ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕನ್ನಡದ ಹೆಮ್ಮೆಯ ನಟ, ನಿರ್ದೇಶಕ ರಿಷಬ್ ಶೆಟ್ಟಿ ಅವರ ‘ಕಾಂತಾರ: ಚಾಪ್ಟರ್ 1’ ಸಿನಿಮಾ ದೇಶಾದ್ಯಂತ ಭರ್ಜರಿ ಕಲೆಕ್ಷನ್ ಮಾಡುತ್ತಿದೆ. ಈ ಚಿತ್ರವು ಸ್ಥಳೀಯ ದೈವಗಳ ಆರಾಧನೆ ಮತ್ತು ಸಂಸ್ಕೃತಿಯ ಕುರಿತಾಗಿದ್ದು, ಕನ್ನಡ ಪ್ರೇಕ್ಷಕರಿಂದ ಅಪಾರ ಭಕ್ತಿ ಮತ್ತು ಗೌರವವನ್ನು ಗಳಿಸಿದೆ. ಸ್ವತಃ ರಿಷಬ್ ಶೆಟ್ಟಿ ಅವರೇ ಹಲವು ಸಂದರ್ಭಗಳಲ್ಲಿ ದೈವಗಳ ಕುರಿತು ಗೌರವದಿಂದ ನಡೆದುಕೊಳ್ಳುವಂತೆ ಮತ್ತು ಯಾವುದೇ ರೀತಿಯ ಅಪಮಾನ ಮಾಡದಂತೆ ಮನವಿ ಮಾಡಿದ್ದರು. ಆದರೆ, ಇದೀಗ ಅಂತರಾಷ್ಟ್ರೀಯ ವೇದಿಕೆಯಲ್ಲಿ ಬಾಲಿವುಡ್ ನಟ ರಣ್ವೀರ್ ಸಿಂಗ್ ಅವರು ರಿಷಬ್ ಶೆಟ್ಟಿ ಎದುರೇ ದೈವದ ಕುರಿತು ಅಸಭ್ಯವಾಗಿ ಮಾತನಾಡಿದ್ದು, ವಿವಾದಕ್ಕೆ ಕಾರಣವಾಗಿದೆ.
ಏನಿದು ಘಟನೆ?
ಗೋವಾ ಅಂತರಾಷ್ಟ್ರೀಯ ಸಿನಿಮೋತ್ಸವದ ಸಮಾರೋಪ ಸಮಾರಂಭದಲ್ಲಿ ರಣ್ವೀರ್ ಸಿಂಗ್ ಅವರು ಅತಿಥಿಯಾಗಿ ಭಾಗವಹಿಸಿದ್ದರು. ಕಾರ್ಯಕ್ರಮದಲ್ಲಿ ಸೂಪರ್‌ಸ್ಟಾರ್ ರಜನಿಕಾಂತ್ ಅವರಿಗೆ ಗೌರವ ಸಲ್ಲಿಸಲಾಯಿತು. ಇದೇ ಸಮಾರಂಭದಲ್ಲಿ ನಟ ರಿಷಬ್ ಶೆಟ್ಟಿ ಸಹ ಮುಂಚೂಣಿ ಸಾಲಿನಲ್ಲಿ ಆಸೀನರಾಗಿದ್ದರು.
ವೇದಿಕೆಯಲ್ಲಿದ್ದ ರಣ್ವೀರ್ ಸಿಂಗ್ ಅವರು ರಿಷಬ್ ಶೆಟ್ಟಿ ಅವರನ್ನು ಉದ್ದೇಶಿಸಿ ‘ಕಾಂತಾರ: ಚಾಪ್ಟರ್ 1’ ಬಗ್ಗೆ ಮಾತನಾಡುತ್ತಾ, ಅಕ್ಷರಶಃ ದೈವವನ್ನು ‘ದೆವ್ವ’ ಎಂದು ಕರೆದಿದ್ದಾರೆ. “ರಿಷಬ್ ಅವರೇ, ನಿಮ್ಮ ‘ಕಾಂತಾರ: ಚಾಪ್ಟರ್ 1’ ಚಿತ್ರವನ್ನು ಥಿಯೇಟರ್‌ನಲ್ಲಿ ನೋಡಿದೆ. ನಿಮ್ಮ ನಟನೆ ಅದ್ಭುತ. ಅದರಲ್ಲೂ ಹೆಣ್ಣು ‘ದೆವ್ವ’ ನಿಮ್ಮ ಮೈ ಸೇರುವ ದೃಶ್ಯದಲ್ಲಿ ನೀವು ನೀಡುವ ಆ ನೋಟ ಮತ್ತು ಅಭಿನಯ ಅತ್ಯದ್ಭುತವಾಗಿತ್ತು,” ಎಂದ ರಣ್ವೀರ್ ಸಿಂಗ್, ಮಾತಿನ ಜೊತೆಗೆ ತಮ್ಮ ನಾಲಗೆಯನ್ನು ಹೊರಚಾಚಿ ವಿಲಕ್ಷಣವಾಗಿ ಅನುಕರಿಸಿದರು. ಅವರ ಈ ಅನುಕರಣೆ ಮತ್ತು ಮಾತು ದೈವವನ್ನು ವ್ಯಂಗ್ಯ ಮಾಡುವಂತಿತ್ತು.
ರಣ್ವೀರ್ ಸಿಂಗ್ ಅವರ ಈ ನಡೆಯಿಂದಾಗಿ, ಅವರ ಮುಂದೆಯೇ ಕುಳಿತಿದ್ದ ರಿಷಬ್ ಶೆಟ್ಟಿ ಅವರು ನಸುನಗುತ್ತಲೇ ಮುಖವನ್ನು ಪಕ್ಕಕ್ಕೆ ತಿರುಗಿಸಿ, ಮುಜುಗರಕ್ಕೆ ಒಳಗಾದಂತೆ ಕಂಡುಬಂದರು.
ದೈವದ ಕುರಿತಾದ ನಿರ್ಲಕ್ಷ್ಯ
‘ಕಾಂತಾರ’ ಹಾಗೂ ‘ಕಾಂತಾರ: ಚಾಪ್ಟರ್ 1’ ಸಿನಿಮಾಗಳು ದೈವಗಳು, ಅವುಗಳ ಪದ್ಧತಿ ಮತ್ತು ಆರಾಧನೆಯ ಮಹತ್ವವನ್ನು ಸಾರುತ್ತವೆ. ಸಿನಿಮಾದ ಪ್ರಮುಖ ದೃಶ್ಯಗಳಲ್ಲಿ ರಿಷಬ್ ಶೆಟ್ಟಿ ಪಾತ್ರಕ್ಕೆ ದೈವ ಮೈಮೇಲೆ ಬಂದಾಗ, ಆ ಪಾತ್ರಗಳನ್ನು ಸಹ ಇತರೆ ಪಾತ್ರಗಳು ಕೈಮುಗಿದು ‘ದೈವ’ ಎಂದೇ ಸಂಬೋಧಿಸುತ್ತವೆ. ಕಥೆಯಲ್ಲಿ ಗುಳಿಗ ದೈವದ ಸಹೋದರಿ ಚಾವುಂಡಿಯ ವಿವರಗಳನ್ನೂ ನೀಡಲಾಗಿದೆ. ಇಷ್ಟೆಲ್ಲಾ ಸ್ಪಷ್ಟ ಮಾಹಿತಿಗಳು ಲಭ್ಯವಿದ್ದರೂ, ರಣ್ವೀರ್ ಸಿಂಗ್ ಅವರು ದೈವವನ್ನು ‘ಘೋಸ್ಟ್’ (ದೆವ್ವ) ಎಂದು ಕರೆದಿರುವುದು ಮತ್ತು ಮುಂದೆ ತಾನು ‘ಕಾಂತಾರ ಚಾಪ್ಟರ್ 3’ನಲ್ಲಿ ನಟಿಸಬೇಕು ಎಂದು ಹೇಳಿರುವುದು ವಿವಾದಕ್ಕೆ ತುಪ್ಪ ಸುರಿದಿದೆ.
ಈ ಹಿಂದೆ, ತಮ್ಮ ಪಾತ್ರದ ಅನುಕರಣೆ ಮತ್ತು ತಮಾಷೆಗಳ ಬಗ್ಗೆ ಬೇಸರ ವ್ಯಕ್ತಪಡಿಸಿದ್ದ ರಿಷಬ್ ಶೆಟ್ಟಿ, ದೈವದ ವಿಚಾರದಲ್ಲಿ ಎಚ್ಚರ ವಹಿಸುವಂತೆ ಮನವಿ ಮಾಡಿದ್ದರು. ಈಗ ಅವರ ಎದುರೇ ಅಂತರಾಷ್ಟ್ರೀಯ ವೇದಿಕೆಯಲ್ಲಿ ಈ ಘಟನೆ ನಡೆದಿರುವುದರಿಂದ, ರಿಷಬ್ ಶೆಟ್ಟಿ ಅವರ ಮುಂದಿನ ಪ್ರತಿಕ್ರಿಯೆ ಮತ್ತು ಕ್ರಮ ಏನಾಗಿರುತ್ತದೆ ಎಂದು ಎಲ್ಲರೂ ಕಾದು ನೋಡುತ್ತಿದ್ದಾರೆ.
