ನಮ್ಮಲ್ಲಿ ಅನೇಕರು “ಅವನಿಗೆ ಅದೃಷ್ಟ ಇತ್ತು ಗೆದ್ದ, ನನಗಿಲ್ಲ” ಎಂದು ಕೈಚೆಲ್ಲಿ ಕುಳಿತುಕೊಳ್ಳುತ್ತೇವೆ. ಆದರೆ ಸತ್ಯವೇನೆಂದರೆ, ಅದೃಷ್ಟ ಎಂಬುದು ಆಕಾಶದಿಂದ ಬೀಳುವ ನಕ್ಷತ್ರವಲ್ಲ. ಅದು ನಾವು ಬಿತ್ತಿದ ಶ್ರಮದ ಬೀಜಕ್ಕೆ ಸಿಗುವ ಸರಿಯಾದ ಸಮಯದ ಮಳೆ.
ರೋಮನ್ ತತ್ವಜ್ಞಾನಿ ಸೆನೆಕಾ ಹೇಳಿದಂತೆ, “ಅದೃಷ್ಟವೆಂದರೆ ಸಿದ್ಧತೆ ಮತ್ತು ಅವಕಾಶಗಳು ಒಂದಾಗುವ ಬಿಂದು.” ನೀವು ಅದ್ಭುತ ಗಾಯಕರಾಗಿದ್ದು, ವೇದಿಕೆ ಸಿಕ್ಕಾಗ ಹಾಡಲು ಸಿದ್ಧರಿಲ್ಲದಿದ್ದರೆ ಅಲ್ಲಿ ಅದೃಷ್ಟ ಕೆಲಸ ಮಾಡುವುದಿಲ್ಲ. ಪ್ರತಿದಿನದ ಸಣ್ಣ ಸಿದ್ಧತೆ ನಿಮ್ಮನ್ನು ಅದೃಷ್ಟವಂತರನ್ನಾಗಿ ಮಾಡುತ್ತದೆ.
ಯಾರು ಯಾವಾಗಲೂ ದೂರುತ್ತಿರುತ್ತಾರೋ, ಅವರಿಗೆ ಅದೃಷ್ಟದ ಬಾಗಿಲುಗಳು ಕಾಣುವುದೇ ಇಲ್ಲ. ಸಕಾರಾತ್ಮಕವಾಗಿ ಯೋಚಿಸುವವರು ತಮ್ಮ ಸುತ್ತಲಿರುವ ಅವಕಾಶಗಳನ್ನು ಬೇರೆಯವರಿಗಿಂತ ಬೇಗ ಗುರುತಿಸುತ್ತಾರೆ. ನಿಮ್ಮ ಮುಗುಳ್ನಗೆ ಮತ್ತು ಆಶಾವಾದಿ ವ್ಯಕ್ತಿತ್ವವೇ ಅದೃಷ್ಟವನ್ನು ಆಕರ್ಷಿಸುವ ಕಾಂತ ಶಕ್ತಿ.
ಅದೃಷ್ಟ ಎಂಬುದು ಒಂದೇ ಜಾಗದಲ್ಲಿ ಕುಳಿತವರಿಗೆ ಒಲಿಯುವುದಿಲ್ಲ. ಹೊಸ ಜನರನ್ನು ಭೇಟಿ ಮಾಡುವುದು, ಹೊಸ ಕೌಶಲ ಕಲಿಯುವುದು ಮತ್ತು ‘ಕಂಫರ್ಟ್ ಝೋನ್’ನಿಂದ ಹೊರಬರುವುದು ಅದೃಷ್ಟದ ಹಾದಿಗಳನ್ನು ತೆರೆಯುತ್ತದೆ. ನೀವು ಎಷ್ಟು ಹೆಚ್ಚು ಬಾಗಿಲುಗಳನ್ನು ತಟ್ಟುತ್ತೀರೋ, ಅಷ್ಟು ಬೇಗ ಒಂದು ಬಾಗಿಲು ತೆರೆಯುವ ಸಾಧ್ಯತೆ ಇರುತ್ತದೆ.
ಅದೃಷ್ಟವಂತರು ಹೆಚ್ಚಾಗಿ ತಮ್ಮ ಮನಸ್ಸಿನ ಮಾತನ್ನು ಕೇಳುತ್ತಾರೆ. ತರ್ಕಕ್ಕಿಂತ ಹೆಚ್ಚಾಗಿ ಕೆಲವು ಬಾರಿ ನಮ್ಮ “ಸಿಕ್ಸ್ತ್ ಸೆನ್ಸ್” ನಮಗೆ ಸರಿಯಾದ ದಾರಿಯನ್ನು ತೋರಿಸುತ್ತದೆ. ಈ ಅಂತಃಪ್ರಜ್ಞೆಯನ್ನು ಬೆಳೆಸಿಕೊಳ್ಳಲು ಧ್ಯಾನ ಮತ್ತು ಏಕಾಗ್ರತೆ ಮುಖ್ಯ.
ಅನೇಕ ಬಾರಿ ಒಂದು ದೊಡ್ಡ ಸೋಲಿನ ಹಿಂದೆ ಅದಕ್ಕಿಂತ ದೊಡ್ಡದಾದ ಅದೃಷ್ಟ ಅಡಗಿರುತ್ತದೆ. ಸೋತಾಗ ಕುಗ್ಗದೆ, “ಇದರಿಂದ ನಾನೇನು ಕಲಿಯಬಹುದು?” ಎಂದು ಯೋಚಿಸುವವರಿಗೆ ವಿಧಿ ಕೂಡ ಶರಣಾಗುತ್ತದೆ.
ನೆನಪಿಡಿ.. ನೀರು ಹರಿಯುತ್ತಿದ್ದರೆ ಮಾತ್ರ ಅದಕ್ಕೆ ಪಾವಿತ್ರ್ಯತೆ. ಹಾಗೆಯೇ ನಿಮ್ಮ ಪ್ರಯತ್ನಗಳು ನಿರಂತರವಾಗಿದ್ದರೆ, ಅದೃಷ್ಟ ಎಂಬ ನದಿ ತಾನಾಗಿಯೇ ನಿಮ್ಮತ್ತ ಹರಿದು ಬರುತ್ತದೆ. ಇಂದು ನೀವು ರೂಢಿಸಿಕೊಳ್ಳುವ ‘ಶಿಸ್ತು’, ನಾಳೆಯ ನಿಮ್ಮ ‘ಅದೃಷ್ಟ’ವಾಗಿ ಬದಲಾಗುತ್ತದೆ.
