ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಜಾಗತಿಕ ಮಟ್ಟದಲ್ಲಿ ರಾಜಕೀಯ ಅಸ್ಥಿರತೆ ಮತ್ತು ಆರ್ಥಿಕ ಏರಿಳಿತಗಳಿದ್ದರೂ, ಭಾರತದ ವಿದೇಶಿ ವ್ಯಾಪಾರ ವಲಯವು ಅಮೋಘ ಸಾಧನೆ ಮಾಡುತ್ತಿದೆ. ಪ್ರಸಕ್ತ ಹಣಕಾಸು ವರ್ಷದ ಏಪ್ರಿಲ್ನಿಂದ ಜನವರಿವರೆಗಿನ ಅವಧಿಯಲ್ಲಿ ಭಾರತದ ಒಟ್ಟಾರೆ ರಫ್ತು ಶೇ. 6.15ರಷ್ಟು ಏರಿಕೆ ಕಾಣುವ ಮೂಲಕ ಆರ್ಥಿಕ ಸದೃಢತೆಯನ್ನು ಪ್ರದರ್ಶಿಸಿದೆ.
ಈ ಅವಧಿಯಲ್ಲಿ ಸರಕು ಮತ್ತು ಸೇವೆಗಳ ಒಟ್ಟು ರಫ್ತು 720.76 ಬಿಲಿಯನ್ ಡಾಲರ್ಗೆ ತಲುಪಿದೆ. ಕಳೆದ ವರ್ಷ ಇದು 679.02 ಬಿಲಿಯನ್ ಡಾಲರ್ ಇತ್ತು.
ಭಾರತದ ರಫ್ತು ಬೆಳವಣಿಗೆಗೆ ಬೆನ್ನೆಲುಬಾಗಿ ನಿಂತಿರುವುದು ‘ಸರ್ವಿಸ್ ಸೆಕ್ಟರ್’. ಸೇವಾ ರಫ್ತು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇ. 10.57ರಷ್ಟು ಭರ್ಜರಿ ಪ್ರಗತಿ ಕಂಡಿದೆ.
ಕಳೆದ ವರ್ಷದ 387.5 ಬಿಲಿಯನ್ ಡಾಲರ್ ರಫ್ತಿನ ದಾಖಲೆಯನ್ನು ಮೀರಿಸಲು ಈಗ ಕೇವಲ 34 ಬಿಲಿಯನ್ ಡಾಲರ್ಗಳ ಅಗತ್ಯವಿದೆ. ಫೆಬ್ರವರಿ ಮತ್ತು ಮಾರ್ಚ್ ತಿಂಗಳ ಅಂಕಿಅಂಶಗಳು ಸೇರಿದರೆ ಹೊಸ ಇತಿಹಾಸ ಸೃಷ್ಟಿಯಾಗುವುದು ಖಚಿತ.
ಆಮದಿಗಿಂತ ರಫ್ತೇ ಹೆಚ್ಚಿರುವುದು ಭಾರತದ ಪಾಲಿಗೆ ಪ್ಲಸ್ ಪಾಯಿಂಟ್. ಸೇವಾ ವಲಯದಲ್ಲಿ ಭಾರತವು ಬಲಿಷ್ಠ ‘ಸರ್ಪ್ಲಸ್’ ಹೊಂದಿದೆ.
ಸರಕು ರಫ್ತು ವಲಯದಲ್ಲಿ ಎಲೆಕ್ಟ್ರಾನಿಕ್ಸ್ ಉತ್ಪನ್ನಗಳು ಅತಿ ವೇಗವಾಗಿ ಬೆಳೆಯುತ್ತಿವೆ. ಇದರೊಂದಿಗೆ ಫಾರ್ಮಾ (ಔಷಧ), ಎಂಜಿನಿಯರಿಂಗ್ ಸರಕುಗಳು, ಪೆಟ್ರೋಲಿಯಂ, ಜವಳಿ ಮತ್ತು ಆಟೊಮೊಬೈಲ್ ಕ್ಷೇತ್ರಗಳು ಕೂಡ ಸ್ಥಿರವಾದ ಬೆಳವಣಿಗೆ ದಾಖಲಿಸಿವೆ.
ಕಳೆದ ಮೂರು ವರ್ಷಗಳಲ್ಲಿ ಭಾರತ ಒಟ್ಟು 9 ಪ್ರಮುಖ ವ್ಯಾಪಾರ ಒಪ್ಪಂದಗಳಿಗೆ ಸಹಿ ಹಾಕಿದೆ. ಪ್ರಸ್ತುತ 38 ದೇಶಗಳೊಂದಿಗೆ ಭಾರತ ವ್ಯಾಪಾರ ಸಂಬಂಧ ಹೊಂದಿದ್ದು, ಈ ದೇಶಗಳ ಒಟ್ಟು ಜಿಡಿಪಿಯು ಜಾಗತಿಕ ಜಿಡಿಪಿಯ ಶೇ. 70ರಷ್ಟಿದೆ. ಇದು ಭಾರತದ ದೀರ್ಘಕಾಲದ ಆರ್ಥಿಕ ನೀತಿಗಳಿಗೆ ಸಂದ ಜಯವಾಗಿದೆ.
