ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತೀಯ ಫುಟ್ಬಾಲ್ ಲೋಕದ ಅತ್ಯಂತ ಅನುಭವಿ ತಾಂತ್ರಿಕ ತಜ್ಞರಲ್ಲಿ ಒಬ್ಬರಾದ ಸಾವಿಯೊ ಮೆಡೈರಾ ಅವರನ್ನು ಬೆಂಗಳೂರು ಎಫ್ಸಿ (BFC) ತನ್ನ ಯುವ ಅಭಿವೃದ್ಧಿ ವಿಭಾಗದ (Head of Youth Development) ಮುಖ್ಯಸ್ಥರನ್ನಾಗಿ ನೇಮಿಸಿದೆ. ತಳಮಟ್ಟದಿಂದಲೇ ವಿಶ್ವದರ್ಜೆಯ ಆಟಗಾರರನ್ನು ಸಿದ್ಧಪಡಿಸುವ ಉದ್ದೇಶದಿಂದ ಬಿಎಫ್ಸಿ ಈ ಪ್ರಮುಖ ನಿರ್ಧಾರ ಕೈಗೊಂಡಿದೆ.
ಎರಡು ದಶಕಗಳಿಗೂ ಹೆಚ್ಚು ಕಾಲ ಫುಟ್ಬಾಲ್ ತರಬೇತಿ ಮತ್ತು ತಾಂತ್ರಿಕ ಅಭಿವೃದ್ಧಿಯಲ್ಲಿ ತೊಡಗಿಸಿಕೊಂಡಿರುವ ಮೆಡೈರಾ ಅವರ ಸಾಧನೆ ಅಪಾರ
ಭಾರತೀಯ ಹಿರಿಯ ಪುರುಷರ ತಂಡದ ಮುಖ್ಯ ತರಬೇತುದಾರರಾಗಿ ಸೇವೆ ಸಲ್ಲಿಸಿದ ಅನುಭವ. 2011ರ ಸ್ಯಾಫ್ ಚಾಂಪಿಯನ್ಶಿಪ್ ಹಾಗೂ ನೆಹರು ಕಪ್ ಗೆಲುವಿನಲ್ಲಿ ಇವರ ಪಾತ್ರ ಮಹತ್ವದ್ದು.
ಸಾಲ್ಗಾಂವ್ಕರ್ ಎಸ್ಸಿ ತಂಡಕ್ಕೆ ಹಲವು ಪ್ರಶಸ್ತಿಗಳನ್ನು ತಂದುಕೊಟ್ಟ ಕೀರ್ತಿ ಇವರದ್ದು. ಎಐಎಫ್ಎಫ್ (AIFF) ತಾಂತ್ರಿಕ ನಿರ್ದೇಶಕರಾಗಿ ಹಾಗೂ ಪ್ರಸ್ತುತ ಫಿಫಾ (FIFA) ತಾಂತ್ರಿಕ ತಜ್ಞರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.
ಹೊಸ ಜವಾಬ್ದಾರಿ ವಹಿಸಿಕೊಂಡ ಮೆಡೈರಾ ಅವರು ತಮ್ಮ ಗುರಿಯನ್ನು ಸ್ಪಷ್ಟಪಡಿಸಿದ್ದಾರೆ. “ಬೇರೆ ಕಡೆಯಿಂದ ಆಟಗಾರರನ್ನು ತರುವ ಬದಲು, ನಮ್ಮಲ್ಲಿರುವ ಸ್ಥಳೀಯ ಪ್ರತಿಭೆಗಳನ್ನು ಗುರುತಿಸಿ, ಅವರಿಗೆ ಅಂತರಾಷ್ಟ್ರೀಯ ಮಟ್ಟದ ತರಬೇತಿ ನೀಡಿ ಪ್ರಥಮ ತಂಡಕ್ಕೆ ಸೇರಿಸುವುದು ನನ್ನ ಮೊದಲ ಆದ್ಯತೆ,” ಎಂದು ಅವರು ತಿಳಿಸಿದ್ದಾರೆ.
ಬೆಂಗಳೂರು ಎಫ್ಸಿಯ ಫುಟ್ಬಾಲ್ ನಿರ್ದೇಶಕ ಡ್ಯಾರೆನ್ ಕಾಲ್ಡೈರಾ ಮಾತನಾಡಿ, “ಸಾವಿಯೊ ಅವರಂತಹ ಅನುಭವಿ ವ್ಯಕ್ತಿ ನಮ್ಮ ತಂಡಕ್ಕೆ ಸೇರ್ಪಡೆಯಾಗಿರುವುದು ಹೆಮ್ಮೆಯ ವಿಷಯ. ಅವರ ಮಾರ್ಗದರ್ಶನದಲ್ಲಿ ನಮ್ಮ ಯುವ ಅಕಾಡೆಮಿ ಹೊಸ ಎತ್ತರಕ್ಕೆ ಬೆಳೆಯಲಿದೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
