ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಟೀಮ್ ಇಂಡಿಯಾ T20 ಅಂತರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಈವರೆಗೆ 261 ಪಂದ್ಯಗಳನ್ನಾಡಿದ್ದು, ಅದರಲ್ಲಿ ಭರ್ಜರಿ 173 ಪಂದ್ಯಗಳನ್ನು ಗೆದ್ದು ದಾಖಲೆ ನಿರ್ಮಿಸಿದೆ. ಆದರೆ, ಇಷ್ಟೊಂದು ಗೆಲುವುಗಳ ಇತಿಹಾಸವಿದ್ದರೂ, ದೊಡ್ಡ ಮೊತ್ತವನ್ನು ಬೆನ್ನಟ್ಟಿ ಗೆದ್ದ ಇತಿಹಾಸ ಭಾರತಕ್ಕಿಲ್ಲ ಎಂದರೆ ನಂಬಲೇಬೇಕು. ಈ ವೈಫಲ್ಯವು ಮತ್ತೆ ಮತ್ತೆ ಎದುರಾಗುತ್ತಿದ್ದು, ಇತ್ತೀಚೆಗೆ ಮುಲ್ಲನ್ಪುರ್ನಲ್ಲಿ ನಡೆದ ಸೌತ್ ಆಫ್ರಿಕಾ ವಿರುದ್ಧದ ಎರಡನೇ T20 ಪಂದ್ಯವು ಇದಕ್ಕೆ ಮತ್ತೊಂದು ಉದಾಹರಣೆ.
ಆ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ನೀಡಿದ 214 ರನ್ಗಳ ಬೃಹತ್ ಗುರಿಯನ್ನು ಬೆನ್ನತ್ತಿದ ಟೀಮ್ ಇಂಡಿಯಾ ಕೇವಲ 161 ರನ್ ಗಳಿಸಿ, ಬರೋಬ್ಬರಿ 51 ರನ್ಗಳ ಹೀನಾಯ ಸೋಲು ಅನುಭವಿಸಿತು.
ಭಾರತ ತಂಡವು ಬೃಹತ್ ಮೊತ್ತವನ್ನು ಚೇಸ್ ಮಾಡುವಲ್ಲಿ ಪದೇ ಪದೇ ವಿಫಲವಾಗುತ್ತಿರುವುದು ಅಂಕಿ-ಅಂಶಗಳಿಂದ ದೃಢಪಟ್ಟಿದೆ. ಭಾರತವು ಆಡಿರುವ 261 ಟಿ೨೦ ಪಂದ್ಯಗಳಲ್ಲಿ, ಎದುರಾಳಿ ತಂಡವು 7 ಬಾರಿ 210 ಕ್ಕಿಂತ ಹೆಚ್ಚು ರನ್ ಗಳಿಸಿದೆ. ಆಶ್ಚರ್ಯಕರ ವಿಷಯವೆಂದರೆ, ಈ ಎಲ್ಲ 7 ಪಂದ್ಯಗಳಲ್ಲೂ ಟೀಮ್ ಇಂಡಿಯಾ ಸೋತಿದೆ!
ಒಂದು ಅರ್ಥದಲ್ಲಿ, ಭಾರತದ ವಿರುದ್ಧ 210 ಕ್ಕಿಂತ ಅಧಿಕ ಸ್ಕೋರ್ ಗಳಿಸುವುದು ಎದುರಾಳಿ ತಂಡದ ಗೆಲುವಿನ ‘ಗ್ಯಾರಂಟಿ ಸಿಕ್ರೇಟ್’ ಆಗಿದೆ.
ಮುಂಬರುವ T20 ವಿಶ್ವಕಪ್ ಭಾರತ ಮತ್ತು ಶ್ರೀಲಂಕಾದಲ್ಲಿ ನಡೆಯಲಿದ್ದು, ಅಲ್ಲಿನ ಪಿಚ್ಗಳು ಸಾಮಾನ್ಯವಾಗಿ ಬ್ಯಾಟಿಂಗ್ಗೆ ಹೆಚ್ಚು ಸಹಕಾರಿ. ಈ ಹಿನ್ನೆಲೆಯಲ್ಲಿ, ಎದುರಾಳಿ ತಂಡಗಳು ಈ ‘210+ ರನ್’ ಸೂತ್ರವನ್ನು ಅನ್ವಯಿಸಿ, ಟೀಮ್ ಇಂಡಿಯಾ ವಿರುದ್ಧ ದೊಡ್ಡ ಮೊತ್ತವನ್ನು ಗಳಿಸುವ ಧ್ಯೇಯದೊಂದಿಗೆ ಕಣಕ್ಕಿಳಿಯುವ ಸಾಧ್ಯತೆ ದಟ್ಟವಾಗಿದೆ. ಏಕೆಂದರೆ, ಟೀಮ್ ಇಂಡಿಯಾ ಚೇಸಿಂಗ್ನಲ್ಲಿ ದುರ್ಬಲವಾಗಿದೆ ಎಂಬುದು ಜಗತ್ತಿಗೆ ತಿಳಿದಿದೆ.
ವಿಶ್ವಕಪ್ಗೂ ಮುನ್ನ, ಟೀಮ್ ಇಂಡಿಯಾ ತನ್ನ ಈ ಬೃಹತ್ ಮೊತ್ತ ಚೇಸಿಂಗ್ ವೈಫಲ್ಯವನ್ನು ಗಂಭೀರವಾಗಿ ಪರಿಗಣಿಸಿ ಸರಿಪಡಿಸಿಕೊಳ್ಳಬೇಕಿದೆ. ಭಾರತೀಯ ಬ್ಯಾಟರ್ಗಳು ಒತ್ತಡವನ್ನು ಮೆಟ್ಟಿ ನಿಂತು, ಸವಾಲಿನ ಗುರಿಗಳನ್ನು ಬೆನ್ನಟ್ಟುವ ಕೌಶಲ್ಯವನ್ನು ಹೆಚ್ಚಿಸಿಕೊಳ್ಳಬೇಕು. ಇಲ್ಲದಿದ್ದರೆ, ಎದುರಾಳಿಗಳು 210+ ರನ್ ಗಳಿಸಿದರೆ, ಭಾರತಕ್ಕೆ ಸೋಲು ಕಟ್ಟಿಟ್ಟ ಬುತ್ತಿ ಎನ್ನುವುದು ಈವರೆಗಿನ ಇತಿಹಾಸ ಹೇಳುವ ಕಠಿಣ ಸತ್ಯ.
