ಅನೇಕ ಪೋಷಕರಿಗೆ ತಮ್ಮ ಮಕ್ಕಳು ಒಂಟಿಯಾಗಿ ಕುಳಿತು ಬೊಂಬೆಗಳೊಂದಿಗೆ ಅಥವಾ ಆಟಿಕೆಗಳೊಂದಿಗೆ ಗಂಟೆಗಟ್ಟಲೆ ಮಾತನಾಡುವುದನ್ನು ನೋಡಿದಾಗ ಒಂದು ರೀತಿಯ ಆತಂಕ ಶುರುವಾಗುತ್ತದೆ. “ನನ್ನ ಮಗುವಿಗೆ ಏನಾದರೂ ಮಾನಸಿಕ ಸಮಸ್ಯೆಯೇ?” ಎಂದು ಅವರು ಚಿಂತಿಸಬಹುದು. ಆದರೆ ಮನೋವಿಜ್ಞಾನಿಗಳ ಪ್ರಕಾರ, ಇದು ಆತಂಕ ಪಡಬೇಕಾದ ವಿಷಯವಲ್ಲ, ಬದಲಿಗೆ ಮಗುವಿನ ಆರೋಗ್ಯಕರ ಬೆಳವಣಿಗೆಯ ಲಕ್ಷಣವಾಗಿದೆ.
ಮಕ್ಕಳು ಆಟಿಕೆಗಳೊಂದಿಗೆ ಮಾತನಾಡುವುದನ್ನು ಮನೋವಿಜ್ಞಾನದಲ್ಲಿ ‘ಕಾಲ್ಪನಿಕ ಆಟ’ ಎಂದು ಕರೆಯಲಾಗುತ್ತದೆ. ಇದು ಮಗುವಿನ ಸೃಜನಶೀಲತೆ ಮತ್ತು ಕಲ್ಪನಾ ಶಕ್ತಿ ಅಸಾಧಾರಣವಾಗಿದೆ ಎಂಬುದನ್ನು ತೋರಿಸುತ್ತದೆ. ಇಂತಹ ಮಕ್ಕಳು ಭವಿಷ್ಯದಲ್ಲಿ ಹೆಚ್ಚು ಬುದ್ಧಿವಂತರಾಗಿ ಮತ್ತು ಸೃಜನಶೀಲ ಚಿಂತಕರಾಗಿ ಬೆಳೆಯುತ್ತಾರೆ ಎಂದು ಅಧ್ಯಯನಗಳು ತಿಳಿಸಿವೆ.
ಸ್ನೇಹದ ಭಾವನೆ: 2 ರಿಂದ 5 ವರ್ಷದ ಮಕ್ಕಳು ತಮ್ಮ ಸುತ್ತಲಿನ ನಿರ್ಜೀವ ವಸ್ತುಗಳನ್ನು ಜೀವಂತ ಸ್ನೇಹಿತರೆಂದು ಭಾವಿಸುತ್ತಾರೆ.
ಭಾಷಾ ಪ್ರೌಢಿಮೆ: ಆಟಿಕೆಗಳೊಂದಿಗೆ ಮಾತನಾಡುವ ಮೂಲಕ ಮಗು ಹೊಸ ಪದಗಳನ್ನು ಬಳಸಲು ಮತ್ತು ವಾಕ್ಯಗಳನ್ನು ರೂಪಿಸಲು ಕಲಿಯುತ್ತದೆ.
ಭಾವನಾತ್ಮಕ ಬೆಳವಣಿಗೆ: ಆಟಿಕೆಗಳೊಂದಿಗೆ ತನ್ನ ಸುಖ-ದುಃಖಗಳನ್ನು ಹಂಚಿಕೊಳ್ಳುವ ಮೂಲಕ ಮಗು ಭಾವನೆಗಳನ್ನು ವ್ಯಕ್ತಪಡಿಸುವುದನ್ನು ಕಲಿಯುತ್ತದೆ. ಇದು ಅವರ ಅರಿವಿನ ಬೆಳವಣಿಗೆಯ ಒಂದು ಮುಖ್ಯ ಹಂತ.
ಪೋಷಕರು ಏನು ಮಾಡಬೇಕು?
ಸಾಮಾನ್ಯವಾಗಿ 2 ರಿಂದ 5 ವರ್ಷದ ಮಕ್ಕಳಲ್ಲಿ ಈ ಪ್ರವೃತ್ತಿ ಹೆಚ್ಚಾಗಿ ಕಂಡುಬರುತ್ತದೆ ಮತ್ತು ವಯಸ್ಸಾದಂತೆ ಇದು ತಾನಾಗಿಯೇ ಬದಲಾಗುತ್ತದೆ. ಹಾಗಾಗಿ ಪೋಷಕರು ಗಾಬರಿಗೊಳ್ಳುವ ಅಗತ್ಯವಿಲ್ಲ. ಬದಲಿಗೆ, ಮಗುವಿನ ಈ ಕಾಲ್ಪನಿಕ ಜಗತ್ತನ್ನು ಪ್ರೋತ್ಸಾಹಿಸಿ. ಇದು ಅವರ ವ್ಯಕ್ತಿತ್ವ ವಿಕಸನಕ್ಕೆ ಭದ್ರ ಬುನಾದಿ ಹಾಕುತ್ತದೆ.
