ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಮೂರು ಪಂದ್ಯಗಳ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಶ್ರೀಲಂಕಾ ಹಾಗೂ ಜಿಂಬಾಬ್ವೆ ನಡುವೆ ರೋಚಕ ಪೈಪೋಟಿ ನಡೆದಿದೆ. ಕೊನೆಯ ಓವರ್ವರೆಗೂ ಉತ್ಸಾಹ ತುಂಬಿದ ಈ ಪಂದ್ಯದಲ್ಲಿ, ಎಡಗೈ ವೇಗದ ಬೌಲರ್ ದಿಲ್ಷಾನ್ ಮಧುಶಂಕ ಅವರ ಅಪ್ರತಿಮ ಬೌಲಿಂಗ್ನಿಂದಾಗಿ ಶ್ರೀಲಂಕಾ 7 ರನ್ಗಳ ಅಂತರದಲ್ಲಿ ಭರ್ಜರಿ ಗೆಲುವು ಸಾಧಿಸಿತು.
ಶ್ರೀಲಂಕಾ ಮೊದಲು ಬ್ಯಾಟಿಂಗ್ ನಡೆಸಿ 298 ರನ್ಗಳ ಭರ್ಜರಿ ಮೊತ್ತವನ್ನು ಕಲೆಹಾಕಿತು. ಪಾಥುಮ್ ನಿಸ್ಸಂಕಾ (76), ಲಿಯಾನಗೆ (70) ಹಾಗೂ ಕಮಿಂದು ಮೆಂಡಿಸ್ (57) ಶ್ರೇಯಾಂಕಿತ ಆಟದಿಂದ ತಂಡಕ್ಕೆ ಬಲವಾದ ಅಡಿಪಾಯ ಒದಗಿಸಿದರು.
ಈ ಗುರಿ ಬೆನ್ನಟ್ಟಿದ ಜಿಂಬಾಬ್ವೆ ತಂಡವು ಆರಂಭದಲ್ಲಿ ವಿಕೆಟ್ಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದರೂ, ಸಿಕಂದರ್ ರಾಝಾ (92) ಮತ್ತು ಟೋನಿ ಮುನಿಯೊಂಗಾ (42) ಶತಕದ ಜೊತೆಯಾಟವಾಡಿ ಪಂದ್ಯವನ್ನು ಸಂಪೂರ್ಣವಾಗಿ ತಮ್ಮತ್ತ ಸೆಳೆದಿದ್ದರು. ಕೊನೆಯ ಓವರ್ನಲ್ಲಿ ಕೇವಲ 10 ರನ್ ಬೇಕಿದ್ದ ಕಾರಣ, ಜಿಂಬಾಬ್ವೆ ಗೆಲುವಿನತ್ತ ಸಾಗುತ್ತಿದೆ ಎಂಬ ಭರವಸೆ ಮೂಡಿಸಿತು.
ಆದರೆ, ಕೊನೆಯ ಓವರ್ ಹೊತ್ತ ಮಧುಶಂಕ ಮೊದಲ ಮೂರು ಎಸೆತಗಳಲ್ಲಿ ಸತತವಾಗಿ ಸಿಕಂದರ್ ರಾಝಾ, ಇವಾನ್ಸ್ ಮತ್ತು ರಿಚರ್ಡ್ ನಾಗರ್ವಾ ಅವರನ್ನು ಔಟ್ ಮಾಡಿ ಹ್ಯಾಟ್ರಿಕ್ ಸಾಧಿಸಿದರು. ಬಳಿಕ ಉಳಿದ ಎಸೆತಗಳಲ್ಲಿ ಕೇವಲ ಎರಡು ರನ್ ನೀಡಿದ ಮಧುಶಂಕ, ಶ್ರೀಲಂಕಾಕ್ಕೆ ನೆನಪಿನಲ್ಲಿ ಉಳಿಯುವಂತಹ ಗೆಲುವನ್ನು ತಂದುಕೊಟ್ಟರು.
ಸಿಕಂದರ್ ರಾಝಾ ಅವರ ಅದ್ಭುತ ಇನ್ನಿಂಗ್ಸ್ ವ್ಯರ್ಥವಾದರೂ, ಅವರ ಹೋರಾಟ ಜಿಂಬಾಬ್ವೆಯನ್ನು ಗೆಲುವಿನ ಹತ್ತಿರ ತಂದುಕೊಂಡಿತು. ಅಂತಿಮವಾಗಿ ಮಧುಶಂಕನ ಹ್ಯಾಟ್ರಿಕ್ ಮ್ಯಾಜಿಕ್ವೇ ಪಂದ್ಯದ ಚಿತ್ರಣ ಬದಲಿಸಿ ಶ್ರೀಲಂಕಾಕ್ಕೆ ಜಯ ತಂದುಕೊಟ್ಟಿತು.
