟಣಂ ಪಂದ್ಯದ ಟಿಕೆಟ್ ಮಾರಾಟಕ್ಕೆ ಹೊಸ ವೇಗ ನೀಡಿತು.
ವಾಸ್ತವವಾಗಿ, ನವೆಂಬರ್ 28 ರಂದು ಟಿಕೆಟ್ಗಳ ಮೊದಲ ಸುತ್ತಿನ ಮಾರಾಟಕ್ಕೆ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಆದರೆ, ನವೆಂಬರ್ 30 ರಂದು ಕೊಹ್ಲಿ ಶತಕ ಬಾರಿಸಿದ ತಕ್ಷಣವೇ ಪರಿಸ್ಥಿತಿ ಸಂಪೂರ್ಣ ಬದಲಾಯಿತು. ಡಿಸೆಂಬರ್ 1 ಮತ್ತು 3 ರಂದು ಆನ್ಲೈನ್ನಲ್ಲಿ ಲಭ್ಯವಾದ ಉಳಿದ ಟಿಕೆಟ್ಗಳು, ಕೇವಲ ಕೆಲವೇ ನಿಮಿಷಗಳಲ್ಲಿ ಸಂಪೂರ್ಣವಾಗಿ ಮಾರಾಟವಾದವು. ಈ ಪಂದ್ಯದ ಟಿಕೆಟ್ ಬೆಲೆಗಳು 1,200 ರೂ.ಗಳಿಂದ ಹಿಡಿದು 18,000 ರೂ.ಗಳವರೆಗೆ ಇದ್ದರೂ, ಒಂದೇ ಒಂದು ಟಿಕೆಟ್ ಸಹ ಉಳಿದಿಲ್ಲ ಎಂದು ಸ್ಥಳೀಯ ಕ್ರಿಕೆಟ್ ಅಸೋಸಿಯೇಷನ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಸ್ಥಳೀಯ ಕ್ರಿಕೆಟ್ ಅಧಿಕಾರಿಗಳು, “ರಾಂಚಿಯಲ್ಲಿ ಕೊಹ್ಲಿ ಅವರ ಇನ್ನಿಂಗ್ಸ್ ನೋಡಿದ ತಕ್ಷಣವೇ ಅವರ ಅಭಿಮಾನಿಗಳು ಟಿಕೆಟ್ ಖರೀದಿಸಲು ಮುಗಿಬಿದ್ದರು. ಇದು ಕೇವಲ ಕ್ರಿಕೆಟ್ನ ಮೋಡಿಯಲ್ಲ, ವಿರಾಟ್ ಕೊಹ್ಲಿಯ ಮ್ಯಾಜಿಕ್,” ಎಂದು ಸಂತೋಷ ವ್ಯಕ್ತಪಡಿಸಿದ್ದಾರೆ.
