ವೈವಾಹಿಕ ಜೀವನ ಎನ್ನುವುದು ಎರಡು ಜೀವಗಳ ಸಮನ್ವಯ. ಇಲ್ಲಿ ಪ್ರೀತಿಯ ಜೊತೆಗೆ ವಿವೇಕವೂ ಅಷ್ಟೇ ಮುಖ್ಯ. ಪ್ರಾಚೀನ ಭಾರತದ ಶ್ರೇಷ್ಠ ರಾಜತಾಂತ್ರಿಕ ಮತ್ತು ಜ್ಞಾನಿ ಆಚಾರ್ಯ ಚಾಣಕ್ಯನ ಪ್ರಕಾರ, ಹೆಣ್ಣು ಒಂದು ಕುಟುಂಬದ ಆಧಾರಸ್ತಂಭ. ಆಕೆಯ ನಡೆ, ನುಡಿ ಮತ್ತು ನಿರ್ಧಾರಗಳು ಇಡೀ ಸಂಸಾರದ ಸುಖ-ಶಾಂತಿಯನ್ನು ನಿರ್ಧರಿಸುತ್ತವೆ. ವಿವಾಹಿತ ಮಹಿಳೆಯರು ತಮ್ಮ ವೈವಾಹಿಕ ಜೀವನವನ್ನು ನಂದನವನವಾಗಿಸಿಕೊಳ್ಳಲು ಪಾಲಿಸಬೇಕಾದ ಕೆಲವು ಮುಖ್ಯ ನೀತಿಗಳು ಇಲ್ಲಿವೆ:
ವಿರಹ ಬೇಡ, ಒಡನಾಟವಿರಲಿ:
ಮದುವೆಯ ನಂತರ ಪತ್ನಿ ದೀರ್ಘಕಾಲ ಪತಿಯಿಂದ ದೂರವಿರುವುದು ಒಳಿತಲ್ಲ ಎಂದು ಚಾಣಕ್ಯ ಹೇಳುತ್ತಾರೆ. ದೈಹಿಕ ಮತ್ತು ಮಾನಸಿಕ ಅಂತರ ಹೆಚ್ಚಾದಂತೆ, ದಂಪತಿಗಳ ನಡುವೆ ಸಂವಹನ ಕಡಿಮೆಯಾಗಿ ಅನುಮಾನಗಳು ಹುಟ್ಟಿಕೊಳ್ಳಬಹುದು. ಪ್ರೀತಿ ಮತ್ತು ನಂಬಿಕೆ ಬಲಗೊಳ್ಳಲು ದಂಪತಿಗಳು ಗರಿಷ್ಠ ಸಮಯ ಜೊತೆಯಾಗಿ ಕಳೆಯುವುದು ಅತ್ಯಗತ್ಯ.
ಸಹವಾಸ ದೋಷದಿಂದ ದೂರವಿರಿ:
“ಸಹವಾಸಕ್ಕಿಂತ ಸನ್ಯಾಸ ಲೇಸು” ಎಂಬಂತೆ, ಕೆಟ್ಟ ನಡವಳಿಕೆ ಅಥವಾ ದುರಭ್ಯಾಸವುಳ್ಳ ಜನರ ಸ್ನೇಹದಿಂದ ಮಹಿಳೆಯರು ದೂರವಿರಬೇಕು. ಅದು ಸಂಬಂಧಿಕರಾಗಿರಲಿ ಅಥವಾ ಸ್ನೇಹಿತರಾಗಿರಲಿ, ಅವರ ನಕಾರಾತ್ಮಕ ವಿಚಾರಗಳು ನಿಮ್ಮ ಸುಂದರ ಸಂಸಾರದ ಮೇಲೆ ಕಪ್ಪುಛಾಯೆ ಬೀರಬಹುದು. ಯಾರೊಂದಿಗೆ ಸ್ನೇಹ ಬೆಳೆಸಬೇಕು ಎಂಬ ವಿವೇಚನೆ ಪತ್ನಿಯರಿಗಿರಲಿ.
ಪತಿಯ ನಿಂದನೆ ಕೇಳಬೇಡಿ:
ಪತಿಯ ಬಗ್ಗೆ ಹಗುರವಾಗಿ ಮಾತನಾಡುವ ಅಥವಾ ಸದಾ ಟೀಕಿಸುವ ವ್ಯಕ್ತಿಗಳಿಂದ ದೂರವಿರುವುದು ಮಹಿಳೆಯರಿಗೆ ಶ್ರೇಯಸ್ಕರ. ಅಂತಹವರ ಮಾತುಗಳನ್ನು ಕೇಳುತ್ತಿದ್ದರೆ, ತಿಳಿಯದೆಯೇ ಪತಿಯ ಮೇಲಿನ ಗೌರವ ಕಡಿಮೆಯಾಗತೊಡಗುತ್ತದೆ. ಇದು ಮನೆಯೊಳಗೆ ಕಲಹಕ್ಕೆ ನಾಂದಿ ಹಾಡಬಹುದು.
ಪರರ ಮನೆಯಲ್ಲಿ ಅತಿಯಾದ ವಾಸ್ತವ್ಯ ಸಲ್ಲದು:
ಕಾರಣವಿಲ್ಲದೆ ಬೇರೆಯವರ ಮನೆಗೆ ಹೋಗಿ ಗಂಟೆಗಟ್ಟಲೆ ಹರಟೆ ಹೊಡೆಯುವುದು ಅಥವಾ ಅಲ್ಲಿಯೇ ವಾಸ್ತವ್ಯ ಹೂಡುವುದು ಪತ್ನಿಯ ಗೌರವವನ್ನು ಕುಂದಿಸುತ್ತದೆ. ಇದು ಕುಟುಂಬದ ಮರ್ಯಾದೆಯ ಮೇಲೆ ಪ್ರಭಾವ ಬೀರುವುದಲ್ಲದೆ, ದಂಪತಿಗಳ ನಡುವಿನ ಹೊಂದಾಣಿಕೆಯಲ್ಲಿ ಬಿರುಕು ಮೂಡಿಸಲು ಕಾರಣವಾಗಬಹುದು.
ನಂಬಿಕೆ ಮತ್ತು ಸಮರ್ಪಣೆ:
ಗರುಡ ಪುರಾಣದಲ್ಲಿ ವಿಷ್ಣುವು ಹೇಳುವಂತೆ, ದಾಂಪತ್ಯದ ಅಡಿಪಾಯವೇ ನಂಬಿಕೆ. ಎಂತಹ ಕಷ್ಟದ ಕಾಲ ಬಂದರೂ ಪತ್ನಿ ಪತಿಯ ಬೆನ್ನೆಲುಬಾಗಿ ನಿಲ್ಲಬೇಕು. ಪರಸ್ಪರ ಗೌರವ ಮತ್ತು ಸಮರ್ಪಣಾ ಭಾವವಿದ್ದರೆ ಮಾತ್ರ ಆ ಸಂಸಾರಕ್ಕೆ ದೈವಬಲ ಸಿಗುತ್ತದೆ ಎಂದು ಚಾಣಕ್ಯ ನೀತಿ ಸಾರುತ್ತದೆ.
