ಭಾರತವು ತನ್ನ ವೈವಿಧ್ಯತೆಯಲ್ಲಿಯೇ ಏಕತೆಯನ್ನು ಕಂಡುಕೊಂಡ ರಾಷ್ಟ್ರ. ಈ ಅಸಾಧಾರಣ ಏಕತೆಯ ಹಿಂದಿರುವ ಪ್ರಮುಖ ನಾಯಕರೆಂದರೆ ಸರ್ದಾರ್ ವಲ್ಲಭಭಾಯಿ ಪಟೇಲ್‌. ಪ್ರತಿವರ್ಷ ಅಕ್ಟೋಬರ್ 31ರಂದು ಆಚರಿಸಲಾಗುವ ರಾಷ್ಟ್ರೀಯ ಏಕತಾ ದಿನ (National Unity Day) ಅವರ ಜನ್ಮದಿನದ ಗೌರವಾರ್ಥವಾಗಿದ್ದು, ರಾಷ್ಟ್ರದ ಏಕತೆ, ಸಾಂಘಿಕತೆ ಮತ್ತು ದೇಶಭಕ್ತಿ ಎಂಬ ಮೌಲ್ಯಗಳನ್ನು ನೆನಪಿಸುವ ದಿನವಾಗಿದೆ.
ಇತಿಹಾಸದ ಪಥದಲ್ಲಿ ಸರ್ದಾರ್ ಪಟೇಲ್‌:
1875ರ ಅಕ್ಟೋಬರ್ 31ರಂದು ಗುಜರಾತ್‌ನ ನಾಡಿಯಾಡಿನಲ್ಲಿ ಜನಿಸಿದ ಸರ್ದಾರ್ ಪಟೇಲ್‌ ಅವರು ಭಾರತದ ‘ಐರನ್ ಮ್ಯಾನ್‌’ ಎಂದು ಪ್ರಸಿದ್ಧರಾಗಿದ್ದಾರೆ. ಸ್ವಾತಂತ್ರ್ಯ ನಂತರ ಭಾರತವನ್ನು ಒಗ್ಗೂಡಿಸಲು ಅವರು ಮಾಡಿದ ಸೇವೆ ಅಪಾರ. ಸುಮಾರು 562 ಸಂಸ್ಥಾನಗಳನ್ನು ಒಗ್ಗೂಡಿಸಿ ಒಂದು ಬಲಿಷ್ಠ ರಾಷ್ಟ್ರದ ನಿರ್ಮಾಣ ಮಾಡಿದ ಪಟೇಲ್‌ ಅವರು, ದೇಶದ ಭೌಗೋಳಿಕ ಏಕತೆಗೆ ಶಾಶ್ವತ ಅಡಿಪಾಯ ಹಾಕಿದರು.
ಏಕೆ ಆಚರಿಸಬೇಕು ಈ ದಿನವನ್ನು?:
ರಾಷ್ಟ್ರೀಯ ಏಕತಾ ದಿನವನ್ನು ಆಚರಿಸುವ ಉದ್ದೇಶ ಕೇವಲ ಪಟೇಲ್‌ ಅವರ ಸ್ಮರಣೆಯಲ್ಲ, ಅವರು ನೀಡಿದ ಏಕತೆಯ ಪಾಠವನ್ನು ಮುಂದಿನ ಪೀಳಿಗೆಗೆ ತಲುಪಿಸುವುದು. ಧಾರ್ಮಿಕ, ಭಾಷಿಕ ಅಥವಾ ಪ್ರಾದೇಶಿಕ ವಿಭಜನೆಗಳ ನಡುವೆಯೂ ‘ಒಂದು ಭಾರತ, ಶ್ರೇಷ್ಠ ಭಾರತ’ ಎಂಬ ತತ್ವವನ್ನು ಜನಮನದಲ್ಲಿ ಬೇರೂರಿಸುವುದು ಇದರ ಮುಖ್ಯ ಗುರಿ.
ರಾಷ್ಟ್ರೀಯ ಏಕತಾ ದಿನವು ಕೇವಲ ಒಂದು ಆಚರಣೆ ಅಲ್ಲ, ಅದು ಭಾರತೀಯರೊಳಗಿನ ಬಂಧನದ, ಏಕತೆಯ ಹಾಗೂ ದೇಶಭಕ್ತಿಯ ಜೀವಂತ ಚಿಹ್ನೆ. ಸರ್ದಾರ್ ಪಟೇಲ್‌ ಅವರ ಕನಸಿನ ಭಾರತವನ್ನು ಜೀವಂತವಾಗಿಡುವುದು ಪ್ರತಿಯೊಬ್ಬ ಭಾರತೀಯನ ಕರ್ತವ್ಯವಾಗಿದೆ.
